Конядики “хитай бағчиси” “мәхмут қәшқири бағчиси” ға өзгәртилди

Ихтиярий мухбиримиз әркин тарим
2014.08.13
yueshiu-baghchisi-mexmut-qeshqiri-baghchisi.jpg Хитайчә нам билән аталған “юешиу бағчиси”ниң намини “мәхмут қәшқири бағчиси” дәп өзгәртилгән. 2014-Йили авғуст, түркийә.
milliyet.com.tr diki munasiwetlik maqalidin elinghan

Түркийәниң әң чоң қәдимий тарихқа игә шәһәрлиридин бири болған коня шәһириниң мәрам районлуқ һөкүмәт комитетиниң йиғинида козағач мәһәллисидики хитайчә нам билән аталған “юешиу бағчиси”ниң намини өзгәртиш қарари мақулланди. Конядики ичидә көп санда өсүмлүк вә көлләр бар болған бу чоң бағчиниң исми “мәхмут қәшқири бағчиси”дәп өзгәртилгән.

Мәрам районлуқ һөкүмәт рәиси татма тору ханимниң риясәтчиликидә 8-айлиқ иккинчи қетимлиқ мәҗлистә бурунқи район башлиқи мәзгилидә хитай билән достлуқ орнитип хитайчә “юешиу бағчиси” дәп исим қоюлған бағчиниң намини өзгәртиш мәсилисиниң күн тәртипкә кәлгән. Музакирә ахирида хитайниң юешиу шәһириниң исми қоюлған бағчиниң исмини “мәхмут қәшқири бағчиси” дәп өзгәртиш қарар қилинған.

Бу бағчә коня вилайитидики бирдин бир өсүмлүк вә көл бар бағчә болуп, 2013-йили 7-айниң 10-күни хитайниң юешиу шәһири билән коня мәрам районлуқ һөкүмәт достлуқ мунасивити орнатқанда мәзкур исим берилгән. Бу қарар районлуқ һөкүмәтниң тор бетигиму баш хәвәр сүпитидә қоюлған.

Биз бу һәқтә көз қаришини елиш үчүн коняда оқуған тәтқиқатчи шәрқий түркистан вәқпиниң баш катипи һамит гөктүрк әпәндигә микрофонимизни узаттуқ. У, хитайчә нами берилгән бу бағчиниң исминиң мәхмут қәшқири бағчиси дәп өзгәртилишигә уйғур елидә йүз бәргән вәқәләр сәвәб болғанлиқини, чүнки бу вәқәләр тоғрисидики хәвәрләр түрк ахбарат васитилиридә кәң көләмдә орун алғанлиқини баян қилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.