Ilham mahmut: yaponiyediki uchur wasitiliri arqiliq Uyghur mesilisini teshwiq qilimiz

Yaponiyede neshr qilinidighan “Metbu'atliri uchur ashkarilimaydighan xitay, koréye we shimaliy koréye” namliq siyasiy zhurnalning bu pesillik sanining muqawisigha xitay, koréye we shimaliy koréye rehberlirining süriti bérilgen.

Muqawining asti qismigha bolsa yaponiyediki Uyghur, tibet, mongghul we teywen qatarliqlarning teshkilatlirining mes'ullirining süritimu qoshup kirgüzülgen.

Muqawida yene “Yaponiye xeterlik”, “Xitay kompartiyisining 92 yilliq tajawuzchiliq tarixi” dégendek témilardiki maqalilerning serlewhesimu körsitilgen.

Mezkur zhurnalda Uyghur, tibet, mongghul we teywen qatarliqlarning yaponiyediki teshkilatlirining wekilliri bilen ötküzülgen söhbet xatirilirigimu orun bérilgen.

Zhurnalda yaponiyediki dunya Uyghur qurultiyining mu'awin re'isi ilham mahmut bilen ötküzülgen Uyghur jem'iyitide saqliniwatqan türlük ijtima'iy we siyasiy mesililer üstidiki etrapliq mulahize ‏- söhbet xatirisimu kirgüzülgen.

Tibetlerdin proféssor pima garpur ependi bilen ötküzülgen tibetlerning kelgüsi teqdiri we xitayning hazirqi tibette yürgüzüwatqan siyasetliri toghrisidiki söhbet xatirisi, undin bashqa mongghul teshkilatining wekili da'ichin bilen ötküzgen ichki mongghuldiki mongghullarning hazirqi siyasiy ehwali heqqidiki söhbet xatirisimu bérilgen.

Mezkur zhurnalda yene, yaponiyede közge körün'gen teywenlik obzorchi we yazghuchi xu'ang wénshung ependining teywenning teqdiri, xitay kompartiyisining teywen'ge qaratqan siyasetliri toghrisidiki tepsiliy siyasiy analizlirighimu orun bérilgen.

Biz bu munasiwet bilen, mezkur zhurnal teripidin orunlashturulghan söhbetke ishtirak qilghan, dunya Uyghur qurultiyining mu'awin re'isi ilham mahmut bilen téléfon söhbiti élip barduq.

Awaz ulinishidin tepsilatini anglang.