Нато украина чеграси йенида һәрбий маневир башлиди

Мухбиримиз үмидвар
2014.09.15
nato-afghanistan.jpg 2001-Йилидин буян америка һәрбий қошунлириниң афғанистанға әвәтилгән тарихи диаграммиси. 2012-Йили 2-май.
AFP

Шималий атлантик окян әһди тәшкилати украина чеграсида һәрбий маневир башлиди. Нөвәттә украина чеграси ичидә 1000 әтрапида русийә һәрбий хадими барлиқи, икки тәрәп арисида тоқунушларниң йәнила давамлишиватқанлиқи ейтилмақта.

Шималий атлантик окян әһди тәшкилатиға әза 15 дөләтниң 1300 кишилик қошуни украинаниң ливов шәһиригә йеқин чегра районида һәрбий маневир башлиған болуп, мәзкур маневирға америка әскәрлириму қатнашти.

Америка авазиниң хәвәр қилишичә, америка дөләт мудапиә министирлиқи мәзкур һәрбий маневирниң украина кризиси партлаштин илгирила пиланланғанлиқини әскәртти. Маневир 12 күн давамлишидикән.

Йәкшәнбә күни украина мудапиә министири валерий гелетей натониң украинаға қорал беришкә башлиғанлиқини ейтқан болсиму, әмма қандақ хилдики қорал-ярақларни бериватқанлиқини ашкарилимиди. Илгири нато өзиниң украинаға қорал бәрмәйдиғанлиқини билдүргән иди.

Хәвәрдә ейтилишичә, ғәрбий украинадики ливовқа йеқин җайда өткүзүлүватқан һәрбий маневирға 200 нәпәр америка һәрбий хадими қатнашқандин сирт йәнә, натониң әзалири вә шәрқий явропадики бир қанчә дөләтниң һәрбий хадимлири қатнашти.

Б б с агентлиқи рус бөлүминиң ейтишичә, 5-сентәбир күни русийәпәрәс күчләр билән кийев арисида тинчлиқ келишими имзаланған болсиму, бирақ тоқунушлар йәнила давамлашмақта, бу һәптә ахирида донетск районида тоқунуш йүз берип, алтә адәм өлүп, 15 адәм яриланди. Украина армийиси билән бөлгүнчи күчләр бир-бирини уруш тохтитиш келишимини бузғанлиқ билән әйиблимәктә.

Америка авазиниң йезишичә, шималий атлантик окян әһди тәшкилати русийәниң яхши қоралланған тәхминән 1000 әтрапида һәрбий хадиминиң украина земинида икәнликини, украина чеграсида русийәниң 20 миң кишилик қошуниниң җайлашқанлиқини тәнқид қилмақта.

Украина кризисидин кейин, украина билән чегридаш шәрқий явропадики дөләтләр русийәниң өзлиригә һәрбий таҗавуз қилишидин әндишә қиливатқанлиқи ейтилмақта.

Шәнбә күни украина баш министири арсени ятсунок сөз қилип, русийә президенти владимир путинни қаттиқ әйибләп, путинниң мәқситиниң украинани йоқитиш икәнликини көрсәтти.

Ройтерсниң хәвәр қилишичә, украина баш министири ятсунок кийевта өткүзүлгән хәлқаралиқ йиғинда сөз қилғанда гәрчә тинчлиқ келишими имзаланған болсиму, әмма “президент путинниң мәқсити пүтүн окраинани мустәқил дөләт сүпитидә вәйран қилиштур” дегән. ясунок сөзидә йәнә, “униң мәқсити пүтүн окраинани игиләш, русийә, дуняви нуқтидин алғанда пүтүн явропаниң бихәтәрлики үчүн тәһдит” дәп әскәрткән.

“украина һәқиқити” гезитиниң хәвәр қилишичә, нато һәрбий маневир башлиған бу күндә украина президенти петро порошенко украина парламентидин шәрқий украинадики қаршилиқ йүз бериватқан луганск вә донетск вилайәтлиригә өзини башқуруш һоқуқи беришни, урушларға қатнашқанларниң һәммисигә кәчүрүм елан қилишни тәләп қилди. Әмма һазирчә өзлирини мустәқил донетск хәлқ җумһурийити вә луганск хәлқ җумһурийити дәп атиған бу җайларға қандақ сиясий һоқуқ беридиғанлиқи ениқ әмәс.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.