Amérikining enqerediki elchixanisida partlash yüz berdi

2013 - Yili 2 - ayning 1 - küni amérikining enqerede turushluq bash elchixanisi bedinige bomba téngilghan bir jinayetchining hujumigha uchridi. Partlashta jem'iy ikki kishi ölgen bolup, birining amérika elchixanisida ishleydighan türk amanliq saqlighuchi, birining partlatquchi ikenliki melum.
Muxbirimiz erkin tarim
2013-02-01
Share
amerika-elchixanisigha-hujum-305.png Amérikining enqerediki elchixanisida bolghan partilashtin bir körünüsh
RFA/Erkin Tarim


Bu weqe bedinige bomba tangghan kishi elchixanining wiza bölümi ishikidiki lazir nurluq tekshürüsh aparatidin ötüwatqanda bomba partlap ketkenliktin kélip chiqqan. Weqedin kéyin alahide saqchi qisimliri neq meydanni tarqaqlashturup ikkinchi qétimliq yüz bérish éhimali bolghan partlashning aldini élishqa tirishqan we weqeni tekshürüshni bashliwetken. Bu weqeni tekshürüshke yene enqere jama'et xewpsizlik idarisimu biwaste qatnashmaqta. Neq meydan'gha enqere waliysi alaheddin yüksel, türkiye jama'et xewpsizlik idarisi bashliqi memet qilichdar we enqere jama'et xewpsizlik idarisi bashliqi qadir ay qatarliqlar kélip tekshürüshni közetti.

Weqedin kéyinla türkiye bash ministiri rejep tayyip erdoghan bayanat bérip mundaq dédi:

- Amérika elchixanisigha élip bérilghan hujum eslide dölitimizning muqimliqi we xelqimizning bextiyar turmushigha élip bérilghan hujum. Biz bulargha qarshi ittipaq bolup bularni yéngimiz. Shuni bilinglarki, shéhitlirimizning qénini hergiz yerde qoymaymiz.

Enqere waliysi alaheddin yüksel bilen amérika büyük elchisi réchardoni birlikte muxbirlargha bergen bayanatida, weqede ikki kishining ölüp, bir kishining yaridar bolghanliqini éytti.

Richardoniy bayanatini mundaq dawamlashturdi:

- Elchixanigha élip bérilghan bu hujumda bir türk xadimimiz hayatidin ayrildi. Bu hujum türkiye - amérika munasiwitige ziyan yetküzmeydu. Türkiye yenila bizning dostimiz.

Türkiye dölet ishliri ministiri muhammer güler muxbirlargha bayanat bérip, weqede ölgen kishining amanliq saqlighuchi xadim mustafa aqarsu ikenlikini, yene bir ölgüchining salahiyitining éniqliniwatqanliqini, didem tunjay isimliq ayalning éghir yarilan'ghan bolup, dawaliniwatqanliqini éytti.

Türkiye kültür we sayahet ministiri ömer chelik ependi bayanat bérip, amérikining enqerede turushluq elchixanisigha élip bérilghan hujumni qattiq eyibleydighanliqini, hayatidin ayrilghan amanliq saqlighuchi xadimning a'ilisige sebir - taqet tileydighanliqini éytti. Arqidin, amérika elchixanisi resmiy höjjet tarqatti. Höjjette monular yézilghan:

"2013 - Yili 2 - ayning 1 - küni yerlik sa'et 13:15 te bir partlash yüz berdi. Hazir türk jama'et xewpsizlik idarisining xadimliri elchixanimizni qattiq muhapizet qilmaqta. Amérika elchixanisi namidin türkiye hökümitige, axbarat xadimlirigha we pütün türk xelqining bu weqege bolghan nepriti we biz bilen élip barghan hemkarliqi üchün rehmitimizni bildürimiz."

Amérika elchixanisi enqere merkizidiki elchixanilar rayonigha jaylashqan bolup, radi'omizning enqerede turushluq ishxanisigha bir kélométir uzaqliqta. Weqedin kéyin, etraptiki pütün elchixanilar amanliq tedbirlirini kücheytken. Bolupmu qoshna elchixanilardin gérmaniye, italiye, fransiye elchixaniliri qattiq tedbir alghan bolup, gérmaniye büyük elchisi ebirxard poxl türkiyining mersin wilayitide élip bériwatqan ziyaritini toxtitip enqerege qaytqan.

Amérikining türkiye paytexti enqerediki büyük elchixanisini partlitish weqesi nöwette jiddiy tekshürülmekte. Biz xewerni oqush aldida, hujum qilghan kishining solchi térrror teshkilatigha eza 40 yashlar chammisidiki ejewit ismlik türkiye puqrasi ikenliki éniqlandi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet