Gollandiye jama'iti musibetlik a'ilini yalghuz qoymidi

Bir nechche yil ilgiri gollandiyede qurulghan yawropa sherqiy türkistan ma'arip jem'iyiti köpinche pa'aliyetliride mezkur dölettiki Uyghur jama'iti yoluqqan we yoluquwatqan mesililerni muzakire qilip kelmekte.

Teshkilat 6 - séntebir gollandiyening zeyst shehiride ötküzgen “Ayliq söhbet pa'aliyiti” ni ötken hepte gollandiyede wapat bolghan bir Uyghur merhumning axiretlik ishlirini qandaq bir terep qilishqa qaratqan. Pa'aliyette yene diniy mezmundiki söhbet we léksiyeler ötküzülgen.

Bu ishtin tolimu tesirlen'genlikini bildürgen musibet igisi gollandiyediki Uyghur jama'itige rehmet éytti.

Teshkilat ilgiriki programmilirida intérnétta soda qilish bilimliri, qanun asasliri qatarliq témilarda mexsus léksiyilerni uyushturghan idi.

Munire xanim 2015 - yili 4 - séntebir jüme küni kech gollandiyening almire shehiridiki bir doxturxanida alemdin ötken idi.

Melum bolushiche, bu gollandiyede wapat bolghan chonglarning tunjisi bolup, ilgiri kichik balilardin bir qanchisi wapat tapqan we layiqida depne qilin'ghan. Emma, chonglar ichide hazirghiche ölüm - yétim ishliri körülmigen idi. Melum sewebler tüpeylidin bu merhumning yerlikke qoyulushi üchün hazirlan'ghan yerning 6500 yawroluq chiqimi, tunji musibettin qayghulan'ghan we hésdashliq tuyghusi urghughan wetendashlarning qizghin yardemlishishi netijiside toplan'ghan.

Bu ish seweblik ittipaqlishalighanliqidin rohlan'ghan sherqiy türkistanliqlar etisi merhumning depne qilinishigha hemdemde bolush pilani bilen xoshlashti.

Shundaq qilip yawropa sherqiy türkistan ma'arip jem'iyitining bu ayliq söhbet pa'aliyiti mol mezmunluq bir pa'aliyet bolup, mezkur orunning shert - shara'itidin rahet bir shekilde tamamlandi. Pa'aliyet axirida ziyaritimizni qobul qilghanlar pa'aliyettin alghan tesiratlirini, pa'aliyetning tepsilatini we musibetlik künliride wetendashlirining köyünüshige érishkenlikidin xursen bolghanlirini bayan qildi.

Islamiy qérindashliq tuyghusini kücheytish we chüshenchilirini chongqurlashturush meqsiti bilen bélgiyedin kelgen Uyghurlardin yene birimu, özining bu pa'aliyettin alghan tesiratini bayan qildi we tekrar körüshüsh ümidini anglatti.