Уйғур вәкилләр мәккидә ислам дуняси аммиви тәшкилатлар бирлики алий кеңәш йиғиниға қатнашмақта

Мухбиримиз әркин тарим
2016.01.16
islam-ammiwiy-teshkilatlar-birliki.jpg Ислам дуняси аммивий тәшкилатлар бирлики гириби
RFA/Erkin Tarim

Ислам дунясиниң нурғун җайлирида, муқимсизлиқ, ички урушлар давамлишиватқан вә инсан һәқлири дәпсәндичилики наһайити еғир бир вәзийәттә туруватқан бүгүнки күндә мәркизи түркийәниң истанбул шәһиридә турушлуқ ислам дуняси аммиви тәшкилатлар бирлики сәуди әрәбистанниң мәккә шәһиридә ислам дуняси җәмийәтләр бирлики алий кеңәш йиғини чақирди. Мәзкур йиғинға дуняниң һәрқайси җайлирида паалийәт елип бериватқан мусулманлар қурған аммиви тәшкилат мәсуллири қатнишиватқан болуп, уйғур аммиви тәшкилатлириға вакалитән мәркизи истанбулда турушлуқ шәрқий түркистан маарип вә һәмкарлиқ җәмийитиниң рәиси һидайәтуллаһ оғузхан әпәнди қатнашмақта.

Биз мәккигә телефон қилип униң билән сөһбәт елип бардуқ.

Һидайәтуллаһ оғузхан әпәнди 2007 - йилидила шәрқий түркистан маарип вә һәмкарлиқ тәшкилатиниң ислам дуняси тәшкилатлар бирликигә әза болғанлиқини, һазирғичә бу тәшкилатниң пүтүн йиғинлириға қатнишип кәлгәнликини, бу йиғинлар арқилиқ уйғур мәсилисини ислам дунясиға наһайити яхши аңлаттуқ дәп қарайдиғанлиқини баян қилди.

У, бу йиғинниң оттура шәрқниң вәзийити интайин еғир болуватқан, ислам дунясиниң нурғун җайлирида ички уруш давамлишиватқан бүгүнки күндә бу мәсилиләр тоғрисида музакирә елип бериш мәқситидә чақирилғанлиқини, өзиниң мәзкур йиғинда уйғурлар дучар болуватқан сиясий, иқтисадий вә диний җәһәттики бесимларни аңлитидиғанлиқини баян қилди.

Ислам дуняси аммивий тәшкилатлар бирлики йиғинидин бир көрүнүш
Ислам дуняси аммивий тәшкилатлар бирлики йиғинидин бир көрүнүш

Һидайәтуллаһ оғузхан әпәнди йәнә ислам дуняси җәмийәтләр бирликиниң алий кеңәш йиғининиң сәуди әрәбистанниң мәккә шәһиридә 3 күн давамлишидиғанлиқини, йиғинда әрәб дөләтлири билән хитай дөлити оттурисидики мунасивәтләр тоғрисидиму музакириләр елип берилидиғанлиқини, қисқичә қилип ейтқанда йиғинниң уйғур дәваси үчүнму пайдилиқ болидиғанлиқини тәкитлиди.

Бу қетимқиси 20 - қетимлиқ алий кеңәш йиғини болуп, бурунқилири һәрқайси мусулман дөләтлиридә чақирилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.