Хәлқара көчмәнләр күнини қутлаш паалийитигә уйғур тәшкилатлириму иштирак қилди

Ихтиярий мухбиримиз әркин тарим
2016-12-21
Share
xelqara-kochmenler-kuni-1.jpg Түркийәниң пайтәхти әнқәрәдә өткүзүлгән хәлқара көчмәнләр күнини қутлаш паалийитидин көрүнүш. 2016-Йили 18-декабир.
RFA/Erkin Tarim

12-Айниң 18-күни дуня көчмәнләр күни. Бу күн мунасивити билән түркийәниң пайтәхти әнқәрәдә өткүзүлгән хәлқара көчмәнләр күнини қутлаш паалийитигә түркийәдә паалийәт елип бериватқан шәрқий түркистан аммиви тәшкилатлириму иштирак қилди.

12-Айниң 19-күни әнқәрә вилайәтләр залида өткүзүлгән йиғинға түркийә ички ишлар министири муавини сабаһиттин өзтүрк, түркийәниң һәр қайси идара, җәмийәтлириниң алий рәһбәрлири, бәзи дөләтләрниң әлчилири вә түркийәниң һәрқайси җайлиридин кәлгән аммиви тәшкилат мәсуллиридин болуп 800 әтрапида киши иштирак қилди. Истанбулда паалийәт елип бериватқан шәрқий түркистан маарип вә һәмкарлиқ тәшкилати баш катипи абдуләхәт абдурәһим әпәнди билән қәйсәридә паалийәт елип бериватқан шәрқий түркистан мәдәнийәт вә һәмкарлиқ тәшкилати баянатчиси абдуқадир түмтүрк һәм малайшия вә тайланд арқилиқ кәлгән уйғур мусапирларниң бир қисми алаһидә тәклип бойичә қатнашти.

Йиғинниң ечилиш мурасимида сөз қилған көчмәнләр идариси мудири атиллаһ торос әпәнди, түркийәгә келиватқан көчмәнләрниң көпиниң өзи туруватқан дөләтләрниң зораванлиқ сиясити, сиясий бесим, ички уруш түпәйли икәнликини, көчмәнләр идариси қурулған 2013-йилидин бери 1 милйондин көп мусапирға туруш рухсити тарқитип бәргәнликини баян қилған. Мурасимда йәнә, түркийәниң көчмәнләрни, болупму ағиска түрклирини түркийәгә әкелип дөләт селип бәргән өйләргә орунлаштуруш җәряни баян қилинған һөҗҗәтлик филим көрситилгән.

Йиғин җәрянида шәрқий түркистан аммиви тәшкилатлириниң мәсуллири мунасивәтлик рәһбәрләргә түркийәдики уйғур мусапирларниң қийинчилиқлири вә абдуқадир япчан мәсилиси тоғрисидики тәләплириниму йәткүзгән.

Истанбулда паалийәт елип бериватқан шәрқий түркистан маарип вә һәмкарлиқ тәшкилати баш катипи абдуләхәт абдурәһим әпәнди өзлириниң йиғин җәрянида түркийә көчмәнләр идарисиниң башлиқи атилла торос әпәнди билән айрим учришип, түркийәниң қәйсәри вә башқа җайлиридики уйғур көчмәнлириниң иқамәт, хизмәткә орунлишиш, саламәтлик суғуртиси вә башқа бир қатар мәсилилири һәққидә тәләплирини сунғанлиқини билдүрди.

Мәлум болушичә, буниңдин бир қанчә йиллар илгири шәрқий җәнуби асия әллиридин келип түркийәгә маканлашқан уйғурларниң 2 миңдин артуқ қисми қәйсәри шәһиридики сақчи идарисиниң қору җайидики айрим өйләргә пәрзәнтлири билән орунлаштурулған иди.

Йәнә көп сандики мусапирларниң истанбулда туруп тирикчилик қиливатқанлиқи мәлум. Мәзкур мусапирларниң түрлүк еһтияҗини һәл қилиш уйғур җәмийәтлири актип паалийәт қилип кәлгән.

Уйғур мусапирлириға актип ярдәм қиливатқан шәрқий түркистан мәдәнийәт вә һәмкарлиқ җәмийитиниң баянатчиси абдуқадир түмтүрк әпәнди мусапир уйғурларниң көпиниң бәзи қийинчилиқлириниң һәл болғанлиқини, лекин йәнила бәзи қийинчилиқлар мәвҗутлуқини, ишләш рухситиниң йеқинда чиқидиғанлиқини билдүрди.

Шәрқий җәнуби асиядин қәйсәригә келип маканлашқиниға 3 йил болған иминҗан әпәнди өзлириниң көп қийинчилиқлириниң һәл болғанлиқини, әмма йәнә өзлири дуч келиватқан мәсилиләрни тәкитләп өтти.

Қәйсәридә паалийәт елип бериватқан шәрқий түркистан мәдәнийәт вә һәмкарлиқ тәшкилатиниң баянатчиси абдуқадир түмтүрк әпәндиниң ейтишичә, уйғур вәкилләр өзлири қатнашқан йиғин ахирлашқандин кейин, башқа йиғин әһли билән биргә башланғуч, оттура мәктәп оқуғучилири сизған, көчмәнләрниң һаяти әкс әттүрүлгән рәсим көргәзмисини екскурсийә қилған.

Көчмәнләр идариси 2013-йили қурулғандин бери һәр йили хәлқара көчмәнләр күни түркийәниң һәрқайси вилайәтлиридә һәр хил паалийәтләр билән қутлинидиған болуп, уйғурлар изчил түрдә бу хилдики паалийәтләргә қатнишип уйғурниң вәзийитини вә мәдәнийитини тонутуп кәлмәктә. Абдуқадир түмтүрк әпәнди бу һәқтә мәлумат бәрди.

Уйғур мусапирлар мәсилисигә көңүл бөлүп келиватқан уйғур җәмийәтлириниң һесабатичә, йеқинқи 6-7 йил ичидә 7 миңдин артуқ уйғур түркийәдә қанунлуқ туруш һоқуқи, йәни иқамәт рухситигә еришкән. 3 Миң әтрапида уйғур рәсмий түркийә пуқралиқиға өткән.

Һазир йәнә тәхминән он миң әтрапида адәм пуқралиққа еришиш нөвитини күтмәктә. Шуниң билән биллә йәнә, түркийәгә саяһәт вә туғқан йоқлаш йоллири билән келип, түркийәдә туруп қеливатқанларниң саниму ашмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт