Gérmaniyediki "Chonglar meshripi" heqqide tesiratlar

Ixtiyariy muxbirimiz ekrem
2016-02-09
Élxet
Pikir
Share
Print
Gérmaniyediki "Chonglar meshripi" soruni
Gérmaniyediki "Chonglar meshripi" soruni
RFA/Ekrem


Gérmaniyediki Uyghur jama'itining inkaslirigha köre, qurulghinigha 5 yil bolghan myunxén shehiridiki"Chonglar meshripi" yalghuz gérmaniyedila emes, yawrupadiki Uyghurlar merkezliship olturaqlashqan döletlerde Uyghur milliy kimlikini qoghdash, Uyghur exlaqini saqlash we Uyghur siyasiy mujadilisini qollash qatarliq jehetlerde öz tesiri hem rolini izchil jari qildurup kelmekte.

Ayda bir ötküzilidighan myunxén shehiridiki "Chonglar meshripi" aldinqi bir qanche yilda birqanche qétim meshrep kölimini kéngeytip, xelq'araliq chong meshrepler uyushturup, herqaysi ellerdiki Uyghur jama'itining qiziqishi we alqishigha érishken idi. Axirqi qétim 2015 - yili 22 - awghust gérmaniyening karlisruhi shehiride ötküzülgen chong meshrepke amérika, awstraliye, yaponiye, türkiye, gérmaniye, en'giliye, norwigiye, shiwétsiye, gollandiye, fransiye qatarliq köpligen ellerdin teklip qilin'ghan méhmanlar, siyasiy pa'aliyetchiler qatniship köp xursen bolghan we memnuniyetlirini ipadileshken idi.

Bu yil yazda yene kölimi téximu zor bolghan xelq'araliq bir meshrep ötküzüsh pilanlanmaqta.

6 - Féwral küni myunxén shehiridiki teklimakan Uyghur réstorani ayrimxanisida "Chonglar meshripi" bolup ötti. Bu meshrepke Uyghur siyasiy zatliridin erkin aliptékin ependimu teklip bilen qatnashti. Amérika we shiwétsariyedin kelgen méhmanlarmu daxil boldi. Meshrepte bu yil yazda ötküzilidighan xelq'araliq chong meshrepning pilanliri tilgha élindi. Myunxéndiki "Chonglar meshripi" ning qazisi ablimit tursun ependi qurulghinigha 5 yil bolghan bu meshrepning oynawatqan roli toghrisida ziyaritimizni qobul qilghanda, meshrepning muhajirettiki musapirchiliq hayatqa bexish étiwatqan teselli we meniwiy ozuqlirining zorluqini tilgha aldi.

Meshrep esnasida, biz yene bu meshrepning "Pashshap"liq wezipisini zimmisige alghan Uyghur ziyaliysi iliyar ependining qarashlirini anglap öttuq. Shiwétsariyidin kélip bu meshrepke qatnishiwatqan Uyghur ziyaliysi qeyser ependimu bu heqte öz tesiratlirini bayan qilip ötti. Gérmaniyening karlisruhi shehiridin kélip bu meshrepke qatnashqan Uyghur ziyaliysi eniwer ependimu pikrini ipade qildi.

Toluq bet