“Qanighan yarimiz - sherqiy türksitanning yénida biz” namliq yighin ötküzüldi

Istanbulda échilghan “Qanighan yarimiz - sherqiy türksitanning yénida biz” namliq yighindin bir körünüsh

2014 - Yili 15 - dékabir düshenbe küni istanbulning topqapi rayonigha jaylashqan istanbul yéngi esir uniwéristétida “Qanighan yarimiz - sherqiy türksitanning yénida biz” namliq yighin we resim körgezmisi échldi.

Yéngi esir uniwérisitéti türk dunyasi tetqiqatliri kulubi teripidin uyushturulghan yighinda aldi bilen istiqlal marshi oquldi, kéyin yéngi esir tibbiy fakoltétining mudiri proféssur doktur demir bodaq ependi échilish nutiqi sözlidi.

Yighinda yene, sherqiy türkistan wexpining bash katipi doktor ömer qul, sherqiy türkistan medeniyet we hemkarliq jem'iyitining enqere shöbe re'isi xeyrullah ependigil ependiler söz qilip, sherqiy türkistanning tarixi, jughrapiyisi, medeniyitini anglatqandin kéyin, sherqiy türkistan xelqining hazir düch kéliwatqan qiyinchiliq mesililirini anglatti.

Ikki sa'et dawam qilghan bu yighinda yene, yéngi esir uniwérisitéti türk dunyasi tetqiqatliri kulubi teripidin teyyarlan'ghan sherqiy türkistan heqqidiki höjjetlik filim körsitildi.

Yighinda yene türk dunyasining yultuzi dep nam alghan Uyghur perzenti mujahid qeshqerli özining jarangliq awazi bilen sherqiy türkistandiki zulumni anglatqan tesirlik shé'irni déklamatsiye qilip yighin ehlini hayajan'gha saldi.

Yighin zali aldida sherqiy türkistan ma'arip we hemkarliq jem'iyitining hemkarliqi bilen resim körgezmisi échilghan bolup, resim körgezmisige Uyghurlarning medeniyiti tonushturulghan her xil milliy kiyim kichekler, doppa, chalghu eswabliri we xitayning sherqiy türkistanda élip bériwatqan bésim we zulumliri eks ettürülgen resimler qoyulghan.

Yighin axirida yéngi esir uniwérisitéti türk dunyasi tetqiqatliri kulubining re'isi rejep éli sari ependi söz qilip sherqiy türkistan mesilisini kün tertipke keltürüsh, xelq ammisigha anglitish shundaqla yéngidin kéliwatqan Uyghur muhajirlargha ige chiqish toghrisida qolidin kélidighan imkanlarni ishgha sélish kéreklikini tekitlidi.

Re'isi rejep éli sari ependi mundaq dédi: “Biz türk dunyasi tetqiqatliri kulubi bolush süpitimiz bilen ata yurtimiz, öz qan qérindashlirimiz bolghan sherqiy türksitanliqlarning insandek yashash peryadigha sükütte turmiduq we buningdin kéyin sükütte turmaymiz. Biz qolimizdin kélishiche shertsiz we shübihisz sherqiy türkistanning yénida bolushtin özimizni sherep hés qilimiz. Sherqiy türkistan eng éghir bedel tülewatqan bolsimu, bir küni choqum azadliq we musteqilliqigha ériship türkiyimizning yénida öz qan qérindishi bolup orun alidighanliqigha ishinmiz”.

Biz bu yighin toghrisida pikir - qarashlirini élish üchün, yighin'gha qatnashqan sherqiy türksitan medeniyet we hemkarliq jem'iyitining enqere shöbe re'isi xeyrullah ependigil we Uyghur ziyaliy azadjan bughra ependi bilen söhbet élip barduq.