Parizh térrorluq hujumlirigha uchridi, ISIS weqege mes'ul ikenlikini jakarlidi

Muxbirimiz jüme
2015-11-14
Share
fransiye-bataklan-bataclan-hujum-partlash.jpg Parizh shehridiki bataklan tiyatiri
Public Domain


Shu jay waqti 13 - noyabir kechte firansiyening parizh shehiride bir nechche jayda qanliq térrorluq hujumliri yüz bérip 100din artuq adem qazagha uchridi.

Firansiye 24 téléwiziyisining xewer qilishiche, weqe shu jay waqti kech sa'et 10 lar etrapida oxshimaydighan 7 orda yüz bergen. CNN Ning jüme küni kech sa'et 9 da xewer qilishiche, hujumda shu chaghqiche, eng az dégende 153 adem ölgenliki delillen'gen.

Firansiye chégrasi taqalghan. Firansiye prézidénti holland dölet derijilik jiddiy halet élan qilghan.

CNN
Ning firansiye emeldarining éytqanliridin neqil qilip xewer qilishiche, térrorchilar hujumlarda bomba, kalashnikof ( AK - 47) We özini qoshup partlitish qatarliqlarni qollan'ghan, bir qisim bigunah kishilerni görüge éliwalghan.

Firansiye tenterbiye sariyi etrapida yüz bergen weqede adem bomba, sheher merkizidiki kambodzha réstoranida yüz bergen hujumda qoral ishlitilgenliki melum.

Melum bolushiche, hujumning eng échinishliqi bataklan tiyatir sariyida yüz bergen.

Firansiye axbaratning saqchi menbeliridin neqil qilip xewer qilishiche, peqet mushu orunning özidila 100 din artuq adem öltürülgen. Hujum qilghuchilardin biri "Allahu'ekber" dep tekbir éytqiniche tamashibinlargha qaritip oq yaghdurghan.

Bu qétimqi hujumning köp jayda yüz bergenliki, hujumgha uchrighan ademlerning jiqliqi közde tutulup, hujumda ölgenler sanining barghanche köpiyidighanliqi perz qilinmaqta.

Firansiye da'iriliri 1500 neper alahide qisim eskerlirini parizh shehirige yötkigen. Az dégende qoralliq unsurlardin 5 nepiri bir terep qilin'ghan yeni öltürülgen yaki qolgha élin'ghan

ISIS Weqege mes'ul ikenlikini jakarlidi.

Amérika prézidénti obama jüme küni kechqurun élan qilghan bayanatida hujumning peqet firansiye xelqige qaritilghan hujumla bolup qalmastin, belki pütün insaniyetke we uniwérsal qimmet qarishigha qilin'ghan hujum ikenlikini bildürdi.

Firansiye hökümiti we xelqi bilen bir septe turidighanliqini bildürgen prézidént obama mundaq dédi: "Firansiye xelqi amérika qoshma shtatliri bilen köp qétim mürini mürige tirep bir septe turghan. Shuni éniq éytishimiz kérekki؛ biz ularning térrorizm, esebiylikke qarshi küreshliride  ular bilen bir septe turimiz.

Obama yene amérikining firansiyege yardem bérishke her waqit hazir ikenlikini bildürdi.

Amérika fédératsiye tekshürüsh idarisi we dölet bixeterlik idarisi élan qilghan bayanatlirida, özlirining firansiye da'iriliri bilen yéqindin alaqiliship turuwatqanliqi, hazirche amérikigha qarishi hujum tehditi yoq ikenlikini bildürdi.

Bu, bu yil ichide firansiyede yüz bergen ikkinchi qétimliq térrorluq hujumi. Bu yil 7 - yanwar firansiyedin chiqidighan "Charliy hebdo" zhurnilining parizhdiki ishxanisi térrorluq hujumigha uchrap, az dégen 12 adem öltürülgen, bir nechche kishi yarilan'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet