Өмәр уйғур, пакистан мусулманлар бирлики - з партийисиниң башлиқи муһәммәд иҗазулһәқ билән көрүшти

Мухбиримиз шөһрәт һошур
2016-08-19
Share
pakistan-omer-uyghur-wexpi.jpg Өмәр уйғур вәхпиниң “шәрқи түркистан җумһурийәтлирини хатириләш” паалийити
Photo: RFA

Пакистанда паалийәт елип бериватқан өмәр уйғур вәхпиниң башлиқи өмәрҗан түнүгүн исламабадда өткүзүлгән пакистанниң сабиқ дөләт рәиси зияулһәқ вапатиниң 28 йиллиқ хатирә мурасимиға қатнишип, зияулһәқниң оғли вә пакистан мусулманлар бирлики - з партийисиниң башлиқи муһәммәд иҗазулһәқ билән көрүшти. Мурасимға пакистандики 15 нәпәр уйғур билән бирликтә қатнашқан өмәр уйғур, иҗазулһәққә бир миннәтдарлиқ хети вә бир тәләп хәт болуп икки парчә мәктуп сунди.

Көзәткүчиләрниң қаришичә, пакистан билән хитай арисидики мунасивәтниң йеқинқи йиллардин бери барғансери қоюқлишиши, пакистандики уйғур мәнпәәтигә еғир зәрбә бәрди. Мана бу зәрбиниң нәтиҗисидә, 1980 - йиллардин башлап уйғур оқуғучилар оқуп келиватқан пакистанниң һәрқайси вилайәтлиридики мәктәпләрниң ишики уйғурларға тақиветилди, пакистанда әң башта чегра содисини башлиған уйғурлар базардин сиқип чиқирилип, сода хитай ширкәтлириниң илкигә өтти, уйғур һаҗилар үчүн һазирланған икки меһмансарайму чөлдәриди. 2006 - Йилдин башлаш шәкилләнгән бу вәзийәтниң нәтиҗисидә, пакистандики өмәр уйғур вәхпи пакистандики охшимиған партийәләр билән, җүмлидин илгирики йилларда, уйғурларға йеқиндин ярдәмдә болуп кәлгән пакистанниң сабиқ дөләт рәиси зияулһәқниң сиясий из басарлири билән алақилишшкә йөнләнди. Пакистандики паалийәтчи өмәр уйғурниң түнүгүнки паалийити әнә шу йөндики қәдәмләрдин бири.

Өмәр уйғур: “исламабадда өткүзүлгән зияулһәқ вапатиниң 28 йиллиқ хатирә мурасимиға қетилдуқ, мурасимда, иҗазулһәқ билән көрүшүп униңға икки парчә мәктәп сундуқ” деди.

Өмәр уйғурниң дейишичә, мәзкур мурасимға 10 миңға йеқин киши қатнашқан, өмәрҗан мурасимға өзи билән бирликтә қатнашқан 15 уйғурдин үч нәпири билән бирликтә, мурасим сәһнисигә берип, иҗазулһәқ билән көрүшкән вә униңға икки парчә мәктуп сунған. Мәлум болушичә, мәктупниң биридә сабиқ дөләт рәиси зияулһәқниң һакимийәт бешидики вақтида уйғурларға қилған ярдәмлиригә уйғур хәлқи намидин миннәтдарлиқ билдүрүлгән, иккинчи парчә хетидә, уйғурларниң бешиға нөвәттә келиватқан палакәтләр баян қилинип, пакистандин уйғур хәлқиғә қарита инсаний вә диний қериндашлиқ мәсулийитини ада қилишни тәләп қилған.

Муһәммәд иҗазулһәқ, өмәр уйғур вә икки сәпдишини қизғин қарши алған вә тәләплиригә җаваб бериш үчүн айрим вақит аҗиритидиғанлиқини билдүргән.

Мәлум болушичә бу, өмәр уйғурниң иҗазулһәқ билән тунҗи қетим көрүшүши әмәс, 2006 - йили һәҗ сәпиридики уйғурлар пакистанда тосқунлуққа учриғанда, өмәр уйғур бир түркүм һаҗи намзатлирини елип иҗазулһәқниң партийә ишханисиға берип әһвал ейтқан, иҗазулһәқ, буларни йетәкләп пакистандики сәуди әлчиханисиға барған вә әлчиханиниң уйғур һаҗи намзатлириға виза бериши һәққидә тәклип - тәвисийәләрдә болған.

Өмәр уйғур бүгүнки зияритимиз давамида, иҗазулһәқниң дадиси зияулһәқниң әйни чағда уйғурларниң пакистандики оқуш, тиҗарәт вә һәҗ сәпиригә қилған ярдәмлирини әсләп өтти.

Өмәр уйғур сөзиниң ахирида, зияулһәқ аләмдин өткән болсиму, униң варислири вә қоллиғучилириниң пакистанда көп санда мәвҗутлуқини, шуңа пакистандики нөвәттики уйғурларға пайдисиз вәзийәтниң кәлгүсидә чоқум өзгиришигә ишинидиғанлиқини билдүрди.

Һөрмәтлик радийо аңлиғучилар, зияулһәқ 1978 - вә 1988 - йиллири арисида тәхттә олтурған, гуманлиқ бир айроплан қазаси билән аләмдин өткән сабиқ президент. Униң оғли иҗазулһәқ, дадисиниң вапатидин кейин сиясий һаятқа атланған вә пакистандики оң қанат пакистан мусулманлар бирлики партийсиниң башлиқи.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт