Astanada ötken qazaqistan xelqi assambléyisining yighinigha Uyghurlarmu qatnashti

Ixtiyariy muxbirimiz oyghan
2015.04.24
Share on WhatsApp
Share on WhatsApp
astana-ansambel-uyghur-wekiller.jpg Astanada ötken qazaqistan xelqi assambléyisining yighinigha qatnashqan Uyghur wekiller
RFA/Oyghan


23 - Aprélda qazaqistan paytexti astana shehirining tinchliq we razimenlik sariyida qazaqistan xelqi assambléyisining nowettiki 22 - yighini bolup ötti. Memliketning barliq wilayetlirige wakaliten qatnashqan bir yérim mingdin oshuq wekil ichide parlamént we assambléye ezaliri, medeniyet merkezliri re'isliri, merkiziy ijra'iy organlar, siyasiy partiyeler, diniy birleshmiler, chet'ellerning diplomatiyelik wakaletxaniliri rehberliri, aliy oqush orunliri mudirliri, ilmiy we ijadiy ziyaliylar, shundaqla ammiwiy axbarat wasitiliri wekilliri boldi.

Yighin'gha qazaqistanda yashawatqan yüzdin oshuq millet wekilliri qatarida Uyghurlarmu ishtrak qildi. Ular arisida qazaqistan parlaménti aliy kéngishining ezasi murat exmediyéf, qazaqistan Uyghurlirining jumhuriyetlik étnomedeniyet merkizining re'isi shahimerdan nurumof, almata sheherlik meslihitining ezasi exmetjan sherdinof, “Nur otan” partiyisi siyasiy kéngishining ezasi asimjan zilawidinof, jumhuriyetlik “Uyghur awazi” gézitining bash muherriri yérshat esmetof, almata shehiri abdulla rozibaqiyéf namidiki 153 - mektep - gimnaziyening mudiri shawket ömerof, jumhuriyetlik bash yigit béshi abduréshit mexsütof, dunya iqtisadi we xelq'ara munasiwetler institutining mudiri, iqtisad penlirining doktori hakimjan arupof we bashqilar bar.

“Menggülük el: bir el - bir teqdir” mawzusida ötken mezkur yighinda qazaqistan jumhuriyiti prézidénti nursultan nazarbayéf assambléye aldigha yette yéngi wezipe qoyup, ularni “Xelq birliki - bizning bash bayliqimiz” dégen shu'ar astida emelge ashurushqa chaqirdi. U mundaq dédi: “Jumhuriyetning teqdirini biz, qazaqistanliqlar, öz qolumizgha alduq! biz buni hazirqi we shundaqla kélechek ewladlarning öz bexti we xatirjemliki üchün qilduq. Biz özimizning müshkül tarixidin sawaq élishimiz kérek. Bu, milletler ara munasiwetlerning tarixigha oxshash muhim mesiligimu tégishliktur. U obyéktip we adaletlik halda mekteplerde oqutulushi lazim. Bizning yashlirimiz buni özlirining besh barmiqidek bilishi shert.”

Yighin yekünliri boyiche assambléye muraji'etname qobul qilip, uningda memliket rehbirining teshebbusi bilen élan qilin'ghan qazaqistan xelqi assambléyisi yilining tinchliq we razimenlik, turaqliq siyasitining mustehkemliki, qazaqistan jumhuriyitining xatirjemliki we güllinishini qolgha keltürüsh üchün xelqning birlishish belgisi astida ötüwatqanliqi tekitlendi. Assambléye yighini shundaqla “Menggülük el” omumiy milliy idiyisini toluq qollaydighanliqini bildürdi.

Radiyomiz ziyaritini qobul qilghan qazaqistan Uyghurlirining jumhuriyetlik étnomedeniyet merkizining re'isi, qazaqistan assambléyisi kéngishining ezasi shahimerdan nurumof bu heqte öz qarashlirini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.