Истанбулдики уйғур балилар йәслилиридә қишлиқ тәтил паалийити өткүзүлди

Ихтиярий мухбиримиз арслан
2016-01-25
Елхәт
Пикир
Share
Принт
Истанбулниң сәфакөй районидики уйғур балилар йәсилисидики паалийәтләрдин бир көрүнүш
Истанбулниң сәфакөй районидики уйғур балилар йәсилисидики паалийәтләрдин бир көрүнүш
RFA/Arslan

Истанбулниң сәфакөй вә зәйтинбурнудики уйғур балилар йәслилиридә 200 дин артуқ уйғур өсмүр оқуватқан болуп йеқинда қишлиқ тәтилгә қоюп берилди.

Мәркизи истанбулға җайлашқан шәрқий түркистан маарип вә һәмкарлиқ җәмийитиниң тәсис қилиши билән истанбулниң уйғурлар көп олтурақлашқан сафәкөй вә зәйтинбурну районлирида ечилған уйғур йәслилиридә оқуватқан 200 дин артуқ өсмүрләр үчүн 1 - айниң 22 - күни биринҗи мәвсүмлүк оқушни тамамлаш мунасивити билән мукапатлаш вә шаһадәт тарқитиш мурасими өткүзүлди вә қишлиқ тәтилгә қоюп берилди.

Истанбулниң сәфакөй районидики уйғур балилар йәсилисидики паалийәтләрдин бир көрүнүш
Истанбулниң сәфакөй районидики уйғур балилар йәсилисидики паалийәтләрдин бир көрүнүш Photo: RFA

Мурасимға өсмүрләрниң ата - анилириму тәклип қилинған болуп, өсмүрләр һәр хил шеир декламатсийә қилди, нахша оқуди вә үгәнгәнлиридин арийә тәқдим қилди.

Сәфакөйдики йәслидә 110 дин артуқ оқуғучи оқуватқан болуп, биз бу йәслиниң мудири рәнаханим билән сөһбәт елип бардуқ. Рәнаханим бу йәслидики өсмүрләрниң оқуш әһвали тоғрисида тохтилип, һазир уйғур йәсли қуран курсида 3 синип болуп буниңда 4 - 6 яш оттурисида җәмий 110 дин оқуғучи дәрс оқуватқанлиқини, булардин 37 нәпири түрк оқуғучи икәнликини қалғанлири уйғур пәрзәнтлири икәнликини билдүрди.

Рәнаханим уйғур йәслидә өгитиливатқан дәрсләр тоғрисида сөзләп бәрди, бу йәсилидә 4 - 6 яш оттурисидики өсмүрләр үчүн 2 йиллиқ дәрс оқуш пилан қилинған болуп, бу җәрянда, уйғур тили, математкидин санақлар, диний етиқад җәһәттә ислам диниға алақидар қисқа чүшәнчиләр, қуран кәрим, намаз оқуш қаидлири вә дуа қилиш шундақла миллий мәдәнийәт, өрп - адәт вә әхлақ дәрслири өгитилиштин сирт йәнә, рәсим сизиш, рәң вә шәкилләрни тонуш, зеһнини ачидиған оюнларни ойнаш қатарлиқ паалийәтләр елип берилидикән. Уйғур йәслидики өсмүрләрдин 7 яшқа тошқанлар башланғуч мәктәпләргә әвәтилидикән.

Биз бу йәслидә оқуватқан бир қисм өсмүрләр билән сөһбәт елип бардуқ. Буларниң көпинчиси диний дәрс вә қуран оқушни, намаз оқушни өгиниватқанлиқини, саяһәткә баридиғанлиқини, рәсим сизидиғанлиқини ипадиләшти.

Биз бир қисим уйғур өсмүрләр билән сөһбәт елип бардуқ. Бир уйғур өсмүр, чоң болғанда немә болисән дегән соалимизға: «чоң болсам анамға ярдәм қилимән» дәп җаваб бәрди.

Биз бу өсмүрләрниң анилири билән сөһбәт елип бардуқ. Оғлини уйғур йәслигә бәргән әлиф башиоғли исимлик түрк ханим, оғлини уйғур йәслигә бериштики асаслиқ сәвәбини аңлитип мундақ деди: «маңа бу йәслини башқилар тәвсийә қилди, мән пәрзәнтимниң диний тәлим елишини халаймән, шуниң үчүн буйәслигә бәрдим, мән бу йәслидин бәк мәмнун болдум, чүнки мениң оғлум һазир төт йерим йешида, әмма ислам дининиң асасий чүшәнчилирини өгәнди, өйгә кәлгәндә қуран оқуйду, дуа қилиду. Мән булардин бәк мәмнун болдум. Кейинки мәвсумдиму оғлум бу йәрдә оқушни давам қилиду. Бу йәслини ачқан вә йәслидә пәрзәнтлиримиз үчүн әҗир сиңдүргән пүтүн оқутқучиларға рәһмәт ейтимән.»

Биз йәнә деңиз алтунал исмлик бир ханимдин немә үчүн оғлини уйғур йәслигә беришни мувапиқ көргәнликини соридуқ. Деңиз ханим мундақ деди: «мениң оғлум бу йәслидә оқуватқили икки йил болди. Биз оғлимизни, аллаһни билсун, пәйғәмбәр әләйһиссаламни тонусун, динни үгәнсун дегән мәқсәттә бу йәслигә бәрдуқ. Биз оғлимизниң диний тәлим елиши, қуран оқуши вә пәйғәмбәр әләйһиссаламни билиши бизни бәк хушал қилиду. Оғлумға әҗир сиңдүргән, бу йәслини тәсис қилған вә бу йәрдики пүтүн оқутқучилардин аллаһ рази болсун дәймән. Мениң йәнә бир кчик оғлум бар. Униң йеши тошқанда йәнә мушу йәслигә беришни ойлаватимән. Пүтүн оқутқучиларға рәһмәт ейтимән.»

Зәйтинбурнудики уйғур йәслидә 100 дин артуқ өсмүр оқуйду

Истанбул зәйтинбурнудиму охшаш шәкилдә бир йәсли ечилған болуп бу йәсилидиму 1 - айниң 22 - күни оқуғучиларни мукапатлаш вә шаһадәт тарқитиш мурасими өткүзүлди вә қишлиқ тәтил үчүн қоюп берилди. Биз зәйтинбурнудики уйғур йәсилини зиярәт қилип йәслиниң мудири хуршидә ханим билән сөһбәт елип бардуқ.

Хуршидә ханим йәсли тоғрисида мәлумат берип мундақ деди: «зәйтинбурнудики уйғур йәсилидә бу мәвсум җәмий 100 оқуғучи тәрбийиләнгән болуп, уларниң арисида 88 нәпири уйғур пәрзәнти, қалғанлири түрк, қазақ вә өзбәк оқуғучилардин тәркип тапқан.

Уйғур йәслидә 21 - январ оқуғучиларниң анилири тәклип қилинип мурасим өткүзүлгән болуп, мурасимда қуран савадини чиқарған вә қуранни ядлап түгәткән оқуғучиларға айрим - айрим һалда шаһадәтнамә тарқитип берилгән. Барлиқ оқуғучиларға һәдийә тәқдим қилинған. Игилинишичә уйғур йәсилиләрдә йеңи мәвсумлуқ оқуш 2 - айниң 8 - күни башлинидикән.

Пикирләр (0)
Share
Толуқ бәт