Ukra'ina weziyitining bashqa döletlerge tesir yetküzüshi mumkinmu?

Dunya ammiwi axbarat wasitiliri, analizchiliri bir nechche kündin buyan ukra'ina paytexti kiyéwta dawamlishiwatqan öktichi guruhlarning keng kölemlik namayishining heddidin tashqiri jiddiyleshkenlikini, sheherning musteqilliq meydanida namayishchilar we hoquq qoghdash organliri otturisida yüz bergen toqunushlarda her ikki tereptin bir nechche ademning ölgenlikini, yaridar bolghanlarning xéli köpeygenlikini xewer qilmaqta. “Tén'grinyus axbarat agéntliqi” melumatlirigha qarighanda, namayishchilar sheher merkizidiki ukra'ina öyini, andin edliye ministirliqining binasini bésiwalghan shundaqla memliketning chérkassi, rowno, térnopol, sumi, iwano-frankowsk, liwow qatarliq sheherliridimu ene shundaq namayishlar ewj alghan.

Bezi analizchilar ukra'inadiki weziyetning bashqa döletlergimu tesir yetküzüsh mumkinlikini ilgiri sürmekte. “Mégapolis géziti” da élan qilin'ghan “Meydan qazaqistan da'iriliri üchün sawaq bolalamdu?” namliq maqalining aptori danila yuwachyéf ukra'ina siyasetchilirining memlikette 2004 - we 2005-yilliri orun alghan saghuchrek inqilabtin, 2010-yili qirghizistanda yüz bergen “Talas” inqilabidin sawaq almighanliqini eskertip, hetta kiyéftiki weziyetni 2011-yili qazaqistanning jana'özen weqesi bilenmu sélishturidu. U hem kiyéftiki, hem jana'özendiki weqelerning qaytilinishini xalimaydighanliqini éytip kélip, hakimiyetning da'im xelqning néme dewatqanliqigha qulaq sélip, uning bilen hésablishishi lazimliqini otturigha qoyidu. Qazaqistanliq analizchi aydos sarim ukra'inadiki weziyetning qazaqistan'gha tesir yetküzüwatqanliqini ilgiri sürdi.

Radi'omiz ziyaritini qobul qilghan aydos sarim bu heqte öz qarashlirini otturigha qoydi.