Елдос ғәйрәт: "мән нахшам билән уйғурларниң авазини явропаға аңлаттим!"

Мухбиримиз қутлан
2015-11-11
Share
eldos-gheyret-naxsha-norwegiye.png Яш нахшичи елдос ғәйрәт норвегийә "талант сәһниси" дә нахша орунлимақта
RFA/Qutlan


"мән нахшилирим билән уйғурларниң авазини, уйғурларниң кимликини вә уйғур тилини явропаға аңлаттим. Норвегийәдики миңларчә маһирлар арисидин таллинип 2015 - йиллиқ норвегийә талант мунбириниң йерим һәл қилғуч мусабиқисигә қатнишиш салаһийитигә ериштим. 11 - Айниң 13 - күни йерим һәл қилғуч мусабиқигә талланған 54 маһир нәқ мәйданда өз маһарәтлирини йәнә бир қетим көрситиду. Мән пүтүн дунядики уйғур қериндашларниң икки минут вақтини чиқирип нахшамға һәмбәһр болушини вә мениң үчүн аваз беришини үмид қилимән!..."

Яш нахшичи елдос ғәйрәт радийомиз зияритини қобул қилғанда йоқириқи баянлар билән өз сөзини башлиди.

У өзиниң биринчи қетим норвегийәдики "талант сәһниси" маһарәт көрситиш мусабиқисигә қатнашқан чағда толиму җиддийләшкәнликини, әмма кейинчә өзидә ишәнч һасил қилғанлиқини билдүрди.

У өзиниң норвегийәдики "талант сәһниси" дә орундиған "юртум" вә "ана" қатарлиқ нахшилири һәққидә тохтилип мундақ деди:

"бу нахшиларни мән кичик чағлиримда вәтәндә аңлиған вә хатирәмдә сақлап кәлгән идим. Бу нахшиларни әйни чағдики аммибаб нахша ейтидиған яш чолпанлар орунлиған иди. Мән норвегийәгә кәлгәндин кейин бу нахшиларни явропаниң сәнәт муһитиға маслаштуруп, текист вә мелодийә җәһәттин мәлум дәриҗидә өзгәртиш елип бардим. Нахша текистини һәм норвиш тилида һәм уйғур тилида арилаштуруп ейтиштәк бир услубни талливалдим. Алдинқи бирқанчә қетимлиқ сәһнә маһаритимдә буниң үнүмини һес қилдим. Нахша текистлирини норвиш тилиға тәрҗимә қилишта һәм норвегийәлик тил оқутқучилирим һәм уйғур қериндашлирим көп ярдәмдә болди."

Елдос зияритимиз җәрянида йәнә мунуларни илгири сүрди:

"мән һәр қетим норвегийә сәһнисидә нахша орунлиған чеғимда баһалиғучилар билән тамашабинларниң мениң кимликимгә қизиқидиғанлиқини һес қилдим. Һелиму есимдә, дәсләпки қетимлиқ маһарәт көрситиш сәһнилиридә улар мәндин қайси әлдин кәлгәнликим вә қандақ тилда сөзләйдиғанлиқимни көп сориди. Мәнму наһайити иптихарлиқ билән: "мән шәрқий түркистандин кәлдим. Мән уйғур һәм уйғур тилида сөзләймән!" дегән чүшәнчиләрни бәрдим. Өзүмму сәһнигә канвай көйнәк кийип чиқтим. Һазир норвегийәдики көплигән тамашабинлар нахшам арқилиқ һәм мени һәм уйғур миллитини чүшиниш имканийитигә еришти."

Ахирида елдос бизниң "йерим һәл қилғуч мусабиқигә бирқанчә күнла қалған мушу пәйттә өзиңизни қандақ һес қиливатисиз, җиддийлишиватамсиз?" дегән соалимизға мундақ җаваб бәрди:

"бирқанчә күндин буян пүтүн дунядики уйғур җамаитидин һәр хил усул вә шәкилләрдики мәдәт бериш һәм қоллаш учурлирини тапшурувалдим. Улар телефон бериш, учур йоллаш яки фейсбук арқилиқ салам йоллаш арқилиқ мени қоллиди. Мән тонумайдиған шунчә көп ака - һәдилирим вә чоң - кичик уйғур қериндашлирим "арқаңда саңа тирәк болидиған биз бар" дәп мени роһий җәһәттин хатирҗәм қилди. Һәтта вәтән ичидинму көплигән қоллаш учурлирини тапшуривалдим. Мән мушу минутларда шунчә хатирҗәм һәм өзүмгә болған толуқ ишәнчни һес қиливатимән, чүнки мениң кәйнимдә мени қоллайдиған улуғ бир хәлқ турмақта. Хәлқимниң маңа бериватқан мәдәтлири барлиқ җиддийликлиримни йоқ қилип, өзүмгә болған ишәнчимни артқузмақта."

Тәпсилатини аваз улиништин аңлиғайсиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт