Gollandiye we gérmaniyide ikki jumhuriyet xatirilendi

Her qaysi ellerdiki Uyghurlargha oxshashla 12 - noyabir küni gollandiye, 10 - noyabir küni gérmaniyidiki Uyghurlar 1933 - we 1944 - yilliri qurulghan ikki jumhuriyetni xatirilesh pa'aliyetlirini ötküzdi.

Gérmaniyide 10 - noyabir ötküzülgen ikki jumhuriyetni xatirilesh pa'aliyitini yawrupa sherqiy türkistan birliki teshkilati uyushturghan bolup, teshkilat re'isi enwerjan ependining bildürishiche, pa'aliyet d u q ning merkizi xizmet binasida ikki sa'ettin artuq dawamlashqan. Pa'aliyette ikki jumhuriyetning tarixi, musteqilliq üchün janlirini qurban qilghan shéhidlarning kechmishliri eslep ötülgen hemde du'a - tilawetler qilin'ghan.

12 - Noyabir küni gollandiye Uyghurliri gollandiye Uyghur birliki teshkilatining sahipxanliqida özliri yéngidin achqan “Uyghur medeniyet öyi” de ikki jumhuriyetni xatirilesh pa'aliyiti ötküzgen. Teshkilat mes'ullirining eskertishiche, bu pa'aliyet besh sa'ettin artuq dawamlashqan bolup, pa'aliyette ikki jumhuriyetke da'ir köpligen témilar otturigha qoyulghan we ötmüshtiki shanliq tarix yene bir qétim eslep ötülgen. Bu sorun'gha daxil bolghan gollandiyidiki Uyghurlardin tursunjan ependi ziyaritimizni qobul qilip, tesiratini bildürüp ötti. Gollandiye Uyghur birliki teshkilati rehberlidin gheyret ependi bolsa pa'aliyet zalining ikki jumhuriyetke da'ir tam resimliri bilen bézelgenlikini tilgha aldi.

Tursunjan ependining bildürishiche, gollandiye Uyghurliri gollandiye Uyghur birliki teshkilatining yéngi bir saylimigha teyyarliq qiliwatqan bolup, démokratik shekilde élip bérilidighan bu saylamgha weten - millet söygüsi bolghan, gollandiyide xelqning hörmet we ishenchini qazan'ghan herqandaq Uyghur özini namzat qilip körsetse bolidiken.

Gollandiye Uyghur birliki teshkilati mesulliridin gheyret ependining éytishiche, nöwette gollandiyidiki Uyghurlar üchün xushallinarliq yéngiliqlardin birsi “Uyghur medeniyet öyi” ning dunyagha kélishi bolup, gollandiyidiki Uyghurlar bundin kéyin özlirining siyasiy, ijtima'iy, medeniy pa'aliyetlirini bu yerde qanat yaydurush imkanlirigha érishidiken.

Gérmaniye we gollandiyide ikki jumhuriyetni xatirilesh pa'aliyetliri bolup ötkenliki hemde gollandiyide yéngidin “Uyghur medeniyet öyi” ning qurulghanliqigha da'ir uchurni diqqitinglargha sunduq.