D u q ning mu'awin re'isi erkin ekrem türkiyediki ikki chong ammiwi teshkilatni ziyaret qildi

Ixtiyariy muxbirimiz erkin tarim
2017.12.09
Share on WhatsApp
Share on WhatsApp
Erkin-Ekrem-Oljay-Kilawuz-1.JPG Dunya Uyghur qurultiyining mu'awin re'isi erkin ekrem ependi türkiyediki “Ülkü ojaqliri” teshkilatining re'isi oljay kilawuz ependi bilen birge. 2017-Yili 8-dékabir, türkiye.
RFA/Erkin Tarim

Dunya Uyghur qurultiyining re'isi dolqun eysa ependining teklipi boyiche 6-we 8-dékabir künliri d u q ning mu'awin re'isi doktor erkin ekrem ependi türkiyening eng chong ammiwi teshkilatliridin “Türkiye kamu-sen” yeni “Türkiye kadirlar uyushmisi” bilen “Ülkü ojaqliri” teshkilatini ziyaret qildi. Ziyaret jeryanida u d u q ning yéqinda ötküzülgen yéngi saylimi, kelgüsi xizmet pilanliri shuningdek türk ammiwi teshkilatliri bilen bolghan dostane alaqiliri toghrisida melumat berdi.

Mu'awin re'is erkin ekrem ependi 6-dékabir küni 450 ming ezasi bar, burundin tartip Uyghurlarni qollap kéliwatqan türkiye kadirlar uyushmisi re'isi isma'il qonjuq ependi bilen, 8-dékabir küni türkiyediki eng chong yashlar teshkilatining re'isi oljay kilawuz ependiler bilen ayrim-ayrim körüshüp, d u q namidin ulargha rehmet éytti.

Isma'il qonjuq ependi uchrishishtin kéyin jiddiy bir yighin'gha ishtirak qilidighan bolghachqa, so'alimizgha jawab bérishni kéyin'ge qaldurdi. 

“Ülkü ojaqliri” ning re'isi oljay kilawuz ependi öz teshkilatining dunyadiki eng chong yashlar teshkilatidin biri ikenlikini tekitlep, özlirining türk dunyasi shundaqla sherqiy türkistan üchün nurghun pa'aliyetlerni élip barghanliqini, bundin kéyinmu Uyghurlarni qollashni dawamlashturidighanliqini bildürdi. U mundaq dédi: “Men aldi bilen d u q ning yéngi rehberlik hey'itini tebrikleymen, mubarek bolsun. Bizge qandaq éhtiyajinglar chüshse uni qilishqa teyyar biz. Telipinglarni kütimiz. Biz dunyadiki eng chong yashlar teshkilati bolush süpitimiz bilen türk dunyasi üchün, jümlidin sherqiy türkistan üchün qolimizdin kelgen pa'aliyetni qiliwatimiz. Sherqiy türkistandiki zulum, bésim we ten jazalirini anglitidighan pa'aliyetlerni uyushturduq, bundin kéyinmu dawamlashturimiz. Bizning sherqiy türkistan'gha bolghan muhebbitimiz chongqur. Sherqiy türkistanliq qérindashlirimiz duchar boluwatqan zulumni dunyagha anglitish, bu dewa üchün xizmet qilish bizning qérindashliq we insaniy burchimiz.” 

Oljay kilawuz ependi xitayning sherqiy türkistanliqlargha yürgüzüwatqan bésim siyasitining insanliq qélipidin chiqqanliqini bayan qilip mundaq dédi: “Bügünki künde kishilerning diniy étiqadini, sayahet erkinlikini, ana tilida sözlishishi hoquqini cheklesh heqiqeten büyük bir palaket hésablinidu. Bu tarixqa insan qélipidin chiqqan bir siyaset süpitide yézilidu. Xitayning bu siyasitini qobul qilghili bolmaydu. Biz xitayni qattiq eyibleymiz. Biz xitaydin derhal bundaq insanliq qélipidin chiqqan siyasitini toxtitishini telep qilimiz. 10-Dékabir küni yéqinliship qalghan bügünki künde xitayni kishilik hoquqqa hörmet qilishini, bésiwalghan zémindin chiqip kétishini telep qilimen.” 

Uchrishish axirlashqandin kéyin mikrofonimizni d u q ning mu'awin re'isi, doktor erkin ekremge uzattuq. U, bu ikki teshkilatning türkiyening pütün wilayetliride shöbisi barliqini, türkiyede küchlük ammiwi asasqa ige ikenlikini bildürdi. 

U yene mezkur ikki teshkilat re'islirining d u q qa maddiy we meniwi jehettin yardem qilidighanliqini éytqanliqini bayan qildi.

D u q 11-ayning 10-künidin 13-künigiche gérmaniyening myunxén shehiride 6-nöwetlik pewqul'adde wekiller qurultiyi chaqirip, yéngidin rehberlirini saylap chiqqan idi. Türkiyedin doktor erkin ekrem mu'awin re'islikke saylan'ghan idi. Doktor erkin ekrem ependi qurultaydin kéyin birinchi basquchta türkiyediki ammiwi teshkilatlarning rehberliri bilen ikkinchi basquchta siyasiy partiyeler bilen uchrishidighanliqini bayan qildi.

Türkiye-xitay munasiwiti künsayin kücheymekte. Bundaq bir shara'itta Uyghur dewasini qandaq élip bérish kérek? doktor erkin ekrem ependi bundaq bir shara'itta türkiyening menpe'itinimu nezerde tutqan halda sherqiy türkistan mesilisini türkiyening kün tertipide tutup turushqa tirishidighanliqini bayan qildi.

Türkiye “Kamu-sen” yeni “Kadirlar uyushmisi” 450 ming ezasi bar eng chong ammiwi teshkilatlardin biri bolup, her yili Uyghur tarixidiki muhim künlerde xitay elchixanisi aldida namayish uyushturup kelmekte. “Ülkü ojaqliri” bolsa milletchi heriket partiyesining yashlar yachéykisi bolup, türkiyening 70 ke yéqin wilayitide shöbisi mewjut. Uzun yillardin béri Uyghurlargha izchil halda yardem qilip kéliwatqan teshkilatlardin biri.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.