Misirda tutqun qilin'ghan Uyghur balilar bilen bolghan alaqe üzülüp qaldi

Muxbirimiz gülchéhre
2017-07-06
Share
misir-uyghur-oqughuchi-5.jpg Misirdiki Uyghur oqughuchilar tutqun qilinip saqchi mashinisida élip kétiliwatqan körünüsh. 2017-Yili 6-iyul.
Tutqun qilinghan oqughuchilar özliri teminligen

Misir saqchilirining ikki kün awwal Uyghurlarni nishan qilip bashlatqan keng kölemlik tutqun qilishliri heqqide hazirghiche radiyomizgha yetküzülgen melumatlardiki tutup kétilgen Uyghurlar sani yüzdin ashidu.

Ularning ichide qorumigha yetmigen yash ösmürlermu köp salmaqni igileydu, hetta quchiqidiki bowaqliri bilen tutulghan ayallarningmu barliqi melum. Misir waqti 5-iyul kéche sa'et bir etrapida tutqun'gha uchrighan Uyghur balilar deslep radiyomiz bilen alaqiliship, özlirining ayropilandin chüshürüwélin'ghanliqi, ikki qétimliq ayropilandin tosup qilin'ghan Uyghurlarning sanining 70 tin ashidighanliqi heqqide uchurlar yetküzgen bolsimu, misir saqchiliri ularni kishenlep, ayrodromdin shu yer waqti 4 lerde élip mangghandin buyan ular bilen alaqimiz pütünley üzülüp qaldi.

Ikki üch aydin buyan xitay hökümitining her türlük wehime, bésimlirigha berdashliq bérip, qahirede oqushini dawam qiliwatqan Uyghur oqughuchilar 4-iyuldin bashlap, Uyghurlar topliship yashawatqan 7-rayondiki ashxanilardin, meschit, dukan hetta kochilardin, öyliridin qahire saqchiliri teripidin tutup kétilgen idi, tehditte qalghan bezi oqughuchilar we ularning a'ile‏-tawabi'atliri, hetta bu mehellide tijaret qiliwatqan Uyghurlarmu saqchilarning sewebsiz tutqun qilishidin qéchip qutulush üchün kiralighan öylirini, bar bisatini tashlap qahiredin ayrilip türkümlep bashqa sheher we döletlerge yol élishqa bashlighan. Qahire ayrodromida 4-iyul Uyghurlarning tutulghanliqini anglap, bashqa ayrodromlargha bérip teliyini sinap béqishqa tewekkül qilghanlirimu oxshash qismetlerge duch kelgen.

Shu jay waqti 5-iyul kéche sa'et birlerde iskenderiye ayrodromidin Uyghur oqughuchilar arqa-arqidin süretlik we awazliq uchur yollap, özlirining tekshürüshlerdin ötüp dubeyge uchidighan ayropilan'gha ongushluq chiqip bolghanda, ayropilandin chüshürüwélin'ghanliqini, arqa ‏-arqidin ikki nöwetliki ayropilandin 70 tin artuq Uyghurning tosup qélin'ghanliqini xewer qildi.

Yene bir sa'etlerdin kéyin bolsa, tutulghan balilarning jiddiy halda bizni élip mangidighan boldi dégen awazi keldi, xuddi jinayetchilerdek qolliri kishenlinip aptomobilgha bésip élip kétiliwatqan Uyghur balilarning téléfoni arqiliq yollighan süretliridin, ularning ichide téxi 15, 16 yashlardiki qorumigha yetmigen yash ösmürlerning séymasini körgili bolidu.

Uningdin kéyin alaqimiz pütünley üzüldi. Ular ayrodromdin yötkilish aldida, misir saqchilirining ulargha xitaygha ötküzüp bérish heqqide tehdit salghanliqi melum bolghan bolsimu, hazirghiche iskenderiye ayrodromida 5-iyul kéche tosup qilinip keynidin qolliri kishenlen'gen halda élip méngilghan, sani 70 tin artuq Uyghur balilirining hazirqi weziyiti namelum.

Oxshashla shu küni iskenderiye ayrodromida tosup qélin'ghan Uyghur balilarni körgenliki heqqide melumat bergen bir ayal, özining ayrodromda közitip turush jeryanida, saqchilar teripidin 20 din artuq balining tosup qélin'ghanliqigha shahit bolghanliqini, hetta ularning ichide quchiqida balisi bar ayallarnimu körgenlikini éytti.

4-Iyul qahirede bashlan'ghan Uyghurlarni tutqun qilish herikiti seweblik, özining ikki perzentidin bashqa yene özi hamiyliqqa alghan 4 Uyghur oqughuchini élip, 10 yildin buyan bu sheherde qurghan öyi we barliq bisatini terk étip, bashqa sheherge qéchip bérip yoshurunuwalghan bir Uyghur ayalning melumat bérishige qarighanda, bu tutqundin burunla Uyghurlar turuwatqan 7-rayonda ezeldin körülüp baqmighan natonush gumanliq Uyghurlar peyda bolup qalghan we bezi oqughuchilar ularning özlirini paylawatqanliqinimu bayqap, bu heqte öz-ara bir birini agahlandurghan. Arqidinla saqchilarning kéchilerde oqughuchilarning öylirige, ular tamaq yeydighan ashxanilargha tuyuqsiz basturup kirip tutqun qilishi bashlan'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.