Uyghur pa'aliyetchiler norwégiyediki yerlik samilar parlaméntini ziyaret qildi

Ixtiyariy muxbirimiz ekrem
2018-06-13
Share
sami-parlament-uyghur-wekil.jpg Norwégiyediki Uyghur siyasiy aktipliri samilar parlaménti tashqi ishlar xadimi jon jéntal(ongdin ikkinchi) bilen. 2018-Yili 12-iyun, norwégiye, oslo.
RFA/Ekrem

12-Iyun küni oslodiki Uyghur siyasiy aktipliri norwégiyediki yerlik millet - samilar we ularning parlaméntini ziyaret qilip, ulargha Uyghur mesilisini anglatqan.

Dunya Uyghur qurultiyi ijra'iye komitétining mu'awin re'isi semet abla, norwégiye Uyghur komitétining re'isi bextiyar ömer we mezkur komitétning hey'et ezasi xelchem memtimin xanimdin terkib tapqan Uyghur wekiller ömiki 12-iyun küni norwégiye paytexti oslodin shimalgha mangghanda 2000 kilométir yiraqliqtiki samilar parlaménti jaylashqan karasyak shehirige bérip, Uyghurlar mesilisini tonushturghan.

Sikandinawiye yérim arilining shimaliy qismigha, yeni norwégiye, shiwétsiye we rusiye fédératsiyesining késishken rayonlirigha tarqilip olturaqlashqan, shimaliy qutup étekliride yashaydighan qedimiy millet-samilar zadi kim?

Sami parlaméntida ziyarette boluwatqan d u q ijra'iye komitétining mu'awin re'isi semet abla ependi ziyaritimizni qobul qilip, bu heqte chüshenche berdi. U sikandinawiye yérim arilining yerlik ahalisi bolghan qedimiy millet samilarning ilgiriki zamanlarda xuddi hazirqi Uyghurlargha oxshashla külpetlik hayatlarni bashtin kechürgen bir xelq ikenlikini tilgha aldi.

Uyghur wekillirining bildürüshiche, "Sami" dégen bu söz hem milletning hem jughrapiyelik rayonning hem bu millet ishlitiwatqan qedimiy tilning ortaq nami iken. Norwégiyediki sami rayonining merkizi hésablan'ghan karasyoktin ziyaritimizni qobul qilghan norwégiye Uyghur komitétining re'isi bextiyar ependi samilargha Uyghur mesilisini tonushturushning ré'al ehmiyiti heqqide pikir bayan qildi. Norwégiye Uyghur komitétining hey'et ezaliridin xelchem xanimmu bu heqte öz tesiratliri we qarashlirini bildürüp ötti.

Igilishimizche, norwégiyening shimaliy qismidiki karasyok shehiride turushluq samilar parlaméntini ziyaret qiliwatqan Uyghur wekillirining pa'aliyetliri 3 kün dawam qilidiken. Bu jeryanida ular sikandinawiyediki qedimiy yerlik millet samilarning öz erkinliki we heq-hoquqliri yolida élip barghan küreshliri toghrisidiki tejribe-sawaqlirini öginidiken. Shuning bilen bir waqitta yene nöwette künséri yamanlishiwatqan Uyghurlar weziyitini sami xelqige anglitish yolida térishchanliqlar körsitidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet