Türkiye dölet re'isi rejep tayip erdoghan xitay ziyaritide Uyghur we tunggan musulmanlirining wekilliri bilen körüshidighanliqini éytti

Muxbirimiz erkin tarim
2015.07.29
erdoghan-xitaygha-ziyaret-mengish-aldida-2015.jpg Türkiye dölet re'isi rejep tayip erdoghan xitay ziyaritige méngish aldida
RFA/Erkin Tarim


Türkiye dölet re'isi rejep tayip erdoghan bügün, yeni 7 - ayning 28 - küni xitaygha resmiy ziyaretke méngishtin burun enqere esenbogha ayrodromida xitay dölitige élip baridighan resmiy ziyariti toghrisida melumat bergende, Uyghur we tunggan musulmanlirining wekilliri bilenmu körüshidighanliqini éytti.

Bu, rejep tayip erdoghan dölet re'isi bolghandin kéyinki tunji qétimliq xitay ziyariti bolup, bu ziyaretni Uyghur mesilisi türkiyening kün tertipige kirgen, ottura sherqning weziyitining künsayin éghirlishiwatqan bir peytide élip bérishi kishilerning diqqet - étibarini qozghimaqta.

Xitay dölet re'isi shi jinpingning teklipige bina'en 7 - ayning 28 - künidin 30 - künigiche xitaygha resmiy ziyaret élip baridighan rejep tayip erdoghan muxbirlargha bergen bayanatida, bu ziyarette köp sanda ministir, parlamént ezaliri, karxanichilar we muxbir - zhurnalistlarning hemrah bolidighanliqini, shi jinping bilen élip baridighan uchrishishida ikki dölet otturisidiki munasiwetler, hemkarlishish yolliri, dunya we rayon xaraktérlik mesililer toghrisida pikir almashturidighanliqini bayan qildi. Xitay xelq qurultiyi bashliqi jang déjyang we xitay bash ministiri li kéchyang bilenmu körüshidighanliqini éytti.

Türkiye dölet re'isi rejep tayip erdoghan muxbirlargha bergen bayanatida gerche Uyghur mesilisini küntertipke élip kélidighanliqini tekitlimigen bolsimu, türkiye - xitay munasiwetliri mutexessisliri Uyghur mesilisining choqum küntertipke kélidighanliqini ilgiri sürüshmekte. Bulardin bashqa nuqtiliq halda ikki dölet otturisidiki tijaret munasiwetler, türkiye xitaydin sétiwalmaqchi bolghan bashqurulidighan bombigha qarshi turush sistémisi, rayon we xelq'araliq mesililer muzakire qilinidiken.

Biz bu heqtiki köz qarishini igilesh üchün türkiye istratégiyilik chüshenche instituti türkiye xitay munasiwiti mutexessisi doktor erkin ekrem bilen söhbet élip barduq.

Doktor erkin ekrem, rejep tayip erdoghan 11 - ayda antalyada échilidighan 20 dölet bashliqliri yighinigha xitay dölet re'isi shi jinpingni teklip qilghili ketkenlikini, ziyarette yene türkiye - xitay otturisidiki tijaret munasiwiti shundaqla Uyghur mesilisi toghrisida muzakiriler élip bérilidighanliqini bayan qilip ötti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.