Erebler dunyasining kélechiki qandaq bolmaqchi?

Tehlilchilerge köre, ereb ellirini omumyüzlük chong bir siyasiy özgirishler kütmekte iken.
Ixtiyariy muxbirimiz ömerjan
2013.01.25
misir-namayish-2011-yili-305.jpg Misir xelqi tahrir merkizide dölet bayriqini kötürüp hökümitige qarshi namayish qildi. 2011-Yili 4-féwral.
AFP


Ularning éytishiche, hazir ereb dunyasining her qaysi jaylirida köp özgirishler bolmaqta we yene nurghun özgirishler kütülmekte. Bu özgirishlerning bezisi ijabi we bezisi selbi bolghan halda dawam qilmaqta. Ijabi bolghini misir, tunis, yemen we liwiye qatarliq döletlerde sabiq diktatorlarning ornigha, démokratik halda xelq teripidin saylan'ghan dölet bashliqlirining chiqqanliqi, selbi bolghan teripi süriye, iraq qatarliq döletlerdiki diktatorluqning dawam qiliwatqanliqi iken.

Se'udi erebistanida chiqidighan “Okaz” gézitining 2013 - yili21 - yanwar künidiki sanida, yazghuchi imaduddin edibning qelimi bilen bir maqale élan qilin'ghan bolup, maqalide mundaq dep yézilghan:“Hazir ereb dunyasida, jawabtin köprek so'allar, ümidtin köprek qorqunch, ishenchtin köprek ikkilinishler, ghelibidin köprek meghlubiyet, birliktin koprek tepriqichilik, eqildin köprek qaramliq, hékmettin köprek eqilsizliq dewr sürmekte. Bu sewebtin ereb dunyasining yéqin kélechikidin xushxewer kütkili bolmaydu.

Emma, ereb dunyasining yiraq kélechiki heqqide söz achidighan bolsaq, bu jaylarda yiraq kélechekte diktatorluqning ornini démokratiye, hakimmutleqliqning ornini ortaq kéngesh alidighanliqida shek yoq. Lékin shu yiraq kélechekke yétip bolghiche kimler qélip, kimler kétidu, bu teripini allah ta'aladin bashqa héchkim bilmeydu.”

Dunyaning eng köp qan tökülüwatqan yéri ereb dunyasidur

Maqalide yene mundaq dep yézilghan:“Epsuski, hazirqi waqitta eng köp qan tökülüwatqan we eng köp adem ölüwatqan jay ereb dunyasi bolup qalmaqta. Chünki, süriyidiki esed hakimiyitining qoralsiz xelqni urush ayropilanliri bilen bombilap öltürüshi kündilik normal ehwal qatarida bolup qalmaqta. Pelestinde bir pelestinlikning burni qanisa, derhal teshwiqat wasitiliri dunyagha tarqitip bolidu we isra'iliyige qarshi nepretler yaghidu. Emma teshwiqat wasitiliri her qanche qilsimu, süriyidiki wehshiyliklerning qaysi birini anglitip bolsun? qaysibirini waqtida tonushturup bolsun? ölüwatqanlar birdin emes, belki top - top halda ölmekte. Yene epsuslinish bilen éytimizki, ereblerning bashqilar bilen urushup ölgen ademliridin öz arisida, ereb bilen ereb urushup ölgen ademlirining sani 6 hesse köp bolmaqta. Munu so'allar ereb dunyasida otturigha qoyulmaqta: hamas bilen fetih qachan birlishidu? liwandiki hizbullachilar süriyige arilishishtin qachan waz kéchidu? iran süriyige esker ewetishni qachan toxtitidu? ereb hakimiyetliri bashqilar bilen kéngiship ish körüshni qachan öginidu? ereb döletliri telim - terbiye ishlirini qachan tereqqiy qilduridu? ereb siyasetchiliri sözdin köprek ishqa ehmiyet bérishni qachan öginidu?”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.