Enqerede général memet riza békinni xatirilesh yighini ötküzüldi

Muxbirimiz erkin tarim
2015.02.17
memet-reza-bekin.jpg Général memet riza békin
RFA/Erkin Tarim


Türkiyening enqere shehiride sherqiy türkistan wexpining qurghuchi ezaliridin biri, Uyghur général merhum memet riza békinning wapat bolghanliqining 5 - yilliqi munasiwiti bilen xatirilesh pa'aliyiti ötküzüldi. 2 - Ayning 15 - küni ötküzülgen bu pa'aliyetke türkiye “Köngüllerde birlik wexpi” bash katipi birol doq ependi, sherqiy türkistan wexpi bashliqi eser saqa, mu'awin bashliqi abdulxemit awshar ependi we sherqiy türkistan wexpi bash katipi doktor ömer qul ependiler qatnashti we söz qildi.

Bu yighinni uyushturghan “Köngüllerde birlik wexpi”bash katipi, uzun yil türk dunyasigha mes'ul dölet ministirlirining meslihetchisi bolup wezipe ötigen birol doq ependi söz qilip, rehmetlik général memet riza békinning qabil bir diplomat ikenlikini, ömrining axirighiche héch qandaq bir waqitta aldinqi orun'gha chiqishni xalimighanliqi, sherqiy türkistan dewasini türkiyening milliy mesilige aylandurush üchün tirishqanliqini bildürdi.

Birol doq ependi sözide türk armiyeside généralliqqiche ösken memet riza békinning pénsiyege chiqqandin kéyinki, 30 yilliq hayatini sherqiy türkistan dewasigha atighanliqi, köp sanda Uyghur oqughuchi oqutushqa tope qoshqanliqini éytti. Birol doq ependi général memet riza békinning türkiye herbiy mektipini püttürüp, koriye urushigha qatnashqan, kéyin shimaliy atlantik ehdi teshkilatida türkiye wekili bolup xizmet ötigen birdin bir Uyghur ikenlikini, ömrining axirighiche Uyghurlar üchün xizmet qilghanliqini, Uyghurlarning uni hergiz unutmasliqi kéreklikini bayan qilip ötti.

Arqidin sherqiy türkistan wexpining mu'awin re'isi abdulxemit awshar ependi, bash katip ömer qul ependiler arqa arqidin söz qilip, général memet riza békinning ish - izliri we uning kishiliki toghrisida melumat berdi.

Merhum memet riza békin 1925 - yili xotende tughulghan. 9 Yash waqtida a'ilisi bilen birlikte wetinidin ayrilghan. U türkiye quruqluq armiye mektipini aliy netije bilen püttürgen. 1950 - Yillarda türkiye qoshunida koriye urushigha qatnashqan.

Merhum, amérika we gérmaniye qatarliq döletlerde türkiyining herbiy we istixbarat xizmetlirini ishligen. U shimali atlantik okyan ehdi teshkilatidimu wezipe ötigen. 1985 - Yili türkiye armiyisidin général unwani bilen pénsiyige chiqqan.

Merhum 1990 - yillardin kéyin sherqi türkistan milliy qurultiyi, sherqi türkistan wexpi qatarliq teshkilatlarda re'is, mu'awin re'is we pexriy re'is bolup wezipe ötigen.

Merhum bundin 5 yil burun türkiye waqti kech sa'et 8 din 35 minut ötkende enqerede köz yumghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.