Istanbuldiki réyna qetli'amini sadir qilghuchi qatil toghrisida tepsiliy melumatlar ashkarilandi

Ixtiyariy muxbirimiz arslan
2017.01.18
Share on WhatsApp
Share on WhatsApp
istanbul-terror-hujum-tutulghan-suret.jpg Térrorchi abduqadir masharipofning tutulghan waqtidiki süriti. 2017-Yili 17-yanwar.
RFA/Arslan

Yéngi yil kéchisi istanbulda bir kéchilik kulubqa qoralliq hujum qilip 39 kishini öltürüp qéchip ketken we 17 kündin kéyin istanbulning esenyurttiki bir a'ile qorusida tutulghan özbékistanliq qatil abduqadir masharipofning qatilliq qilish buyruqini süriyening raqqadiki kattiwéshidin alghanliqi otturigha chiqti.

Saqchilar öyge basturup kirgende abduqadir masharipof yataqning astigha yoshurun'ghanliqi bildürüldi. Saqchilarni körgen haman méni öltürmenglar dep warqirighanliqi ilgiri sürüldi. Qatilning saqchilargha bergen ipadiside hujumni qandaq élip barghanliqi, qandaq közitish élip barghanliqi, hujum qilish jeryanida we kéyinki waqitlarda némilerni qilghanliqi qatarliqlarni ayrim-ayrim tepsiliy anglatqan.

Xewerlerde qatil qachqandin kéyin 4 yashliq oghlini birge élip qachqanliqi bildürülgen idi. Emma tutulghan waqitta oghli yénida yoq idi. Mutexessisler qatilning oghlini da'ishning bashqa bir mexpiy öyige ewetkenlikini texmin qilmaqta. Qatil abduqadir masharipofning ayali we qizi ötken hepte pendikte bir öydin tutqun qilin'ghan idi.

Qatilning esli nishani taksim meydanini qan'gha boyash idi

Otturasherq gézitining bügünki sanida bildürüshiche, qatil abduqadir masharipofning saqchilargha iqrar qilghan bir qisim melumatlar otturigha chiqti. Qatil masharipof yéngi yil kéchisi taksimda qanliq weqe sadir qilish üchün raqqadiki da'ish térrorluq teshkilatning kattiwéshidin buyruq alghanliqini bildürgen. Qatil abduqadir masharipof “Takismgha bardim, emma saqchilar bixeterlik tedbirlirini toluq alghan iken. Manga buyruq bergen kishi bilen yéngidin alaqe qildim. Rayonda yéngi bir hujum nishani izdishimni telep qildi. Déngiz boyida taksi bilen aylandim, réyna kéchilik kulubi muwapiq körüldi. Raqqadiki kishidin soridim, muwapiq kördi” dédi.

Istanbuldin qéchish üchün teyyarliq qilmaqta iken

Esenyurttiki öyning da'ish térrorluq teshkilatining kishilerni yötkesh üchün waqitliq orunlashturidighan orun qilip qollan'ghanliqi otturigha chiqti. Qatil masharipofning istanbuldin kétishni pilanlighanliqi, bir kishidin yardem telep qilghanliqi bildürüldi.

Qatil masharipofning saqchigha bergen iqrarnamisining bir qismi yéngi shafaq gézitide bügün élan qilindi. Iqrarname heqqide mundaq déyilgen: “2016-Yili 1-ayda türkiyege kelgende konyagha orunlashturulghan, u yerde 1 yilgha yéqin qalghan, bu jeryanda raqqadiki kattiwéshi bilen dawamliq munasiwet qurup uchur almashturghan. Yéngi yil kéchisi taksimda adem bomba bolup heriket qilish üchün buyruq bérilgen. Shuning bilen istanbulgha kelgen, taksimda widi'ogha alghan sin körünüshini raqqigha ewetken, raqqadiki xoja'aka leqimi bar kishi we yardemchisi muwapiq körgen. Taksimda saqchilar bixeterlik tedbirlirini kücheytken bolup bu yerning uyghun emeslikini hés qilghan we ortaköydiki réyna kéchilik kulubning bixeterlik saqchiliri yoqluqini körüp u yerge hujum qilishni pilanlighan we qetli'am qilghan.”

Qatilning saqchilargha bergen melumatigha qarighanda, weqedin kéyin qatil raqqa bilen alaqe qilghan we bir mezgil yoshurunup jim turushni konyadiki da'ish ezasining uning bilen alaqe qilidighanliqini bildürgen. Kéyin esenyurttiki öyge élip barghan eli muhemmed jemil isimlik iraqliq bilen munasiwet qurghan we esenyurtta uning ijarige alghan öyige kelgen, u jeryanda 4-5 öy almashturghan, jemil isimlik kishi saqchilarning keng türde izdewatqanliqini bilip eng axirida yéngi ijarige alghan esenyurttki tutulghan öyge yötkigen.

Qatil masharipof istanbul saqchi idariside tutup turuluwatqan bolup, istanbul saqchi idarisi térrorluqqa qarshi turush bölümi bilen istixbarat alahide analiz bölümi uni soraq qilghan. Soraq qilish jeryanida qatilning her bir sözining rast-yalghanliqi bir-birlep tekshürüp tetqiq qilin'ghan.

Qatil bashta türkche soraq qilin'ghan, qatil türkchini az bilidighanliqini bildürgendin kéyin, in'glizche soralghan, uningghimu jawab bérelmigendin kéyin, rusche soraq sorighan, qatil masharipof rusche soraqqa tiz-tiz jawab bergen, so'al-soraq tünügün kéchidin buyan dawam qiliwatqanliqi bildürüldi.

Biz bu heqte pikir-qarashlirini élish üchün istanbuldiki sherqiy türkistan ma'arip we hemkarliq jem'iyitining re'isi hidayetulla oghuzxan bilen söhbet élip barduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.