Түркийә дөләт рәиси рәҗәп тайип әрдоған хитай зияритидә уйғур вә туңган мусулманлириниң вәкиллири билән көрүшидиғанлиқини ейтти

Мухбиримиз әркин тарим
2015.07.29
erdoghan-xitaygha-ziyaret-mengish-aldida-2015.jpg Түркийә дөләт рәиси рәҗәп тайип әрдоған хитай зияритигә меңиш алдида
RFA/Erkin Tarim


Түркийә дөләт рәиси рәҗәп тайип әрдоған бүгүн, йәни 7 - айниң 28 - күни хитайға рәсмий зиярәткә меңиштин бурун әнқәрә әсәнбоға айродромида хитай дөлитигә елип баридиған рәсмий зиярити тоғрисида мәлумат бәргәндә, уйғур вә туңган мусулманлириниң вәкиллири биләнму көрүшидиғанлиқини ейтти.

Бу, рәҗәп тайип әрдоған дөләт рәиси болғандин кейинки тунҗи қетимлиқ хитай зиярити болуп, бу зиярәтни уйғур мәсилиси түркийәниң күн тәртипигә киргән, оттура шәрқниң вәзийитиниң күнсайин еғирлишиватқан бир пәйтидә елип бериши кишиләрниң диққәт - етибарини қозғимақта.

Хитай дөләт рәиси ши җинпиңниң тәклипигә бинаән 7 - айниң 28 - күнидин 30 - күнигичә хитайға рәсмий зиярәт елип баридиған рәҗәп тайип әрдоған мухбирларға бәргән баянатида, бу зиярәттә көп санда министир, парламент әзалири, карханичилар вә мухбир - журналистларниң һәмраһ болидиғанлиқини, ши җинпиң билән елип баридиған учришишида икки дөләт оттурисидики мунасивәтләр, һәмкарлишиш йоллири, дуня вә район характерлик мәсилиләр тоғрисида пикир алмаштуридиғанлиқини баян қилди. Хитай хәлқ қурултийи башлиқи җаң деҗяң вә хитай баш министири ли кечяң биләнму көрүшидиғанлиқини ейтти.

Түркийә дөләт рәиси рәҗәп тайип әрдоған мухбирларға бәргән баянатида гәрчә уйғур мәсилисини күнтәртипкә елип келидиғанлиқини тәкитлимигән болсиму, түркийә - хитай мунасивәтлири мутәхәссислири уйғур мәсилисиниң чоқум күнтәртипкә келидиғанлиқини илгири сүрүшмәктә. Булардин башқа нуқтилиқ һалда икки дөләт оттурисидики тиҗарәт мунасивәтләр, түркийә хитайдин сетивалмақчи болған башқурулидиған бомбиға қарши туруш системиси, район вә хәлқаралиқ мәсилиләр музакирә қилинидикән.

Биз бу һәқтики көз қаришини игиләш үчүн түркийә истратегийилик чүшәнчә институти түркийә хитай мунасивити мутәхәссиси доктор әркин әкрәм билән сөһбәт елип бардуқ.

Доктор әркин әкрәм, рәҗәп тайип әрдоған 11 - айда анталяда ечилидиған 20 дөләт башлиқлири йиғиниға хитай дөләт рәиси ши җинпиңни тәклип қилғили кәткәнликини, зиярәттә йәнә түркийә - хитай оттурисидики тиҗарәт мунасивити шундақла уйғур мәсилиси тоғрисида музакириләр елип берилидиғанлиқини баян қилип өтти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.