Норвегийәдә әһмийәтлик норуз паалийити өткүзүлди

Ихтиярий мухбиримиз айгүл
2014.03.24
norwegiye-uyghur-noruz.jpg Норвегийәдики уйғурлар норуз байримини тәбриклиди
RFA/Aygul


23 - Март йәкшәнбә күни норвегийәдики уйғурлар норуз байримини тәбриклиди.

Бу қетимқи норуз байрими илгирики йиллардикидәк нахша - усул вә башқа көңүл ечиш паалийитини асас қилған һалда елип берилмастин, нөвәттә тайланд вә малайшияда мусапир болуп туруватқан, сақчилар тәрипидин колликтип һалда тутқун қилинғанларға қандақ қилғанда ярдәм қилғили болидиғанлиқи һәққидә нутуқ сөзләш вә ианә топлаш паалийити асас қилип елип берилди.

Норвегийә уйғур комитетиниң рәиси ниғмәт әпәнди меһманларға бүгүнки норуз паалийитининиң мәқсити һәққидә сөзлиди.

Бүгүнки паалийәтниң алаһидә болған йәнә бир мәзмуни, ирақтин кәлгән әзәрбәйҗанлиқ маһни ханим вә униң достиниң бүгүнки норуз паалитигә қатнишиши болуп һесаблиниду. Маһни ханим тәклип билән меһманларға сөз қилип мундақ деди:

- Мән ирақтин кәлгән әзәрбәйҗанлиқ, норвегийәдә яшаймән, мәнму силәргә охшаш һәр заман вәтән һәсрити чекимән. Биз түрк миллити болуп қалғанлиғимиз үчүнла вәтәндин айрилдуқ, бизиниң ирақта тартқан азаблиримиз,төккән қан - яш вә әркинлик үчүн төлигән бәдәллиримиз силәр билән охшаш.

Маһни ханим қизғин алқишлар ичидә күзигә иссиқ яш елип туруп йәнә мундақ деди:

- Мән тайланд вә малайшиядики уйғур қериндашлиримниң әһвалини тор бәтлиридин көргәндин кейин силәрниң бүгүнки бу норуз паалийитиңларға достумни елип өзликимдин кәлдим. Әмәлийәттә бүгүн норвегийәдики әзәрбәйҗанлар норуз паалийитини тәбрикләп катта мурасим өткүзиватиду, лекин мән мусапирлиқ һаятида үлүп кәткән уйғур қериндашлиримға матәм билдүрүш вә мән силәр үчүн нимә иш қилип берәләймән дәп сораш үчүн у паалийәткә қатнашмастин бу йәргә кәлдим. Бизниң тарихимиз охшаш, динимиз охшаш, биз охшаш түрк әвладимиз, мән силәрни худди өз миллитимни сөйгәндәк сөйүмән, әгәр силәрниң вәтиниңларда әркинлик үчүн уруш болидиған болса, мән әшу урушқа қатнашқили баримән. Чүнки мениң қеним түркниң қени, бизниң шәрәплик бир тарихимиз барки, тарихимизда бизниң аяллиримиз ат минип явларға қарши урушқа қатнашқан. Биз һәр қачан силәрниң арқаңларда.

Маһни ханим қайтиш алдида йәнә тәшкилат рәһбәрлири билән көрүшүп өзиниң бу йәрдики әзәрбәйҗан тәшкилатида ишләйдиғанлиқи, уйғур түрклирини қоллайдиған әзәрбәйҗанларниң уйғурлар үчүн немиләрни қилип бәрсә болидиғанлиқи һәққидә сориди вә ахирида мундақ деди: биз түрк хәлқлири тирнақ билән гөшкә охшаймиз, бу иккисини бир - биридин айриветиш мумкинму?

Паалийәт давамида җамаәт вәкиллиридин өмәр һаҗи әң қийин шараитта қалған қериндашлириға ярдәм қилишниң саваби, вәтән, милләтни сөйүшниң диндики пәрзи қатарлиқ мәзмунлар һәққидә диний тәблиғ қилди.

Гәрчә, бүгүнки норуз паалийити норвегийәдики уйғурлар он йиллардин бери нахша - усул вә көңүл ечиш билән қизғин тәбрикләп келиватқан норуз паалийитигә мәзмун вә шәкил җәһәттин түптин охшимайдиған һалда нахша - музикисиз елип берилған болсиму, лекин норуз әһли бир - бири билән қизғин қучақлишип көрүшүп, мол норузлуқ дастиханға дахил болди вә үч күндин бери бу норузлуқ дастиханни һазирлаш үчүн көп күч чиқарған бәхтияр, абләт һаҗим вәтурғунҗан қаримларға алаһидә рәһмәтлирини билдүрди.Тамақтин кейин меһманлар атиғанлирини ианә қилип, қийин шараитта қалған қериндашларға бир яхшилиқниң болуп қелишини аллаһдин тиләп паалийәтни ахирлаштурди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.