Gollandiyede türkiy xelqler ezerbayjanliqlarning namayishigha qatnashti

2016 - Yili 7 - aprél gollandiyede yashawatqan türkiy sistémisidiki xelqler topliship, gollandiyening denhax shehirige jaylashqan erméniye bash konsulxanisi aldida namayish qildi.

Türlük lozunka we bayraqliri bilen Uyghur, türk, türkmen, noghay, tatar, qérim we ezerbeyjan qatarliq ellerni temsil qilghan namayishchilar ezerbeyjanning dölet shé'iri we milliy marshini oqudi. Ermenlerning qirghinchiliqlirini eyiblep sho'arlar towlidi, bayanatlar oqudi.

Shu jay waqti chüsh sa'et bir yérimdin ikki yérimghiche dawam qilghan bu pa'aliyetni gollandiye ezerbeyjan türk kültür jem'iyiti orunlashturghan bolup, mezkur jem'iyetning re'isi élxan ashqin ependi ziyaritimizni qobul qildi.

U aldi bilen, bügün bu yerge kélip özliri bilen bir septe bolghan türk sistémisidiki qérindashliri qatarida Uyghurlarghimu rehmet éytidighanliqini bildürüp öttti.

U mundaq dédi: “Ezerbeyjan bilen Uyghur türklirining mesilisi oxshashtur. Chünki Uyghurlar xitaylar teripidin, ezerbeyjan bolsa, rus we ermenler teripidin ishghal qilin'ghandur. Biz bir mush bolushimiz lazim. Bügün qarabagh azad bolsa, sherqiy türkistan azad bolur. Sherqiy türkistan azad bolsa, kerkök we türkmen ellirimu azad bolur. Türkning küchini we türkning birlikini körsitidighan peyt keldi. Sherqiy türkistanliq qérindashlirimiz qorqup qalmisun, ularning arqisida milyonlarche türk dunyasi bardur. Biz gollandiyede élip bériwatqan türlük pa'aliyetlirimizde, herqachan Uyghur qérindashlirimizning yénida bolduq we yene bolimiz” dédi.

U yene ermenler bilen ezerbeyjanliqlar arisidiki ziddiyetlerning sewebi heqqide toxtilip mundaq dédi: “1837 - Yili ‛türkmen chéyi kélishimi‚ de ezerbeyjan epsus ikkige böliwétildi. ‛jenubiy ezerbeyjan‚ we ‛shimaliy ezerbeyjan‚. Xuddi sherqiy türkistan'gha oxshash. Qarabagh bizning tupraqlirimizdur. Süriyedin, irandin we türkiyedin kelgen ermenlerni stalin qarabaghqa yerleshtürdi. Biz ularni qoynimizgha alduq. Méhman qilip, öylirimizning ishikini achtuq. Emma, ular kéyin bizni özimizning tupraqliridin siqip chiqarmaqchi boldi.”

Bu namayishqa ishtirak qilghan Uyghurlardin gollandiye Uyghur birliki mes'uli sadiqjan seley ependimu bu munasiwet bilen ziyaritimiz qobul qilip: “Biz Uyghur xelqimu zulumgha uchrighuchi bir xelq bolghanliqimiz üchün, zulumgha qarshi mezlum ezerbeyjanliq qérindashlirimizning yénida bolduq. Biz yalghuz emes.” dédi.

Yawropa sherqiy türkistan ma'arip jem'iyitining mes'ulliridin iysa qarajimmu ezerbeyjan xelqining teqdir - qismetliri heqqide toxtilip ötti we ularning küresh yollirida tölewatqan bedelliridin ders élishqa tégishlik tereplirini bayan qildi.