Istanbuldiki réyna kulubida 39 kishini öltürgen qatil tutuldi

Ixtiyariy muxbirimiz arslan
2017.01.17
Share on WhatsApp
Share on WhatsApp
istanbul-terror-hujum-tutulghan.jpg Térrorchi abduqadir masharipofning tutulghan waqtidiki süriti. 2017-Yili 17-yanwar. (TRT Awaz TV sidin süretke élin'ghan)
RFA/Arslan

Yéngi yil kéchisi istanbulning beshiktash rayonidiki réyna kéchilik kulubigha hujum qilip, 39 kishige oq étip öltürgen we 74 kishini yarilandurghan térrorchi qéchip ketken bolup, türkiye saqchiliri her terepni izdesh we munasiwetlik kishilerni tutup soraq qilish netijiside 1-ayning 16-küni sa'et 23 tin 40 minutlar ötkende esenyurttiki bir binada yoshurunup yatqan öyge bésip kirip uni tutqun qildi.

Bu heqte istanbul waliysi wasip shahin we saqchi bashliqi mustafa chalishqan etigen sa'et 10:30 de muxbirlarni kütüwélish yighini uyushturup, térrorchining tutulghanliqi toghrisida muxbirlargha melumat berdi.

Waliy wasip shahin ependi, térrorchining özbékistanliq ikenlikini, jinayitini étirap qilghanliqini, barmaq izining maslashqanliqini, bu hujumning da'ish namida élip bérilghanliqining éniq ikenlikini tekitlidi.

Wasip shahin mundaq dédi: “Yéngi yil kéchisi ortaköy rayonidiki bir kéchilik kulubida qanliq térrorluq weqesi yüz bergen idi. 39 Kishimiz hayatidin ayrildi. U hujumni élip barghan qatilni tutush üchün saqchi idarisi qattiq chidamchanliq bilen harmay-charchimay xizmet ishlidi we tünügün kéche bu qatilni qolgha chüshürdi. Térrorchi töt xil til bilidu.”

Waliy shahin térrorchining kimliki toghrisida toxtilip mundaq dédi: “Kod ismi ebu muhemmed xorasani dep atilidighan esli ismi abduqadir masharipof 1983-yili özbékistanda tughulghan, afghanistanda telim alghan, 4 xil til bilidighan yaxshi yétishtürülgen bir kishi, bir térrorchi. Dölitimizge 2016-yili 1-ay ichide qanunsiz kelgenliki texmin qilinmaqta.”

Waliy shahinning bildürüshiche, saqchilar térrorchini tutush heriket jeryanida 7 ming 200 sa'etlik sin'alghu körünüshini tekshürüp chiqqan, 2 ming saqchi wezipe ötigen. Koniya, izmirdimu istixbarat shöbilirining hemkarliqi bilen ortaqliship bir heriket élip bérilghan.

Térrorchi deslepte istanbulning bashaqsheher rayonida bir öyni ijarige élip olturghan kéyin yene özini yoshurush üchün bir ikki öy almashturghan. Weqe sadir qilghan künimu zeytinburnudin kélip heriket élip barghan.
Waliy shahin térrorchi bilen qolgha chüshken maddiy buyumlar toghrisida toxtilip mundaq dédi: “Saqchilirimiz bek köp emgek singdürdi. 152 Öyde axturush élip bardi. 50 Kishi tutuldi. Térrorchi bilen birlikte 197 ming amérika dolliri, ikki dane tapancha we oq-dora, biri ünsiz tapancha, bir qanche dane téléfon kartiliri qolgha chüshti. Térrorchi jinayitini étirap qildi, barmaq izlirimu térrorluq qilghan yerde qalghan iz bilen maslishidu. Térrorchi toghrisida bir ming 200 uchur tapshurup élindi.”

Térrorchi yoshurunup yatqan öydin bir er we üch neper ayalmu tutulghan bolup, erning iraqliq ikenlikini, ayallarning birining somaliliq, yene birining sénégalliq, yene birining misirliq ikenliki, ularning süriye we iraqtiki da'ish dégen teshkilatqa qatnishish üchün üch kün ilgiri istanbulgha kelgenliki bildürüldi.

Waliy shahin sözide yene térrorchining heriket élip bérishigha choqum bir kimlerning yardem qilghanliqini, soraq ishliri tamamlan'ghandin kéyin shériklirining otturigha chiqidighanliqini bildürdi.

Yéngi yil kéchisi istanbulda bu qanliq weqe yüz bergendin kéyin türkiye metbu'atlirida térrorchining Uyghur ikenliki toghrisida xewerler tarqilip ketti. Héch qandaq delil-ispat yoq, asassiz tarqalghan bu xewerler bir tereptin Uyghurlarning naraziliqini qozghisa, yene bir tereptin Uyghurlarni guman astigha tashlap qoydi. Shuning bilen türkiyediki sherqiy türkistan ammiwi teshkilatlarning rehberliri arqa-arqidin bayanat bérip, metbu'atlargha reddiye qayturdi we bir qisim zhurnalistlarni tenqid qildi. Hetta bir kishining térrorluq qilishi bilen omumiy bir xelqni yaki bir milletni qarilash, eyibleshning toghra emeslikini emeliy misallar bilen tekitlep ötti.

Dunya Uyghur qurultiyining mu'awin re'isi séyit tumtürk ependi, t r t awazi téléwiziye qanilining chüshlük programmisigha qatniship, térrorchining tutulghanliqi toghrisida pikir bayan qildi we Uyghurlarning qarilap uchur tarqatqan metbu'atlarni yene bir qétim tenqid qildi hem türkiyeni yaxshi köridighanliqini, türkiyeni ikkinchi wetini dep qaraydighanliqini Uyghurlarning térrorchi emeslikini yene bir qétim tekitlidi.

Biz bu heqte pikir-qarashlirini élish üchün türkiye istratégiyilik chüshenchiler institutining mutexessisi doktor erkin ekrem we dunya Uyghur qurultiyining mu'awin re'isi séyit tumtürk ependi bilen söhbet élip barduq.
Yuqiridiki awazliq ulinishtin bu heqtiki programmining tepsilatini anglighaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.