Myunxén térrorluq hujumi heqqidiki eng yéngi melumatlar

Myunxén shehirining saqchi qoralliq hujum meydanida

22 - Iyul myunxénda yüz bergen térrorluq hujumida 10 adem ölüp, 27 adem yarilan'ghan, weqeni 18 yashliq iran nesillik bir gérman puqrasi sadir qilghan, u weqedin kéyin ölgen.

Myunxén shehirining saqchi bashliqi hubertus andréning bügün seher bergen melumatigha asaslan'ghanda, 22 - iyul kech sa'et 6:35 minut ötkende sheher merkizidin 7kilométir yiraqliqtiki olumpiya soda merkizide yüz bergen hujum weqeside qatilni öz ichige alghan halda ilgiri - kéyin 10 adem ölgen 27 adem yarilan'ghan 11 ademning yarisi éghir. Weqe sadir qilghuchi 18 yashliq iran nesillik yash, weqedin kéyin özini öltürüwalghan. Uning néme üchün bundaq bir weqeni sadir qilghanliqi toghrisida héchqandaq yip uchi yoq.

RFA/Ekrem

Bu weqe pütün gérmaniyeni lerzige saldi. Myunxén shehiride 22 - iyun kech sa'et 6:35 din bashlap yérim kéchigiche éghir wehime peyda qildi. Qanche 10 minglighan puqra qamilip qaldi. Minglarche saqchidin sirt, mexsus térrorgha qarshi turush organliri, qoralliq küchler, ot öchürüsh etriti, doxturlar, hökümet xadimliri weqeni bésiqturush, qatillarni tutushqa seperwer qilindi. Sheherning pütün qatnash liniyiliri qamal qilinip, merkezdiki onminglighan adem awarichiliklerge uchridi. Saqchi terep weqe yüz bérip 3 sa'ettin kéyin “Wehshiy térrorluq hujumi” dep atighan bolsimu, bu weqeni kimning sadir qilghanliqi békitilgendin kéyin, bügün bu geplerni qayturuwaldi.

Saqchi terepning bildürüshiche, myunxén shehiridiki éghir wehimige 18 yashliq iran nesillik bir yashning hujum weqesi seweb bolush bilen birge, yamini saqchi terepke yetküzülgen xata melumatlar seweb bolghan. Saqchi terep puqralardin mundaq 3 türlük xata uchurni tapshurup alghan: 1 - xata uchur, “Qatillar jem'iy 3 kishi. Uzun stolluq qorallar bilen qorallinip kishilerni oqqa tutti.” 2 - xata uchur, “Meryem meydani, stahus meydanlirida térrorluq hujumi yüz bermekte.” 3 - xata uchur, “Merkizi wogzal etrapida qoralliq étishish boldi.”

Melum bolushiche, mana bu xata uchurlar 4 - xataliqning kélip chishigha seweb boldi. Saqchilar jinayetchilerning qéchip ketkenlikini, izdewatqanliqini élan qildi. Buning bilen, yene bir jayda weqe yüz bérish éhtimalliqi otturigha chiqip, weziyet jiddiyliship ketti.

“N24” we “Jenubiy gérmaniye téléwiziyesi” qatarliq qanallarning bügünki melumatlirida tilgha élinishiche, özlirini “Neq meydanni közi bilen kögen guwahchi” qilip tonushturghan kishilerning bergen bu xata uchurliri myunxén shehiridiki pütün hakimiyet qoralliq küchlirini qozghapla qalmastin, qoshna ölkilerdinmu yardemchi küchlerni yötkeshke seweb bolghan. Sheherni 5 sa'ettin artuq wehime qaplighan. Bolupmu, adem déngizi örkeshleydighan, sheherning qaynaq soda merkizi bolghan meryem meydani, stahus meydani hemde merkizi poyiz istansisi etrapida térror hujumining mewjutluqi heqqidiki xata melumat, sheherning pütün qatnashlirini üzüp, qanche onminglighan kishining soda sarayliri, idare - organlar, réstoranlar qatarliq jaylargha qéchip kirip panahlinishini keltürüp chiqarghan. Hökümet da'iriliri asasiy küchlirini mushu jaylargha merkezleshtürgen. Chünki, bu jaylarda weqe yüz berse, ölüm - yétim hadisiliri téximu éghir bolu'ishi mumkin idi. Saqchilarmu téléwizorlarda toxtimay kishilerni kochilarni terk étishke, öyliridin chiqmasliqqa dewet qilip, endishini yuqiri pellige kötürgen.

RFA/Ekrem

Myunxén sheher merkizidiki d u q xizmet binasi, teklimakan Uyghur réstorani, qeshqer réstorani, tengritagh réstorani qatarliq jaylarmu 22 - iyuldiki bu wehimining tesirige uchridi.

Bügün ziyaritimizni qobul qilghan d u q bash katipi dolqun eysa ependi 22 - iyul kech bir top kishilerning oq awazliridin ürküp, qurultay ishxanisigha qéchip kirgenlikini, taki saqchi terep weqening bésiqqanliqini bildürgüche d u q binasida panahlinip turghanliqini bildürdi.

Merkizi poyiz istansisi yénidiki “Teklimakan Uyghur réstorani” ning xojayini reyhan xanimmu 22 - iyul kech nurghun kishining bu réstoranda panahlan'ghanliqini tilgha aldi.

Merkizi poyiz istansisigha yéqin bolghan “Qeshqer Uyghur réstorani” xojayini gheyret ependimu, 22 - iyul kech bu réstoranning köpligen kishilerge panahgah bolghanliqini bayan qildi.

“Tengritagh Uyghur réstorani” xojayini gülnar xanim ziyaritimizni qobul qilghanda, weqe heqqide özlirining körgen - bilgenlirini sözlep berdi.

Netije étibari bilen, bu qétimqi weqening birla orunda yüz bergenliki, birla kishining sadir qilghanliqi, her xil axbarat wasitiliride tünügündin béri tilgha élin'ghan nurghun melumatlarning xataliqi bügün ashkarilandi. Weqede Uyghurlarning ziyankeshlikke uchrighanliqi heqqide héchqandaq uchur yoq. Myunxén shehiride normal hayat eslige keldi.