Erkin alptékin : türk jumhuriyetlirining Uyghurlarni térrorchi dep eyiblesh huquqi yoq

Türkiye asya istratégiye tetqiqat merkizi oyushturghan 3 - nöwetlik türk dunyasi munbirige 60 etrapida dölettin kelgen üniwérsitét oqutquchiliri, herqaysi döletlerning munasiwetlik rehberliri, diplomatlar, zhurnalistlar, ammiwiy teshkilat mes'ulliri we jama'et erbapliridin bolup 300 etrapida kishi qatnashmaqta.

Sherqiy türkistan ammiwiy teshkilatlirining mes'ullirimu teklip qilin'ghan bu yighin'gha d u q sabiq re'isi erkin alptékinmu qatnashqan bolup, u yighin jeryanida ottura asya türkiy jumhuriyetliri we bashqa aptonom rayonlardin kelgen wekillerge Uyghurlarning hazirqi weziyiti toghrisida melumat bergen.

Erkin alptékin yighinda qilghan sözide türk jumhuriyetlirining Uyghurlarni térrorrchi dep eyiblesh huquqi yoqluqini bayan qilip mundaq dégen: “Xitay 60 yildin béri Uyghurlarni assimiliyatsiye qilip yoqitish siyasiti élip bériwatidu. Bügünki kün'ge kelgende bu téximu kücheydi. Uyghurlar bolsa qozghilip ölüsh yaki assimiliyatsiye bolup tügesh yolidin, mundaqche qilip éytqanda, " yétip ölgüche étip öl " dep étip ölüshni tallawatidu. Xitay bolsa bu Uyghurlargha térrorchi dep qalpaq kéydürüwatidu. Siler qérindash türkiy jumhuriyetler xitay dölitige oxshash bularni térrorchi dep eyiblimenglar. Uyghurlarni térrorrchi déyish hoquqinglar yoq.”

Yighin her yili bir qétim ötküzülidighan bolup, bu yilqi yighinda nuqtiliq halda türk dunyasining sayahet mesilisi bilen ezerbeyjan - ermeniye mesilisi toghrisida muzakire élip bérilidiken. Bularning sirtida türk dunyasidiki mesililer toghrisidimu muzakire élip bérilidiken.