Türkiye bash ministiri rejep tayyip erdoghanni yighlatqan mektup

Téléwiziye programmisida, muhemmed el biltejining rabi'etul edwiye meydanidiki qetli'amda mergenler teripidin étip öltürülgen 17 yashliq qizi esmagha yazghan xétini anglighan rejep tayyip erdoghan özini tutalmay yighlap ketti. 2013-Yili 22-awghust, türkiye.

Misirdiki musulman qérindashlar teshkilatining nopuzluq rehberliridin muhemmed el biltejining, rabi'etul edwiye meydanidiki qetli'am esnasida mergenler teripidin étip öltürülgen 17 yashliq qizi esmagha yazghan xéti élan qilin'ghandin kéyin bu xet türkiyede pütün axbaratlarning qiziqish témisigha aylandi.

Türkiyening ataqliq awaz artisliridin dursun éli erzinjanli oqughan xet 22-awghust küni ulke téléwiziyeside türkiye bash ministiri rejep tayyip erdoghan qatnashqan programmida qoyuldi. Téléwiziye programmisida xetni anglighan rejep tayyip erdoghan özini tutalmay höngret yighlap ketti. U yighlawatqanda, ülke téléwiziyisi alahide programmisining riyasetchisi turghay gülerning sizni bunchiwala tesirlendürgen néme dégen so'aligha bash ministir erdoghan mundaq jawab berdi:
-Buninggha oxshash ishlar méningmu béshimdin ötti. Öyge aqshamliri kech kélettim. Bir küni öyge kelsem, qizim öyning ishikige “Dada, bir aqshimingni manga ajratqin” dégen xetni chaplap qoyuptu. Esmaning dadisi yazghan xetni anglap méning béshimdin ötken ishlar yadimgha keldi. Esmaning namizinimu chüshürelmigenliki, dadisining uning axiritige bolghan köz qarishi méni bekla tesirlendürdi. Esma hayatining baharida shéhit boldi, dadisining buninggha soghuq qanliq bilen mu'amile qilishi, méni bekla tesirlendürdi. Esma yashlirimiz üchün büyük bir nemune. Men bügün bash ministir bolush süpitim bilen emes, bir türkiye wetendishi bolush süpitim bilen köz yéshimni töktüm.

Mektup mundaq yézilghan:
-Söyümlük qizim! sanga hergizmu “Elwida” démeymen, belki del eksiche “Yene körüshkiche xosh emise!” démekchiken. Sen béshingni tik tutup, zalimgha qarshi isyan bilen yashiding. Pütün tosalghularni yéngip, erkinlikke cheksiz ishqingni béghishliding. Bu ümmet medeniyet we pezilette adalet ornigha ige bolsun dep, ularni qaytidin tirildürüsh yolida jimjitqine yéngi upuqlarni izdiding. Tengtushliringning qilip yürgen ishlirigha bérilmiding, her da'im derste birinchi boluwatqan turuqluq, yene öginishke bolghan ishtiyaqing töwenlep ketmidi.

Menmu bu qisqa hayatta séning tatliq sözliringge qanmidim. Méningmu sen bilen köngül achqudek, xushal yayrap oynighudek keng-kushade waqtim bolmidi. Sen bilen rabi'etul edwiye meydanida eng axirqi qétim körüshkinimizde, sen manga: “Sen biz bilen birge turupmu, yene bizdin judasen” déyish arqiliq aghrinishliringni ipadiligen iding. Menmu sanga: “Qizim, bu hayat bir-birimizge toyghudek unche uzun emes, shunga bir-birimizge qan'ghuche toyishimiz üchün allaning bizge jennette mushundaq mungdishishni nésip qilishini tileyli!” dégen idim.

Sen shéhit bolushtin ikki kün ilgiri, séni toy kiyimliri ichide chüshümde kördüm. Sen dunyada misalini tapqili bolmaydighan derijide bir güzellik ichide iding. Yénimgha kélip jimghine olturghiningda men sendin:-“Bu kéche, séning toy kéchengmu?” dep soridim.

Sen jawab bérip, “Méning toyum kechte emes, del chüsh waqtida bolidu” dep jawab berding. Charshenbe küni chüsh waqtida shéhit bolghanliq xewiring manga yétip kelgende, séning manga chüshümde dégen sözliringning menisige yetken boldum.

Allaning séni shéhitlar qatarida qobul qilishini tileymen. Séning shéhitliking bizning heqliq ikenlikimizge we düshmenlirimizning batil ikenlikige bolghan qet'iy ishenchimizni téximu kücheytti.

Sen dunyadin ayrilidighan chaghda yéningda bolalmidim. Axirqi qétim bolsimu séni bir körelmidim. Péshanengge bir qétim söyüpmu qoyalmidim. Hetta jinaza namizinggha qatnishish sheripigimu muyesser bolalmidim. Bu méni chongqur azablidi.

Méning bundaq qilalmighanliqimning sewebi ölümdin yaki qarangghu türmilerdin qorqqanliqim emes, belki sen hayatingni pida qilghan ashu muqeddes dawani menzilige yetküzüsh we dawamlashturush yolidiki aldirashliqim boldi.

Sen zalimlargha qarshi béshingni tik tutup, kökrek kerginingde, asiylarning oqi neq köksüngge tegdi, emma rohung ershi-alagha yükseldi. Néme dégen ajayip gheyriting we güzel terbiye körgen nepsing bar séning?!

Men shuninggha ishinimenki, sen allahqa bergen wedengge sadaqitingni körsetting, allahmu sanga qilghan wedisige sadaqitini körsetti. Mana shéhitlik mertiwisini bizge emes, sanga nésip qildi.

Janijan qizim we hörmetlik ustazim!! axirida men sanga “Elwida” démeymen, belki del eksiche “Yene körüshkiche xosh emise!” démekchiken. Chünki biz pat yéqinda uchrishimiz, peyghember eleyhissalam we es'habiliri bilen hewzi kewserning boyida birlikte bolimiz.

Cheksiz qudret we hökümranliqning igisi bolghan allahqa eng yéqin, uning neziride eng qimmetlik we eng shereplik bir maqamda menggü ayrilmasliq arzuyimizgha shundaqla bir-birimizge toyghiche qarap olturushidighan ashu güzel künlerning arzusigha yétish ümidi bilen qayta körüshkiche xosh emise!”