Д у қ вәкилиниң сөз һәққи түпәйли б д т да хитай билән демократик дөләтләр арисида талаш-тартиш чиқти

Ихтиярий мухбиримиз әкрәм
2016.11.25
bdt-duq-az-sanliq-munbiri-dolqun-eysa-2016.jpg Д у қ баш катипи долқун әйса әпәнди “аз санлиқлар мунбири” йиғинида сөздә
RFA/Ekrem


Бүгүн д у қ вәкиллириниң б д т дики “аз санлиқлар мунбири” йиғинида сөз қилиш һәққигә хитай қарши чиққан, демократик дөләтләр қоллиған. Икки тәрәп оттурисидики талаш-тартиш 25 минут давамлашқан.

Д у қ баш катипи долқун әйса әпәндиниң бүгүн җәнвәдики б д т баш шитабидин бәргән мәлуматиға асасланғанда, б д т кишилик һоқуқ мәркизидә 24-ноябир башланған “аз санлиқлар мунбири” йиғини бүгүн иккинчи күнигә қәдәм қойған. Йүзләрчә дөләт вә хәлқара тәшкилатларниң вәкиллири қатнашқан бу йиғинда д у қ вәкиллири уйғурларға вәкалитән 3 минутлуқ сөз қилиш һәққигә еришкән.

Бирақ, д у қ вәкиллири сөзини башла-башлимайла, хитай тәрәпниң вәкиллири орнидин туруп, д у қ ниң террорчи тәшкилат икәнликини, б д т да сөз қилиш салаһийити йоқлуқини билдүрүп, д у қ ниң сөз һәққигә хатимә беришкә урунған. Хитайни пакистанға охшаш бир қисим дөләтләр қоллиған. Әмма йәнә бир қисим ғәрб дөләтлири хитайға етираз билдүрүп, д у қ ниң сөз һәққини қоллап пикирләр баян қилған. Нәтиҗидә талаш-тартишлар башлинип, 25 минут давамлашқан.

Долқун әйса әпәндиниң билдүрүшичә, д у қ ниң программа йитәкчиси петер әпәнди мунбәрдә 3 минутлуқ сөз һәққини ада қилғандин кейин, хитай вә хитайға беқинидиған бир қисим дөләтләрниң вәкиллиридин башқа, пүтүн йиғин әһли алқишлар яғдуруп қоллиған. Әмма, бу йиғинда һиндонезийәниң хитайниң тәрипини тутуши д у қ баш катипини әпсусландурған.

Чүштин кейин б д т кишилик һоқуқ кеңшидә йәнә “ унтулған паҗиәләр вә унтулған қурбанлар-азсанлиқлар вә инсанлиқниң тәһдиткә йолуқуши” темисида йиғин болуп өткән. Долқун әйса әпәнди бу йиғинда сөз пурситигә еришип уйғурлар мәсилиси, җүмлидин уйғур муһаҗирлири мәсилиси тоғрисида доклатлар тәқдим қилған.

Долқун әйса әпәнди йиғин җәрянида йәнә, уйғур муһаҗирлириға һәқиқий рәвиштә игә чиқиш мәсилиси үстидә б д т муһаҗирлар алий комиссарлиқи хадимлири билән сөһбәтләр елип барған. Бүгүн д у қ баш катипи долқун әйса вә программа йитәкчиси петер әпәндиләр естонийә, чех вә белгийә қатарлиқ дөләтләрниң б д т дики баш әлчилири билән айрим-айрим көрушуп, уйғурлар мәсилиси һәққидә сөһбәтләр елип барған.

Долқун әйса әпәнди зияритимиз хатимисидә, б д т да елип барған бу бир һәптилик паалийәтниң нәтиҗилик болғанлиқини әскәртип өтти.

Техиму диққәтни чекидиғини, бу қетим б д т сақчи хадимлири долқун әйса әпәндини алаһидә муһапизити астиға алған. Сақчи мәсуллири йиғинниң 1-күнила уни ишханисида айрим қобул қилип, долқун әйсаниң б д т дики пүтүн паалийәтлири вә бихәтәрликигә б д т сақчи идарисиниң мәсуллиқини, у таки б д т дин айрилғичә уни муһапизити астида тутидиған алаһидә хадимлар аҗратқанлиқини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.