Gollandiyediki xitay konsulxanisi aldida namayish ötküzüldi

2015 - Yili 14 - iyul gollandiyening paytexti denhax shehirige jaylashqan tayland bash konsulxanisi bilen xitay bash konsulxanisi aldida ilgiri - kéyin namayish we iptar pa'aliyiti élip bérildi.

Tayland konsulxanisi aldidiki namayishni gollandiye Uyghur birliki teshkilati uyushturdi.

Xitay bash konsulxanisi aldidiki namayish we iptar pa'aliyiti gollandiye Uyghur birliki, yawropa sherqiy türkistan ma'arip jem'iyiti we gollandiye türk fédératsiyesining hemkarliqida ötküzüldi.

Shu yer waqti kech sa'et 8 din 11 ge qeder dawam qilghan bu pa'aliyetke gollandiyediki noghay türkliri, iraq türkmenliri, ezerbeyjan türkliri we sherqiy türkistanliqlar bolup yüzlerche kishi ishtirak qildi.

Pa'aliyette yawropa sherqiy türkistan ma'arip jem'iyitining wekili isa sawut ependi bilen türk fédératsiyesining wekili murad gédik ependiler muhim söz qildi.

Iptardin ilgiriki namayishta ghezeplen'gen namayishchilar jarangliq sho'arlar towlidi we bayanatlar oqudi. Ay - yultuzluq kök bayraqlar arisida türk, türkmen we ezerbeyjanliqlarning bayraqlirimu birge lepildidi. Xitaylarning tajawuzchiliqliri, chektin ashqan zulumlirigha qarshi mezmunlar yézilghan plakat we lozunkilar qed kötürdi. Erler, xanim - qizlar we kichik balilarning hemmisi bashtin axiri bir hayajan bilen awaz qoshti.

Iptardin ilgiri pütün dunya musulmanliri qatarida sherqiy türkistanliqlarning zulumdin qutulup erkinlikke érishelishi üchün du'a - tilawetler qildi. Uyghur polusi bilen türk polusi iptarliq qilinip, namayishchilar sham namizidin kéyin qaytishti.

Bu 2009 - yildin buyanqi xitay konsulxanisi aldida élip bérilghan eng janliq we köp sanda kishiler qatnashqan bir pa'aliyet bolup qaldi.