«Үрүмчи ресторани» голландийәдә тәшвиқ қилинди

Ихтиярий мухбиримиз әкрәм
2017-09-08
Елхәт
Пикир
Share
Принт
Зәйнидин әпәнди ачқан «үрүмчи ресторани». Роттердам, голландийә.
Зәйнидин әпәнди ачқан «үрүмчи ресторани». Роттердам, голландийә.
RFA/Ekrem

Роттердамдики «үрүмчи ресторани» таамлири биләнла әмәс, уйғурчә сүпәтлири һәм миллий паалийәтлири билән голландийәдә тәшвиқат темиси болмақта.

Голландийәдики «хәлқ гезити» ториниң «үрүмчи ресторани» һәққидә ишлигән филиминиң қисқа бир көрүнүши 6-сентәбир елан қилинипла, иҗтимаий таратқуларда һәш-пәш дегүчә 47 миң кишиниң зияритигә улашти. Филимда уйғур допписи, уйғур таамлири тонуштурулған иди. Бу филим муһаҗирәттики уйғур җамаитиниң қизғин алқишлириға сазавәр болди.

«Үрүмчи ресторани» икки йил илгири голландийәниң роттердам шәһиридә уйғур зиялийси зәйнидин турсун әпәнди тәрипидин ечилған болуп, бу ресторан уйғур әтләслири, чимән доппа, бадам доппа вә уйғур чалғу өрнәклири билән безәлгән. Бу шәһәрдә аран 15 әтрапида уйғур аһалә яшайдикән. Пүтүн голландийәдики уйғурларниң сани тәхминән 2 миң әтрапида икән. Голландийәдә «голландийә шәрқий түркистан уйғур бирлики», «явропа шәрқий түркистан маарип җәмийити» қатарлиқ тәшкилатлар паалийәт елип баридикән.

Техи алдинқи айдила, зәйнидин әпәндиниң голландийәдики хәлқара кәчүрүм тәшкилатиниң бир қисим хадимлирини «үрүмчи ресторанида» да күтүвелип, бу йил 10-айниң 23-күни елип баридиған уйғурларға мунасивәтлик бир муһим йиғилишниң һазирлиқини қилишқанлиқлири торларда кәң тарқалған иди. Бүгүн болса, униң голландийәдә милйонларчә муштириси болған мәшһур гезитлиридин «хәлқ гезити» ниң тәшвиқат нишаниға айланғанлиқи көрүлди.Бу мунасивәт билән зияритимизни қобул қилған зәйнидин әпәнди өзиниң қисқичә кәчмишлири, «үрүмчи ресторани» ниң вәзийити, һәр йили давамлаштуруп келиватқан тарихий вәқәләрни әсләш паалийәтлири вә өзиниң ресторан хизмитидин сирт, хәлқара кәчүрүм тәшкилати билән бирлишип қиливатқан ишлиридин бизни вақипландурди.

Уйғур җамаитиниң диққитини тартқини «үрүмчи ресторани» дин бәкрәк, ресторан хоҗайини зәйнидин әпәндиниң сиясий паалийәтлири болди. Бу йил 23-июн күни, зәйнидин турсун әпәндиниң уйғур бүгүнки заман тарихида йүз бәргән ахирқи 4 чоң сиясий вәқәни хатириләш үчүн елип барған өзгичә паалийәтлири иҗтимаий таратқуларда охшашла қизғин қоллаш вә махташларға сазавәр болған иди.

Шу чағда у: «5-июл үрүмчи вәқәси» һәмдә «28-июл йәкән вәқәси» дин ибарәт хәлқарада зор тәсир пәйда қилған 4 чоң вәқә үчүн қанчә миң данә қизил әтиргүл сетивелип, роттердамдики хәлқ мәйданида бу төт вәқәниң йил хатирисини йүрәк шәклидики чәмбирәк ичигә елип аҗайип гүзәл бир мәнзирә һазирлиған вә бу арқилиқ голландийә хәлқи, дуня җамаитиниң сәмигә уйғур тарихидики қанлиқ қирғинчилиқлар билән толған бу кәчмишни салмақчи болған иди. Уйғур җамаити, иҗтимаий таратқуларда униң уйғурлар мәсилисини тонутуш үчүн қолланған бу өзгичә усулиға әйни чағда юқири баһалар беришкән һәмдә униң ғәйрәтлиригә апиринлар ейтишқан иди.

Зәйнидин турсун әпәндиниң аяли раһилә ханимму «үрүмчи ресторани» ниң хизмитидә ериға һәмкарлишиватқан болуп, у зәйнидин әпәндиниң вәтән дәваси йолида елип бериватқан паалийәтлирини йеқиндин қоллайдиғанлиқини билдүрди.

Зәйнидин турсун әпәнди өз вақтида йәнә хәлқара кәчүрүм тәшкилатиниң әзаси болған болуп, у мәзкур тәшкилат билән бирлишип уйғур дәвасини голландийәдә тонутушқа теришип кәлгән. У бу йил 23-өктәбир күни өз ресторанида хәлқара кәчүрүм тәшкилати билән бирликтә «уйғур күни» паалийити өткүзүп, түрмидики өктичи уйғур зиялийси илһам тохти мәсилисини күнтәртипкә әкелишкә теришидикән.

Аяли раһилә ханим болса, зәйнидин әпәндиниң вәтәнниң хизмити йолида көплигән яхши арзулири барлиқини, өзиниң чаминиң йетишичә яр-йөләктә болидиғанлиқини баян қилди.

Пикирләр (0)
Share
Толуқ бәт