“террорчиниң уйғурлар болуш еһтимали юқири” дегән баянатқа уйғурлар наразилиқ билдүрди

Ихтиярий мухбиримиз әркин тарим
2017.01.05
Share on WhatsApp
Share on WhatsApp
istanbul-terror-hujum.jpg Истанбулдики рейно рестораниға һуҗум қилған террорчи.
Socila Media

Бүгүн түркийә муавин баш министири вәйси қайнақ истанбулдики рейно рестораниға һуҗум қилған террорчиниң кимликиниң айдиңлишип болғанлиқини, уйғур болуш еһтималиниң юқири икәнликини елан қилди. Мәзкур баянаттин кейинла қәйсәридә паалийәт елип бериватқан шәрқий түркистан мәдәнийәт вә һәмкарлиқ тәшкилати рәиси баянат елан қилип наразилиқ билдүрди.

Мәзкур террорлуқ вәқәси йеңи йил кечиси йүз бәргән болуп, вәқәдә қолида аптомат көтүргән террорчи кәчлик кулубқа бесип кирип кулубтики йеңи йилни қутлуқлаватқанларни қара-қоюқ оққа тутқан. Йәттә минутчә бирқанчә қетим оқдан алмаштуруп, қирғинчилиқ елип барған террорчи, кейин қоралини ташлап вә кийимини алмаштуруп, бир таксиға чиқип кулубтин қачқан. Вәқәдә 12 си түрк, қалғанлири чәтәллик болуп 39 киши өлгән, 65 киши яриланған. 5 Күндин бери түркийә сақчилири мәзкур террорчини қолға чүшүрүш үчүн кәң көләмлик оператсийә елип бармақта. Хәвәрләрдин мәлум болушичә, түрк сақчилири истанбулниң зәйтинбурни, силиврә, сәфакөй районлирида, измир шәһириниң борнова вә қонақ районлирида көп сандики уйғурниң өйини ахтурған болуп, бәзи уйғурлар тутуп кетилип сораққа тартилғандин кейин қоюп берилгән болса, йәнә бәзилири һазирғичә сораққа тартилмақта.

Вәқә һәққидики хәвәр вә мулаһизиләрдә террорчиниң оттура асия түркий җумһурийәтлиридин кәлгән террорлуқ тәшкилати әзаси икәнлики тәкитлиниш билән бирликтә униң яхши тәрбийәләнгән мәргәнлики, тәмкинлики вә тәҗрибиликликиму хәвәрләрниң мәркизи болмақта. Һазирғичә берилгән түркийә хәвәрлиридә террорчиниң оттура асиялиқ икәнлики җәзмләштүрүлүш билән бирликтә, униң қирғиз, өзбек яки уйғур болуп қелиш еһтималлиқи илгири сүрүлмәктә.

Биз бу һәқтә көз қаришини игиләш үчүн түркийә истратегийәлик чүшәнчә институти мутәхәссиси доктор әркин әкрәм вә шәрқий түркистан мәдәнийәт вә һәмкарлиқ җәмийити рәиси сейит түмтүрк әпәнди, вә истанбулдики уйғур әрбаблиридин адил абдуғопур әпәндиләр билән сөһбәт елип бардуқ.

Сейит түмтүрк әпәнди бүгүн чүштә түркийә баш министир муавини вейси қайнақ әпәндиниң баянатини аңлиғандин кейинла ички ишлар министири сулайман сойлуға телефон қилип наразилиқ билдүргәнликини, арқидинла баянат елан қилғанлиқини вә баянатини түркийәдики “сөзҗү” гезитиниң торида елан қилинғанлиқини баян қилди.

Доктор әркин әкрәм әпәнди террорни бир милләт, бир дөләт вә мәлум бир қовимниң нами билән аташниң тоғра әмәсликини баян қилди.

Сейит түмтүрк әпәнди түркийәдики бәзи ахбарат васитилириниң вәқә йүз бәргән биринчи күндин етибарән, қәстән “шәрқий түркистанлиқ уйғур қилди” дегән сөзни тәкитләшкә тиришиватқанлиқини баян қилди.

Доктор әркин әкрәм әпәнди хитайдики ахбарат васитилиридики хәвәрләрдә бу вәқә йүзбәргәндин тартип уйғурларниң қилғанлиқи илгири сүрүлүватқанлиқи, әгәр бу қетимқи террорлуқ вәқәсини уйғур қилған болуп чиқса, түркийә-билән хитай оттурисидики террорлуққа қарши һәмкарлиқниң күчийиши мумкинлики һәм хитайниң бу пурсәттин яхши пайдилинидиғанлиқини баян қилди.

Малайшия вә тайланд арқилиқ түркийәгә келип олтурақлашқан уйғур адил абдуғопур әпәнди истанбулдики уйғурларниң намизини оқуп, тиҗаритини қилип нормал һаятини давамлаштуруватқанлиқини баян қилди.

“һүррийәт” гезитиниң бу һәқтики бир хәвиридә баян қилинишичә, түркийә сақчилири террорчиниң ким икәнликини ениқлап болған, әмма террорчи техи тутулмиған болғачқа ашкарилашни тоғра көрмигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.