D u q sabiq re'isi erkin alptékin Uyghur musapirlardin hal soridi

Erkin alptékin Uyghur musapirlardin hal soridi

Dunya Uyghur qurultiyining sabiq re'isi, dunya Uyghur qurultiyi meslihetchiler komitéti ezasi erkin alptékin ependi 8 - 9 - awghust künliri mexsus türkiyening qeyseri shehiride ziyarette bolup, qeyseride yashawatqan musapir Uyghurlardin hal soridi shundaqla Uyghur yétim balilargha maddi jehettin yardem qildi.

Türkiyening ottura rayonigha jaylashqan qeyseri wilayiti Uyghurlar eng köp jaylashqan sheherlerdin biri bolup, 1964 - yili afghanistan arqiliq kelgen Uyghurlar exmet yesewi mehelliside sherqiy türkistan medeniyet we hemkarliq jem'iyiti qurup Uyghurlarning awazi bolmaqta.

2014 - 2015 - Yilliri malayshiya we tayland arqiliq kelgen Uyghurlar bolsa dölet orunlashturghan qoro jayda turmaqta. Bu Uyghurlar turmushta téxiche xatirjem bolalmighan bolsimu, emma mehellide mektep échip öz perzentlirige ana til we din ögetmekte, meschit échip erkin ibaditini dawam qilmaqta, tenterbiye merkezlirini échip bala - chaqilirini terbiyilimekte. Mezkur musapir Uyghurlar dunya axbarat organlirining shundaqla dunyaning herqaysi jaylirida yashawatqan Uyghur ammiwi teshkilatliri mes'ulliri we Uyghurlarning diqqitini tartmaqta. Yéqindin béri bir qisim Uyghurlar arqa - arqidin kélip Uyghur musapirlardin hal sorimaqta we maddi yardem qilmaqta.

Dunya Uyghur qurultiyi sabiq re'isi erkin alptékin 8 - ayning 8 - küni qeyserige kélip Uyghur musapirlardin hal soridi we yétim balilargha iqtisadiy yardem tarqitip berdi. U ziyaritimizni qobul qilip, özining qeyserige burun we hazir kélip olturaqliship qalghan Uyghurlar bilen uchrashqanliqidin nahayiti xursen bolghanliqini éytti.

Musapir Uyghurlargha wakaliten erkin alptékinni kütüwalghan ömer tabip ependi özining wetendiki waqtidila eysa yüsüp alptékin bilen erkin alptékinni bilidighanliqini, bu yerde erkin alptékinni körüp nahayiti xursen bolghanliqini bildürdi. Ömer tabip ependi erkin alptékining kichik balilargha iqtisadiy yardem tarqitip bergenlikini bayan qildi.

RFA/Erkin Tarim

Qeyseride pa'aliyet élip bériwatqan sherqiy türkistan medeniyet we hemkarliq jem'iyiti re'isi séyit tümtürk ependi erkin alptékinning aldi bilen teshkilat ishxanisini ziyaret qilghanliqini, özlirining erkin alptékin'ge mezkur teshkilatning 50 yilliq pa'aliyiti toghrisida doklat bergenlikini bayan qildi.

Séyit tümtürk ependi 15 - iyul künidin hazirghiche bolghan ariliqta 10 din artuq dölettin kelgen Uyghurlarning qeyseridiki Uyghur musapirlardin hal sorighanliqini ilgiri sürdi.

Qeyseride turiwatqan Uyghur musapirlardin ömer tebip ependi özlirining köp yardemlerge ériship kéliwatqan bolsimu, emma puqraliq salahiyiti, ishlesh hoquqi, dawalinish we bashqa tereplerde qiyinchiliqliri barliqi, bu qiyinchiliqlarning tézraq hel bolushini ümid qilidighanliqini bildürdi.

RFA/Erkin Tarim

Igiligen melumatlargha asaslan'ghanda, 2014 - 2015 - yillirida tayland we malayshiya arqiliq 7 ming etrapida Uyghur musapir türkiyege kelgen bolup, bularning ichidin 2 ming etrapida kishi Uyghur türkiyening qeyseri wilayitide yashimaqta.