"моңғул, хитай демократийә мәсилилири муһакимә йиғини"да уйғурлар мәсилиси оттуриға қоюлди

Ихтиярий мухбиримиз әкрәм
2015-11-30
Share
germaniye-xitay-mungghul-demokratiye-muhakime.jpg "моңғул, хитай демократийә мәсилилири муһакимә йиғини" дин бир көрүнүш
RFA/Ekrem


Германийәниң көлин шәһиридә"2 - нөвәтлик хәлқара моңғул, хитай демократийә мәсилилири муһакимә йиғини"ға тәклип билән қатнашқан уйғур вәкиллири уйғурлар мәсилисини әтраплиқ оттуриға қойған.

"2 - нөвәтлик хәлқара моңғул, хитай демократийә мәсилилири муһакимә йиғини" 11 - айниң 27 - күнидин 29 - күнигичә германийәниң көлин шәһиридә үч күн давамлашқан болуп, бу йиғинға тәклип билән уйғурлар вә тибәтликләрниң вәкиллириму қатнашқан. Уйғурларға вәкалитән бу йиғинға иштирак қилған д у қ иҗраийә комитети рәиси долқун әйса, қурултай баянатчиси дилшат решит вә тәшвиқат комитети мәсули әнивәр әһмәтләрниң 29 - ноябир көлиндин бәргән мәлуматиға асасланғанда, йиғинға моңғул, демократик хитай вәкилири, тибәтликләр, уйғурлар болуп көп санда сиясий паалийәтчиләр вә зиялийлар, тәтқиқатчилар қатнашқан.

Йиғинда хитай вә җәнубий моңғулийиниң омуми вәзийити һәм кишилик һоқуқ мәсилилири муһакимә қилиниш билән биргә, уйғурлар мәсилисиму муһакимә темисиға айланған. Долқун әйса әпәнди бу хусуста мәлумат берип, муһакимә темилири мәзмун даирисиниң наһайити кәң болғанлиқини тилға алди. Уйғур зиялийси әнивәр әпәндиму бу хилдики йиғинларға қатнишишниң әһмийитиниң зор болидиғанлиқини һес қилғанлиқини ейтти.

"моңғул, хитай демократийә мәсилилири муһакимә йиғини"ға қатнашқан уйғур вәкилләр

Йиғинда сөз қилиш пурситигә еришкән уйғур вәкиллири охшимайдиған темиларда пикир баян қилип, алди билән уйғурлар мәсилисигә қарита хитай зиялийлиридики хата қарашларни түзитишниң муһимлиқини тәкитлигән. Болупму уйғур илидики миллий қаршилиқ һәрикәтлиригә ниспәтән хитай хәлқиниң тоғра тонушта әмәсликини баян қилған долқун әйса әпәнди, хитайларниң уйғур или вәзийитини тоғра тонушиниң зөрүрлүкини, хитай зиялийлириниң компартийиниң сахта тәшвиқатиға алданған хитай хәлқини тоғра чүшәнчә билән тәминләш мәҗбурийити барлиқини оттуриға қойған.

Уйғур зиялийси әнивәр әпәнди, бундақ йиғинларға қатнишип, хитай өктичи күчлиридики уйғурларға болған хата чүшәнчилиригә түзитиш беришниң зөрүрлүкини әскәртти вә өзиниң бу йиғинда оттуриға қойған темиси һәққидә чүшәнчә бәрди.

1 - Нөвәтлик хәлқара моңғул, хитай демократийә мәсилилири муһакимә йиғини" 2011 - йили германийәниң көлин шәһиридә өткүзүлгән болуп, бу йиғинға уйғур вәкиллириму қатнишип уйғур илиниң омумий вәзийитидин мәлуматлар бәргән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт