Йүзлигән намайишчи хитайниң әнқәрә әлчиханиси алдида иптар қилип хитайни әйиблиди

Мухбиримиз әркин тарим
2014.07.18
turkiye-enqere-xitay-elchiliki-aldida-iptar.jpg Намайишчилар хитай әлчиханиси алдида еғиз ачти
RFA/Erkin Tarim

Рамизан ейида хитай һөкүмитиниң уйғурларға елип бериватқан диний бесим сияситини яни уйғурларни рози тутқузмаслиқ сияситигә наразилиқ билдүрүш үчүн 7 - айниң 17 - күни йүзлигән түрк намайишчи хитай әлчиханиси алдида еғиз ачти. Иптар вақтидин бурун мухбирларға баянат бәргән кадирлар уюшмисиниң муавин башлиқи һаҗи байрам тонбул әпәнди хитай зулумини әйиблиди.

У, хитай һөкүмитиниң уйғурларни ассимилятсийә вә йоқ қилиш сиясити йүргүзүватқанлиқини ейтти.

Хитай әлчиханиси алдиға йиғилған йүзлигән кадирлар уюшмиси әзалири қоллирида шәрқий түркистан байриқи, түрк байриқи вә лозункиларни көтүргән һалда “шәрқий түркистандики хитай зулумини ләнәтләймиз!”, “түркийә ухлима; қериндашлириңға игә чиқ!”, “шәрқий түркистанға әркинлик берилсун!”, “мусулман шәрқий түркистан хәлқи бигунаһтур!” вә “уйғурларниң рози тутушиға узатқан қоллар сундурулсун!” дегәндәк шоарларни товлашти.

Намайишчилар йәнә иптар вақти болуштин бурун хитай әлчиханиси алдида қуран тилавити қилди.

Арқидин бу паалийәтни уюштурған түркийә кадирлар уюшмиси муавин башлиқи һаҗи байрам тонбул әпәнди мухбирларға баянат бәрди.

У, алди билән уйғур мусапирлар тоғрисида мәлумат берип мундақ деди: хитай дөлити шәрқий түркистанни бесивалған күндин бүгүнгичә шәрқий түркистанлиқларға һәр түрлүк бесим вә зулум сияситини елип бармақта. Башқа дөләтләргә болупму малайшия, тайланд вә түркийә қатарлиқ дөләтләргә қечип кәлгән уйғурлар бирләшкән дөләтләр тәшкилатиниң мусапирлар салаһийитигиму еришәлмәйватиду. Һәтта бәзи дөләтләр дөлитигә қечип кәлгән уйғурларни хитайға қайтуруп бәрмәктә, хитай уларға өлүм җазаси бәрмәктә. Уйғурлар тарихта көрүлүп бақмиған дәриҗидә қейин күнләрни бешидин өткүзмәктә.

Һаҗи байрам тонбул әпәнди һазир мубарәк рози ейида хитайниң уйғурларниң рози тутушини чәклигәнликини, хитайниң бу инсанлиқ қелипидин чиққан сияситини әйибләйдиғанлиқини баян қилип мундақ деди: һазир рамизан ейида шәрқий түркистанда уйғур кадирлар билән оқуғучиларниң рози тутуши чәклинипту. Рози тутуш ислам дининиң бир буйруқи.

Мусулманлар үчүн 5 пәризиниң биридур. Инсан һәқ вә һоқуқлириға пәқәт һөрмәт қилмайдиған хитай дөлитиниң инсанларниң етиқад әркинликини чәкләш сияситини әйибләш үчүн бүгүн хитайниң әнқәрә әлчиханиси алдида намайиш қилип олтуруптимиз. Худайим буйруса бизниң бу авазимизни бирләшкән дөләтләр тәшкилати аңлар, уйғурларниң дәрд - пәрядиға қулақ салар. Хитай һөкүмитиниң бу бесим сияситини тохтитиш үчүн хизмәт қилар, дәп ойлаймиз.

Түркийә кадирлар уюшмиси муавин рәиси һаҗи байрам тонбул әпәнди шәрқий түркистан хәлқиниң әркинлики үчүн қоллиридин кәлгәнни қилидиғанлиқини баян қилип мундақ деди: биз кадирлар уюшмиси болуш сүпитимиз билән шәрқий түркистан мәсилисини һәр даим күнтәртипкә әкелишкә тиришиватимиз. Биз кадирлар уюшмиси болуш сүпитимиз билән өткән һәптә саадәт партийәси истанбулда өткүзгән “шәрқий түркистан вә пәләстиндики зулумға қарап турма” мавзулуқ чоң учришишқа қатнаштуқ. Тәшкилатимизниң түркийәниң 81 вилайитидики шөбилири шәрқий түркистан мәсилисини һәр хил паалийәтләр арқилиқ күн тәртипкә елип келишкә тиришмақта.

Бүгүнки паалийәт түркийә дөләт телевизийәси қанили вә шәхси телевизийә қаналлирида тарқитилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.