Erdoghanning ziyapitige Uyghur ammiwiy teshkilatlirining mes'ullirimu qatnashti

Muxbirimiz erkin tarim
2014.12.26
hidayetullah-oghuzxan-maarip-teshkilati-305.jpg Sherqiy türkistan ma'arip we hemkarliq jem'iyitining 2013-yilliq xizmet muzakire yighinida hidayetullah oghuzxan söz qildi. 2013-Yili 20-yanwar, türkiye.
RFA/Arslan


Türkiye dölet re'isi rejep tayyip erdoghan 12 - ayning 25 - küni axsham bergen katta ziyapetke sherqiy türkistan ammiwiy teshkilatlirining rehberlirimu alahide teklip boyiche qatnashti. Erdoghan türkiye xelq iradisi munbirinimu öz ichige alghan 173 chong ammiwiy teshkilatning mes'ullirigha yéngi sélin'ghan ordisining ziyapet zalida ziyapet berdi. Mezkur ziyapetke sherqiy türkistan ma'arip we hemkarliq teshkilati bashliqi hidayetullah oghuzxan ependi bilen sutuq bughraxan ilim we medeniyet fondi jem'iyiti bashliqi alimjan boghda ependi alahide teklip boyiche qatnashti. Muxbirlargha yépiq ötküzülgen bu ziyapetke türkiye siyasitige zor tesir körsitiwatqan eng chong ammiwiy teshkilatlarning mes'ulliri, döletning aliy rehberliridin bolup, 250 etrapida kishi qatnashti.

Sherqiy türkistan ma'arip we hemkarliq teshkilati bashliqi hidayetullah oghuzxan ependining éytishiche, u, ziyapet jeryanida türkiye dölet re'isi rejep tayyip erdoghan bilen körüshüp, dölet re'isi erdoghanning Uyghurlarning türkiye puqraliqigha qobul qilinishi we Uyghurlargha iqamet bérilishi we Uyghur dewasigha köngül bölüshige rehmet éytqan shundaqla sherqiy jenubi asya döletliridin türkiyege kelgen musapir Uyghurlargha türkiye dölitining yardem qilishini telep qilghan. Türkiyede qéyin shert - shara'itta yashawatqan Uyghurlargha, shundaqla taylandta turuwatqan 300 Uyghurni türkiyege élip kélishke yardem qilishini telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.