Пакистанниң хитай рәиси ши җинпиңни тонуштуруп мәхсус журнал нәшр қилғанлиқиға қарита инкаслар

Ихтиярий мухбиримиз әкрәм
2016.02.22
pakistan-shi-jinping-kitab.jpg Пакистанниң рәиси ши җинпиңни тонуштуруп язған тунҗи китаби “2015-йиллиқ сиясийон ‏- ши җинпиң” ни тарқитиш мурасими. 2016-Йили феврал, исламабад.
news.cn

Хитай ахбарат васитилири 19-феврал күни “пакистан тәкшүргүчи гезити” нәшр қилған “2015-йиллиқ сиясийон ‏- ши җинпиң” баш темисидики рәңлик мәхсус журнални тарқитиш мурасими өткүзгәнликини хәвәр қилди.

Хитайниң “хәлқ тори” вә “тәңритағ тори” қатарлиқ һөкүмәт ахбарат васитилириниң 19-феврал күни шинхуа агентлиқи хәвиридин нәқил елишичә, 18-феврал күни пакистан пайтәхти исламабадта пакистандики мода еқимдики инглизчә гезит “пакистан тәкшүргүчи гезити” нәшр қилған “2015-йиллиқ сиясийон ‏- ши җинпиң” баш темисидики 100 бәтлик рәңлик мәхсус журнални тарқитиш мурасими өткүзүлгән болуп, мурасимда пакистан баш министириниң ташқи ишлар мәслиһәтчиси әзиз бу журналниң тарқитилғанлиқини қизғин тәбриклигән.

Хәвәрдә баян қилинишичә, мурасимға җуңгониң пакистанда турушлуқ баш әлчиси сүн вейдуң вә пакистан-җуңгодики һәрқайси саһәләрдики затлардин болуп, 200 дин артуқ киши қатнашқан. Пакистан баш министириниң ташқи ишлар мәслиһәтчиси әзиз мурасимда сөз қилип мундақ дегән: “ши җинпиң бир йирақни көрәр, билими мол, көзгә көрүнгән сиясийон. У җуңго вә дуняниң тәрәққияти үчүн нурғун йеңи идийә вә тонушларни оттуриға қойған. У оттуриға қойған ‛бир бәлвағ, бир йол‚ тәшәббуси кәң вә парлақ тәсиргә игә болди. ‛җуңго-пакистан иқтисад каридори‚ бир бәлвағ, бир йолдики байрақдар түр болуш сүпити билән, пакистан вә пүтүн районниң қияпитини өзгәртиштә ғайәт зор рол ойнайду.”

Хәвәрдә тилға елинишичә, “мәхсус журнал 100 бәткә йеқин болуп, сүрәт билән йезиқ кириштүрүлүп, ши җинпиңниң җуңгониң дөләт рәһбири болуш сүпити билән ички сиясәт вә дипломатийә қатарлиқ җәһәтләрдики дөләтни идарә қилиш истратегийәси вә гәвдилик төһписи шундақла униң өсүп йетилиш җәряни һәмдә аилә турмуши һәрхил нуқтидин омумйүзлүк тонуштурулған.”

Хәвәрдә йәнә, хитайниң пакистанда турушлуқ баш әлчиси сүн вейдуң: “пакистан тәкшүргүчи гезити” ниң пакистанда әлрайи тәкшүрүши елип берип, рәис ши җинпиңни 2015-йиллиқ сиясийон қилип таллиши һәмдә бу һәқтә мәхсус журнал нәшр қилиши пакистандики һәр саһәниң җуңгониң рәһбиригә болған йүксәк қайиллиқини толуқ ипадиләп бәрди, җуңго-пакистан достлуқиниң кәң даиридә етирап қилинишқа вә қоллашқа еришип, мустәһкәм әлрайи асасиға игә болғанлиқини намаян қилди” дегән.

Бу мунасивәт билән биз, д у қ баянатчиси дилшат решит, германийәдики уйғур диний өлималиридин турғунҗан алавудунһаҗим вә хитайниң пакистан әлчиханисиниң сабиқ дипломати, һазир шиветсарийәдә яшаватқан уйғур зиялийси керәм шерип қатарлиқлар билән сөһбәт елип берип, уларниң қарашлирини игилидуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.