Okinawada yüzligen yaponlar Uyghurlarni qollap namayish qildi

6 - Ayning 29 - küni yaponiyining okinawa ölkisining naha shehiride yüzligen yaponlar Uyghurlar üchün namayish qildi. Namayishchilar qollirida sherqiy türkistanning ay yultuzluq bayriqini kötürüp,“Uyghurlargha erkinlik!” “Uyghurlargha musteqilliq” “Xitayning Uyghurlarni basturushi toxtitilsun!” “Sherqiy türkistandin xitaylar chiqip ketsun!”dégendek sho'arlarni towlashti.

Namayish naha shehirining makishi baghchisidin bashlandi. Bashlinish murasimida yaponiye sakura téléwiziye istansisining mes'uli mizushima ependim soz qilip, yéqindin buyanqi Uyghur élide yüz bergen sériq buya weqesi, lükchün weqesi xoten xan'ériq weqesi we ürümchide yüz bergen weqeler toghrisida tepsiliy toxtaldi.

Ziyaritimizni qobul qilghan mizushima ependim, bügünki namayishning Uyghurlar üchün élip bérilishidiki seweb toghrisida toxtilip mundaq dédi: xitayning sherqiy türkistanda chékidin ashqan Uyghurlarni basturush siyasitini yapon xelqige chüshendürüsh we yapon xelqining Uyghurlargha bolghan hésdashliqini qozghash bilen birge xitayning sénkaku ariligha qiliwatqan hujumidin pexes bolush, xitaydin hoshyar turmighanda yaponiyining xitayning mustemlikisige aylinip, Uyghurlarning échinishliq künige qalidighanliqini okinawaliqlargha chüshendürüshtin ibaret.

Namayishta söz qilghan katsuragi xanim ziyaritimizni qobul qilip, özining bügünki namayishqa qatnishish sewebi toghrisida toxtilip mundaq dédi:bügünki namayishni élip bérish arqiliq yapon xelqini Uyghurlarning mesilisige köngül bölüshke chaqirish we Uyghur mesilisige köngül bölüshte her - bir kishining mes'uliyiti barliqni bildürüsh we shundaqla sénkaku arilini qoghdashta yaponlarning öz mes'uliyitini ada qilish kéreklikini bildürüsh.

Namayishchilar undin bashqa “Rabiye qadir xanimning okinawagha kelgenlikini qarshi alimiz” dégendek sho'arlarni towlashti.

Biz emdila okinawagha yétip kelgen Uyghur milliy herikitining rehbiri rabiye qadir xanimgha mikrofonimizni uzattuq. Rabiye qadir xanim bügünki namayish heqqide toxtilip ötti.

Dunya Uyghur qurultiyining mu'awin re'isi ilham mexmut okinawa xelqining Uyghur mesilisini qollash üchün élip barghan bu namayish toghrisida toxtilip ötti.

Dunya Uyghur qurultiyi tetqiqat merkizining mu'awin re'isi doktor turmuhemmet bügünki namayish heqqide öz tesiratini bayan qilip ötti.

Bu qétimqi namayishni “Gheyret qil yaponiye” ammiwi teshkilati orunlashturghan namayish bolup, mezkur teshkilat yapon milletchiliridin terkib tapqan teshkilattur.

Namayish naha shehirining makishi baghchisidin bashlinip, naha shehirining awat kochiliridin biri bolghan xelq'ara kochisini aylinip, okinawaning ölkilik hökümet binasining aldida axirlashti.

Namayish sa'et ikkidin tötke qeder ikki sa'et dawamlashti.