Istanbuldiki nechche milyon kishi qatnashqan yighinda sherqiy türkistan bayriqi diqqet tartti

Ixtiyariy muxbirimiz arslan
2016-08-09
Élxet
Pikir
Share
Print
Istanbuldiki démokratiye we shéhitler yighini dégen namda chong yighin
Istanbuldiki démokratiye we shéhitler yighini dégen namda chong yighin
RFA/Arslan


Istanbul waliyiliqi we istanbul sheherlik hökümetning uyushturushi bilen 7 - awghust yekshenbe küni yéngiqapi sahil meydanida, démokratiye we shéhitler yighini dégen namda chong yighin ötküzüldi. Yighin'gha türkiyining oxshimighan sheherliridin nechche milyon kishi qatnashti. Yighin'gha istanbuldi'iki Uyghurlarmu qatnashqan bolup, meydanning her yéride sherqiy türkistan bayriqi lepildep kishilerning diqqitini tartti.

15 - Iyul küni kéchisi türkiyide yüz bergen herbiy özgirish isyani xelq teripidin basturulghandin kéyin, türkiye xelqi her éhtimalgha qarshi yene bir qétimliq toyuqsiz heriketning yüz bérishning aldini élish üchün her küni kéchiliri türkiyige ige chiqish, démokratiye we milliy iradige ige chiqish shu'ari astida kéchiliri uxlimay meydanlarda tang atquzup kelmekte.
2016-08-07-yenikapi-83.jpg
Yéngiqapi yighin meydani adem déngizigha aylan'ghan bolup, türk bayraqliri bilen meydanni qizil reng qaplap ketti.

Bu yighin'gha türkiye jumhuriyiti re'isi rejep tayyip erdughan, sabiq re'is abdullah gül, türkiye parlamént re'isi isma'il qehriman, bash ministir bin'ali yildirim, sabiq bash minstir ehmet dawut'oghli, öktichi partiyelerdin jumhuriyet xelq partiyisining re'isi kamal qilichdar'oghli, milletchi heriket partiyisi re'isi doktor döwlet baghcheli, shimaliy qibris türk jumhuriyitining bash minsitiri höseyin özürgün qatarliq rehberler qatnashti.

Yighin'gha yene türkiye bash qomandani général xulusi akar, hawa armiyisi, déngiz armiysi we qoruqluq armiyisining bash qomandanlirimu qatnashti.

Yighinda herbiy özgirish isyanigha alaqidar höjjetlik filim körsitildi, 15 - iyul kéchisi shéhit bolghanlarning isimliri bir - birlep oqup ötüldi, oxshash waqitta ularning isimliri oqulush bilen teng resimliri chong ikranda bir - birlep körsitildi.

Istanbul saqchi bashliqining muxbirlargha bildürüshiche, bu yighin'gha 5 milyon kishi qatnashqan. Yighin'gha Uyghurlarmu teklip qilin'ghan bolup, istanbulda yashawatqan Uyghurlardinmu köp sanda kishi qatnashti, yighin meydanida sherqiy türksitan ma'arip we hemkarliq jem'iyitining re'isi hidayetullah oghuzxan sherep méhmanlar qataridin orun aldi. Meydanda sherqiy türkistanliqlar bayraqlirini lepildep Uyghurlarning mewjutluqini namayet qildi. Bu yighin köp sanda radi'o we téléwiziye qanalliri arqiliq neq meydandin biwasite tarqitildi.

Nechche milyon kishi qatnashqan yighin istiqlal marshi oqush bilen bashlandi. Kéyin qur'an kerim tilawet qilindi, türkiye diniy ishlar bashqarmisining re'isi mehmet görmesning qol kötürüshi bilen du'a oquldi.
2016-08-07-yenikapi-80.jpg
Yighinda aldi bilen türkiye milletchi heriket partiyisining re'isi döwlet baghcheli söz qilip milliy iradige ige chiqish üchün türkiye xelqini birlik, barawerlikke chaqiriq qildi.

Kéyin jumhuriyet xelq partiyisining re'isi kamal qilichdar oghli söz qilip, pütün türkiye xelqining qanun aldida teng barawer ikenlikini ipadilidi we xelqni yéngi bir türkiye üchün démokratiyige ige chiqishqa chaqiriq qildi.

Yighinda yene türkiye bash qomandani général xulusi akar söz qildi. Général xulusi akar sözini bashli'ishi bilen teng yighin ehli yuqiri awazda, türkiye sen bilen ghururlinidu dep towlidi. Xusuli akar teshekkür éytip sözini dawam qildi. Yighin ishtirakchiliri yene eng büyük esker bizning esker dep shu'arlar toplap meydanni zilzilge saldi.

Yighinda türkiye bash ministiri bin'eli yildirim söz qilip, 15 - iyul herbiy isyanni meghlup qilishta shéhit bolghan, yarilan'ghan qehrimanlarni xatirilidi we tebriklidi. Bin'ali yildirim sözide yene fethullah gülenni türkiyige keltürüp hésab alidighanliqini, jazasini béridighanliqini ipadilidi.

Yighinda yene türkiye parlamént re'isi isma'il qehriman parlamént binasining bombardiman hujumigha uchrighanliqini tilgha aldi we mundaq dédi: "Herbiy özgirish isyanining yoqalghanliqini dunyagha körsitish üchün bu yerge toplanduq we bir millet, bir weten hés tuyghusida ikenlikimizni pütün dunya kördi."

Parlamént re'isi isma'il qehriman sözining axirida, "Istanbulni düshmen'ge teslim qilmighan istanbul xelqige salam yollaymen we teshekkür éytimen" dédi.

Yighin axirida türkiye jumhuriyiti re'isi rejep tayyip erdughan söz qildi.

Nechche milyon kishining qatnishishi bilen échilghan yighinda erdoghan xelqqe xitap qilip mundaq dédi:" 15 - Iyul kéchisi yene bir qétim istiqlal üchün qozghalghan eziz millitim!, silerning chin yürektin salam bérimen. Sözüzmning béshida 15 - iyul kéchisi meydanlargha chiqip qorallarning, tankilarning aldigha kökrek kirip chiqqan, jasaret körsetken pütün qérindashlirimgha yene bir qétim rehmet éytimen.."

Biz bu yighin toghrisida pikir - qarashlirini élish üchün yighinda "Sherqiy türkistan bayriqi" lepilditip kishilerning diqqitini tartqan imam qeshqeri we munewwer öz Uyghur xanim bilen söhbet élip barduq.

Toluq bet