Londonda ötküzülgen “Ottura asya bahar bayrimi féstiwali”gha köp sanda Uyghur ishtirak qildi

20 - Mart küni en'giliyening dangliq ilim yurtliridin biri london üniwérsitétida ötküzülgen “Ottura asya bahar bayrimi féstiwali”gha köp sanda Uyghur qatnashti. Merkizi londonda turushluq türk dunyasi hemkarliq pilatformi teripidin uyushturulghan pa'aliyetke muhajirette yashawatqan türkler - ezerbeyjanliqlar, türkmenistanliqlar, özbékistan, qazaqistan, qirghizistanliqlar we Uyghurlardin bolup ming etrapida kishi ishtirak qildi we ular naxsha - ussulliridin örnekler körsetti. Shundaqla herqaysi türkiy milletler bölüm échip özige xas medeniyetlirini tonutti. Uyghurlargha wakaliten uzun yillardin béri londonda pa'aliyet élip bériwatqan london Uyghur ansambili Uyghur naxsha - ussulliridin örnekler körsetti we tamashibinlarning alqishigha érishti. Biz neq meydan'gha téléfon qilip mezkur pa'aliyetke qatnishiwatqan éziz eysa ependidin bu heqte melumat igiliduq.

U, mezkur pa'aliyetning london üniwérsitétida ötküzülüwatqanliqini, pa'aliyetke ottura asya türkiy jumhuriyetliri, türkiye we dunyaning her qaysi jayliridin kélip londonda yashawatqan türkiy milletler we en'giliyeliklerdin bolup 1000 etrapida kishi qatnishiwatqanliqini, london Uyghur ansambilining bolsa Uyghur naxsha - muzikiliridin örnekler körsitiwatqanliqini, keypiyatning nahayiti yuqiri boluwatqanliqini bayan qildi.

Éziz eysa ependi ottura asyadiki türkiy milletlerning milliy bayrimi bolghan noruz bayrimining dunyagha dangliq bilim yurti london üniwérsitétida ötküzülüshi Uyghur medeniyitini tonutush, Uyghurlarning mewjutluqini bildürüsh üchün zor ehmiyetke ige ikenlikini bayan qildi we pa'aliyet heqqide tepsiliy melumat berdi.

En'giliye london üniwérsitétida ötküzülgen “Ottura asya bahar bayrimi féstiwali” namliq pa'aliyet axirlashqandin kéyin, bu pa'aliyetni uyushturghan london türk dunyasi hemkarliq pilatformi re'isi atilla abaji ependi bilen téléfon söhbiti élip barduq.

Atilla abaji ependi “Noruz féstiwali qandaq ötti? kütken meqsitinglargha yettinglarmu?” dégen so'alimizgha mundaq jawab berdi: “Bügün londonda tunji qétim en'giliye türk dunyasi hemkarliq pilatformi bolush süpitimiz bilen noruz bayrimini qutliduq. Bayram rastinla bayramdek ötti. Qatnashqan kishilerni bekla hayajanlandurdi. Pütün türkiy milletler naxsha - muzikiliridin örnekler körsetti. Yémek - ichmek, kiyim - kéchek medeniyetlirini tonutti. Türkiy xelqlerning milliy bayrimi bolghan noruz bayrimini londonda tunji qétim ötküzgen bolsaqmu nahayiti yaxshi ötküzduq, dunyagha birlik, ittipaqliq ichide ikenlikimiz heqqide signal berduq.”

London Uyghur ansambili naxshichisi rehime rexman xanim bu yil londonda ötküzülgen bu pa'aliyetning eng muhim alahidilikliridin birining bu noruz munasiwiti bilen en'giliyede oqughan pütün Uyghurlarning london'gha jem bolup noruz bayrimini qutlash bolghanliqini bayan qildi.