Gollandiyede yashawatqan Uyghurlar misirdiki chektin ashqan qirghinchiliqlargha qarshi naraziliqini ipadilidi

Gollandiyediki Uyghurlarning, bu heptilik jüme xutbisi misirdiki qanliq qirghinchiliqqa béghishlandi. Mezkur jüme namizining xatipliqini qilip kéliwatqan abduraxman qarihajim, misirda boluwatqan qanliq ziddiyettin köp epsuslan'ghanliqini we wehshiylikte heddidin ashqan zalimlarning qilmishlirigha naraziliqini bildürgendin kéyin, insanning qedir-qimmiti heqqide mexsus toxtaldi.

Qur'an kerimide: “Qandaqliki bir insan, yene bir insanni naheq öltüridiken. Uning jazasi jehennemdur. U jehennemdin menggü chiqirilmaydu. Allah uninggha ghezep qilidu we uninggha qattiq lenet qilidu. Shuning bilen birge kötürüp qopqusiz jazalargha duchar qilidu” dep alahide eskertilgenlikini qeyt qilip turup sözini dawam qilghan, gollandiyediki mezkur meschitning imami abduraxman qarihajimning bildürüshiche: islam prinsipida insanning qimmiti dunyadiki barliq nersilerdin üstün dep körsitilgen bolup, allahqa ibadet qilidighan bir musulman möminning bir tamche qéni töwendikidek 10 jehette sélishturma qilinip, naheq adem öltürüshning qattiq cheklen'gen chong gunahlar qatarigha kirgüzülgenliki sherhlen'gen.Bir musulmanning qénini naheq tökken qatilning töwisining qobul qilinishi tes...

• Shérik keltürmeslik, naheq qan tökmeslik, zéna qilmasliq yaxshi bendilerning süpetliridindur.
• Musulmanni naheq öltürüsh, insanni halak qiliwétidighan azabqa duchar qilidighan éghir gunahtur.
• Bir insanni naheq öltürüwetken kishi, pütün dunyadiki barliq insanni öltürüwetken'ge barawer jazagha layiq jinayet ishligen bolidu.
• Naheq öltürülüsh xewpide qalghan bir insanni qutquzup qalghuchi, pütün dunyadiki insanlarni qutquzup qalghandek ejirge érishidu.
• Allaning neziride, bir musulmanning naheq ölüp ketkinidin, pütün dunya kumpeykum bolup ketken yenggilrektur.
• Qiyamet küni eng aldi bilen hésab qilinidighan heqler, naheq tökülgen qanning heqqidur.
• Musulman musulmanliq chégrasi ichide qalidu. Peqet naheqla qan töküp salmighan bolsa...
• Bir musulmanning qénining tökülüshidin, kebining yéqilip kétishi yenggilrektur.
• Kelime shahadet éytqan herqandaq kishining qénini töküsh qet'iy haramdur.

Jama'et ichide ziyaritimizni qobul qilghan yawropa sherqiy türkistan ma'arip jem'iyitining mes'uli obulqasim ependi, misirda boluwatqan qirghinchiliqlargha qarita köz qarishini ipadilep, bu ziddiyette hemmidin bekrek rol oynighan nersining teshwiqatta ipadilen'genliki we bu xil qanliq qirghinchiliqlarda heddidin ashqan shexslerning özi heqqidiki chüshenchisining burmilan'ghan bir terbiyettin mushu halgha kelgenliki heqqide toxtaldi.