Erkin aliptékin ependi dolqun eysaning mukapatlan'ghanliqini qutlidi

Bu yil 30 - mart d u q ijra'iye mudiri dolqun eysa amérika “Kommunizm qurbanliri wexpisi” ning “Truman - régan erkinlik médali” gha érishken idi. Bu munasiwet bilen péshqedem siyasiyon erkin eysa ependi myunxén shehiride pa'aliyet uyushturup, dolqun eysani kütüwalghan we uning mukapat alghanliqini tebrikligen.

10 - Aprél küni myunxéndiki “Teklimakan Uyghur réstorani” ayrimxanisida erkin aliptékin ependi teripidin uyushturulghan tebriklesh sorunigha myunxéndiki chonglar meshripi ehli we ularning xanimliri hemde bir qisim chet dölet we sheherlerdin kelgen Uyghurlar qatnashti.

Sorunda Uyghur jama'iti wekilliri dolqun eysaning bu mukapatqa érishkenlikini bes - beste tebrikleshti hemde özlirining yürek sözlirini hayajan bilen ipade qilishti. Sorun bashtin - axiri nahayiti qizghin keypiyatqa toldi.

Méhmanlar huzurigha Uyghurche ta'amlar tartilip bolun'ghandin kéyin, aldi bilen sorun sahibi erkin aliptékin ependi söz élip, Uyghurlar namidin dolqun eysani yene bir qétim qutlidi.

Yawropa sherqiy türkistan birliki teshkilatining re'isi enwerjan ependi, dolqun eysa érishken bu mukapatning siyasiy ehmiyitige yuqiri baha berdi. Awstraliyedin kélip méhman süpitide bu sorun'gha qatnashqan bir xanimmu, özining yürek sözlirini köz yashliri bilen bayan qildi.

Myunxéndiki jama'et erbabi, chonglar meshripining qazisi ablimit tursun ependi ötmüshni yadigha élip, dolqun eysa bilen birge ötküzgen aliy mektep hayatidiki turmush kartinilirini eslep ötti hemde sepdishi érishken bu mukapatni qizghin qutlidi.

Gérmaniye Uyghur ayalliri jem'iyitining re'isi gülnar xanimmu bu munasiwet bilen pikir bayan qilip, dolqun eysaning muhajirettiki Uyghur milliy herikiti üchün qoshqan töhpisini mu'eyyenleshtürdi.

Dolqun eysa sheripige uyushturulghan bu sorun chüshtin kéyin sa'et ikkide bashlinip, kech sa'et yettigiche dawam qildi. Sorun ehli qizghin külke - chaqchaqlar bilen xushalliqlirini öz - ara ortaqlashti.

Uyghur ziyaliysi perhat muhemmidi ependi arida söz élip, bu mukapatning barliq Uyghurlarni xushal qilghanliqini eskertti. Gérmaniyediki Uyghur ziyaliysi ilyar ependimu ziyapet esnasida öz qarashlirini bayan qilip ötti. Uyghur ziyaliysi peride xanimmu dolqun eysa érishken bu mukapatqa bolghan bahalirini otturigha qoydi.

Axirida dolqun eysa ependi özining qollighuchilirigha bolghan rehmitini bildürdi we bu sherepning pütkül Uyghur millitige mensupluqini tekitlidi.