Istanbuldiki partlashta bir Uyghurni öz ichige alghan 41 kishi hayatidin ayrildi

Ixtiyariy muxbirimiz arslan
2016-06-29
Élxet
Pikir
Share
Print

Istanbuldiki atatürk xelq'araliq ayrodromda térrorluq hujumi yüz bérip 41 kishi hayatidin ayrildi, 239 kishi yarilandi. Hayatidin ayrilghanlar arisida ayrodromda ishleydighan abdulhekim bughda isimlik Uyghurmu hayatidin ayrildi. Bu qanliq weqe 28-iyun seyshenbe küni istanbul waqti kech sa'et 21:22 de meydan'gha keldi.

Istanbul waliyliqi: 41 kishi hayatidin ayrildi, 239 kishi yarilandi

Istanbul waliyliqidin élan qilin'ghan bayanatta mundaq déyilgen: "28-Iyun seyshenbe küni atatürk ayrodromida meydan'gha kelgen zorawan térrorluq hujum netijiside 41 kishining hayatidin ayrilghanliqi éniqlandi. Hayatidin ayrilghanlardin 37 kishining kimlik salahiyiti éniqlandi. Bulardin 10 kishi chet'ellik, 3 kishi qosh wetendash ikenliki éniqlandi. Wapat bolghanlardin 19 kishining jesiti a'ililirige tapshuruldi. Weqede yarilinip doxturxanida yatqan 239 kishidin 109 kishi saqiyip doxturxanidin chiqip boldi. 130 Kishini dawalash dawam qilmaqta. Zorawan térrorluq hujumi we jinayetchiler heqqide keng türde inchikilep tekshürüsh élip bérilmaqta. Bu xa'inlarche élip bérilghan térrorluq hujumda hayatidin ayrilghanlargha allahtin rehmet tileymiz, a'ile yéqinlirigha sebir, yarilan'ghanlargha shipaliq tileymiz."

Térrorluq hujum üstide tekshürüsh dawam qiliwatidu

Istanbuldiki bekirköy sot mehkimisining bash teptishi teripidin térrorluq hujumigha alaqidar tekshürüsh dawam qiliwatidu. 3 Térrorchining jesiti pütünley parchilinip ketken bolup, kimlik salahiyitini éniqlash üchün xizmet ishliniwatqanliqi, chet'ellik ikenliki toghrisida melumat bérildi. Buning bilen birge saqchi da'iriliri ayrodromning bixeterlik közitish apparatlirining xatirilirini tekshürmekte iken.

Térrorchilarni ayrodromgha élip kelgen taksichi soraqtin kéyin qoyup bérilgen.

Bash ministir weqe yüz bergen orunda tekshürüsh élip bardi

Türkiye bash ministiri bin'eli yildirim, mu'awin bash ministir noman qurtulmush, ichki ishlar ministiri efkan ala, qatnash ministiri exmet arslan, a'ile we ijtima'iy siyasetler ministiri fatime sayan xanim qatarliq ministirlarning hemrahliqida enqeredin istanbulgha keldi we weqe yüz bergen orunni közdin kechürdi.

Bu térrorluq hujumdin kéyin türkiye bash ministiri bin'eli yildirim istanbul ayrodromigha kélip weqe yüz bergen orunni közdin kechürdi we bakirköy doxturxanisidiki yaridarlarni ziyaret qildi. Muxbirlargha weqe heqqide melumat berdi.

Bash ministir bin'eli yildirim, istanbul atatürk ayrodromida sa'et 21:22 de yüz bergen partlash hujum netijiside deslepki melumatlargha qarighan 36 kishining hayatidin ayrilghanliqini we köp sanda kishining yarilan'ghanliqini bildürdi.

Bash ministir bin'eli yildirim, bu hujumning bigunah kishilerni hujum nishani qilghan peskesh bir térrorluq hujum ikenlikini ipadilidi we mundaq dédi: "Térrorluq xelq'araliq bir tehdit ikenliki bu weqe bilen yene bir qétim op'ochuq otturigha chiqti. Meqsiti, nishani néme bolushtin qet'iynezer qaysi tereptin bolsa bolsun dölitimiz bu peskesh hujumgha bash egmeydighan mustehkem iradige we küchke ige."

Bash ministir bin'eli yildirim térrorchilar heqqide toxtilip mundaq dédi: "Térrorchilar bir tijaret taksi bilen ayrodromgha kelgen we hujum pilanini ishqa ashurghan, térrorchilar aldi bilen qoralidin qara-qoyuq oq atqan, kéyin özini qoshup partlatqan 3 adem bombining hemmisi öldi."

Bin'eli yildirim bu térrorluq hujumning arqisida da'ish (iraq sham islam döliti) teshkilatining peyda qilghan bolush éhtimali barliqini bildürdi.

Weqe yüz bérip 5 sa'ettin kéyin ayropilan qatnash uchushliri qaytidin eslige keldi.

Türkiye dölet miqyasida bir künlük matem élan qilinip, bayraq yérim chüshürüldi.

Abdulhekim bughda isimlik Uyghur weqede wapat boldi

Istanbul atatürk xelq'ara ayrodromida yüz bergen térrorluq hujumida abdulhekim bughda isimlik bir Uyghur yashmu hayatidin ayrildi.

Türkiye metbu'atliri we téléwiziye qanallirida abdulhekim bughda we uning sherqiy türkistanliq ikenlikini tekitlep xewerler tarqitildi.

Merhum abdulhekim bughdaning yéqin tughqanliridin muhemmet toxtining bildürüshiche, merhum istanbul zeytinburnuda anisi bilen olturidiken. Eskerlikke qatniship qaytip kelginige töt ay bolghan. Türkiyening qanunlirigha asasen yashlar 20 yashqa toshqanda eskerlikke qatniship herbiy mejburiyet öteydu, u eskerlikke bérishtin burun "Chelebi" isimlik bir téz yetküzüsh shirkitide xizmet qilidighan bolup, shirketning atatürk ayrodromidiki yük sélish ornida ishligen.

Sherqiy türkistan wexpining idare hey'et mes'ulliridin tibet yüjetürkning bildürüshiche, abdulhekim bughda ayrodromdiki térrorluq hujumida üch yérige oq tégip éghir yarilan'ghan we doxturxanida hayatidin ayrilghan. Uning jesiti hazir edliyelik tekshürüshtin ötküzülmekte.

Merhum abdulhekim bughdaning dadisi burunla wapat bolghan bolup, uning waqitsiz qaza tépishi anisi we uruq-tughqanlirini éghir musibetke salmaqta. Istanbuldiki Uyghurlar merhumning öyige kélip a'ilisige teziye bildürüshmekte.

Biz, abdulhekim bughda we bu hujumda hayatidin ayrilghan barliq musulmanlargha allahtin rehmet tileymiz. Uning a'ilisige shundaqla musibetke uchrighan barliq a'ililerge sebir tileymiz.

Toluq bet