Obama rusiyeni ukra'inagha herbiy mudaxile qilishning bedili bolidighanliqi heqqide agahlandurdi

Jüme küni rusiye eskerlirining ukra'inagha kirgenliki ilgiri sürülüp, rayon weziyiti téximu keskinleshken mezgilde amérika prézidénti obama rusiye da'irilirini qérim yérim arilidin chékinishke, bolmisa bedili bolidighanliqi heqqide agahlandurdi.

Obama mundaq dédi: rusiye fédératsiyesining ukra'inaning ichide herbiy heriket élip bériwatqanliqigha a'it xewerler bizni bekmu ensiretti.

Obama yene rusiyening ukra'ina bilen tarixiy medeniy we iqtisadiy munasiwetke ige ikenliki, hetta rusiyening ukra'inada bir herbiy bazisi barliqini bildürdi.

U mundaq dédi: emma, ukra'inaning igilik hoquqi we zémin pütünlükige qilin'ghan herqandaq buzghunchiliq weziyetni téximu turaqsizlashturidu. Bu ukra'ina, rusiye we yawropaning menpe'etige muxalip kélidu.

Obama ukra'ina xelqining öz teqdiri we oz kelgüsini özi belgileshke heqliq ikenliki, ukra'ina xelqi öz hel qilidighan ishqa arilishishning mudaxile qilish bolup hésablinidighanliqini bildürdi we mundaq dédi: undaq bolmaydiken bu rusiyening, ukra'inaning igilik hoquqi, musteqilliqi we ukra'ina chégrasini hörmet qilish wedisige shundaqla xelq'ara qanunlargha buzghunchiliq qilghanliq bolidu.

Obama axirida rusiyening herbiy mudaxile qilishi, yéqinda rusiyege bérip olimpikke qatniship kelgen her qaysi ellerning eyiblishige uchrighanliqini bildürdi we munularni tekitlidi: bu mesilide amérika qoshma shtatlirimu xelq'ara jem'iyet bilen bir terepte turidu we shuni éniq mu'eyyenleshtüriduki, ukra'inagha herbiy mudaxile qilishning bedili bolidu.

Ukra'ina bash ministiri wéktor yanukowychning ukra'inadin chiqip ketkenliki ilgiri sürülgendin kéyin, qérim rayonining parlaméntini bir qisim qoralliq kishiler igiliwalghan.

Bu kishiler qorallan'ghan, resmiy herbiyche kiyin'gen bolsimu, ularning herbiy tewelik belgiliri yoq iken. Emma, shundaqtimu bu qoralliq kishilerning rusiyening alahide qisimliri bolushi mumkinliki perez qilin'ghan idi.