Qazaqistanda deslepki qétim “Minnetdarliq küni” memliketlik bayram süpitide ötküzüldi

Melumki, ötken yili astanida bolghan qazaqistan xelq assambiléyisining 22 - mejliside memliket prézidénti nursultan nazarbayéf “Minnetdarliq küni” ni atap ötüshni teklip qilip, öz nutqida mundaq dégen idi: “Kolléktipleshtürüsh yilliri sabiq sowét ittipaqining merkiziy rayonliridin qazaqistan'gha 250 ming neper igiliki musadire qilin'ghan déhqanlar palandi. Stalin tüzümide her yilliri bir türküm xelqler, 800 ming némis, 102 ming polek, shimaliy kawkaz xelqlirining 550 ming wekili, yiraq sherqtin 100 ming koréyan a'ililiri mejburiy köchürüldi. Shuning bilen qazaq a'ililiri özliri bek éghir namratchiliqta bolsimu, ularni öylirige qobul qildi.”

Mushu yilning yanwar éyida bolsa, dölet rehbiri 1 - martni “Minnetdarliq küni” süpitide bayramlash heqqide öz qararini imzalidi. Shu munasiwet bilen pütkül qazaqistan boyiche 1 - martta bu bayram deslepki qétim atap ötüldi.

Jümlidin, almatadiki dostluq öyide minnetdarliq künige béghishlan'ghan “Méning qazaqistanim” témisida féstiwal ötti. Uningda sözge chiqqan almata shehiri hakimning orunbasari arman qiriqbayéf qazaqistanda 130 din oshuq milletlerning bir xelq süpitide memliketning omumiy tereqqiyatigha öz töhpilirini qoshuwatqanliqini, milletler we dinlar ara razimenlik, dostluq, milliy birlik we bashqimu qedriyetlerning döletning eng chong bayliqliri bolup hésablinidighanliqini ilgiri sürüp, barliq méhmanlarni bu bayram bilen tebriklidi. Uningda jumhuriyetlik we sheherlik étnomedeniyet merkezlirining wekillirimu sözge chiqip, bu heqte öz pikirlirini bildürdi. Féstiwal da'iriside kitab körgezmisi, “Bir dölet, bir a'ile” témisida foto - körgezme, “Milliy birlik, milletler we dinlar ara razimenlik” témisida resimler körgezmisi uyushturuldi. Buningdin tashqiri féstiwal ishtrakchiliri konsért programmilirini, milliy ta'amlar we kiyimler, milliy tarix, medeniyet, sen'et we bashqimu saheler boyiche körgezmilerni qoydi.

Radiyomiz ziyaritini qobul qilghan qazaqistandiki Uyghurlarning jumhuriyetlik étnomedeniyet merkizining ijra'iye mudiri zuhrullam qurwanbaqiyéf qazaqistanning öz waqtida köpligen milletler üchün issiq makan'gha aylan'ghanliqini otturigha qoyup, mundaq dédi: “Heqiqeten, tarixqa nezer tashlisaq, 1930 - we 37 - yilliri nurghun milletlerning teqdiri nahayiti échinarliq boldi. Kawkaz xelqliri, némislar, gréklar, koréyelikler mejburiy köchürülüp, qazaqistan'gha orunlashqan. Bu waqitta qazaq xelqimu nahayiti éghir ehwalda idi. Shuninggha qarimay ular sirttin kelgenlerge qoynini échip, qolidin kelgen yaxshiliqlarni körsetti. Mana shu ewladning bügünki wekilliri qazaq xelqige, qazaq yérige, qazaq prézidéntigha chong rehmetlirini éytmaqta.”

Z. Qurwanbaqiyéf shundaqla bu bayramning qazaqistanda uzundin buyan nishanlinip kéliwatqan resmiy bayramlardin héch qélishmaydighanliqini, qazaq xelqige minnetdarliq bildürüshning her bir kishining burchi ikenlikini, uzun waqittin buyan yettisu teweside yashap kéliwatqan Uyghurlarningmu chin qelbidin qazaq xelqidin razi ikenlikini tekitlidi.

Minnetdarliq bayrimi shundaqla qazaqistandiki qazaq, rus, özbék, Uyghur, tajik mektepliridimu daghdughiliq ötküzüldi. Bu pa'aliyetning qandaq shekil we mezmunda ötkenliki heqqide, mesilen, almata wilayiti emgekchiqazaq nahiyisige qarashliq awut sattarof namidiki qaraturuq ottura mektipi mudirining terbiye ishliri boyiche orunbasari gülinur baqiyéwa mundaq dédi: “Biz, ustazlar bilen oqughuchilar minnetdarliq künini chong pa'aliyetler bilen ötküzduq. Oqughuchilar ata - anilargha, mekteptiki xizmet qiliwatqan anilargha, ustazlargha konsért uyushturdi. Mektepte insani balisigha qandaq we kimlerdin yaxshiliq kélidighanliqi heqqide resimler taxtisi chiqarduq. 1 - We 4 - siniplargha yighin ötküzüldi. Oqughuchilar uningda shé'irlar, naxshilar arqiliq ustazlirigha, ata - anilirigha özlirining rehmitini bildürdi. 5 - We 11 - siniplar arisida chong yighin ötküzülüp, uninggha bilim bölümidin, hakimchiliqtin méhmanlarni chaqirduq. Uningda milliy naxsha - ussullar körsitilip, memlikitimiz prézidéntigha, xelqimizge minnetdarliq bildürüldi.”