Қазақистандики әмгәкчиқазақ наһийилик уйғур мәдәнийәт мәркизи һесават бәрди

Ихтиярий мухбиримиз ойған
2015-10-30
Share
qazaqistan-uyghur-medeniyet-merkizi-2015.jpg Қазақистандики әмгәкчиқазақ наһийилик уйғур мәдәнийәт мәркизиниң һәйәтлири
RFA/Oyghan

Бүгүнки күндә қазақистанниң алмата шәһири вә униң әтрапидики хәшкиләң, или вә җамбул наһийилири, шундақла алмата вилайитигә қарашлиқ талғир, әмгәкчи - қазақ, уйғур вә яркәнт наһийилиридә зич олтурақлашқан уйғурларниң өз тилини, миллий өрп - адәтлирини, маарипини, сәнитини сақлап қелишта вә уларни тәрғип қилиш вә йәниму раваҗландурушта мәдәнийәт мәркәзлири чоң рол ойнимақта. Қазақистанниң илгәрки пайтәхти алмата шәһиридә паалийәт елип бериватқан қазақистан уйғурлириниң җумһурийәтлик етно - мәдәнийәт мәркизи әнә шу наһийиләргә қарашлиқ мәдәнийәт мәркәзлириниң бешини қошуп, уйғурларниң мәдәнийәт мирасини тәрғип қилишқа мунасип һәссисини қошуп келиватиду. Мәзкур мәдәнийәт мәркәзлирини асасий җәһәттин уйғур җамаәтчилики арисида аброй - атаққа игә һәм билим сәвийиси юқири кишиләрниң башқуруп келиватқанлиқи көпчиликкә яхши мәлум. Улар арисида зиялийлар, деһқанлар, ишчилар, тиҗарәтчиләр вә башқиму кәсип игилири болуп, уларниң барлиқини қазақистан президенти нурсултан назарбайеф һәм у башқурған қазақистан хәлқи ассамблейисиниң қойған мәқсәтлири, пиланлири бириктүриду.

Игилишимизчә, уйғур мәдәнийәт мәркәзлири юрт - җамаәтчилик алдида елип барған иш - паалийәтлири һәққидә һесават берип, йиғинларни өткүзүп туриду. Әнә шундақ һесават - сайлам йиғинлириниң бири 26 - өктәбир күни алмата вилайитиниң әмгәкчиқазақ наһийисиниң мәркизи ишиктә шәһиридә өтти. Илгәрки челәк наһийисини өз ичигә алған бу чоң наһийидә уйғурлар олтурақлашқан йезилар көп болуп, уларниң һәр бири мәдәнийәт мәркәзлириниң шөбилиригә игә. Ишиктә шәһиридә өткән һисават - сайлам йиғиниға алмата шәһәрлик мәслиһитиниң әзаси әхмәтҗан шәрдиноф, қазақистан уйғурлириниң җумһурийәтлик етно - мәдәнийәт мәркизиниң рәиси шаһимәрдан нурумоф, наһийә һакими исқақ бинәли абдуқапас оғли, униң орунбасари ахметоф бекет, наһийә һакимчилиқи ички сиясәт бөлүминиң башлиқи мөминҗан исламоф, наһийилик уйғур мәдәнийәт мәркизиниң рәиси арселин зуляроф, җумһурийәтлик йигит башлириниң рәиси абдурешит мәхсутоф вә башқилар болди.

Йиғинда наһийилик мәдәнийәт мәркизиниң 2013 - вә 2015 - йиллардики иш - паалийити мәркәз рәисиниң орунбасари айнисәм вайдинова доклат оқуди.

Зияритимизни қобул қилған наһийә турғуни, журналист мәһәммәтҗан һапизоф мәзкур йиғин һәққидә тохтилип, мундақ деди: “мәдәнийәт мәркизиниң рәиси арселин зуляроф тән - саламәтликигә бағлиқ бу иштин кетишни илтимас қилип, бу илтимас қанаәтләндүрүлди. А. Вайдинова бәргән доклатта асасән ахириқи үч йилда мәдәнийәт мәркизи тәрипидин, шуниң қоллап - қуввәтлиши арқилиқ, шәхсән өзиниң уюштуруши билән йүргүзүлгән ишлар бир - бирләп тәкитләнди. Уларниң ичидә болупму вилайәт дәриҗисидә өткүзгән уйғур мәдәнийәт күнлиридә елип барған иш - паалийәтлири, “мәктәпкә йол” тәшәббусиниң өткүзүлүши қатарлиқ паалийәтләр, районимизниң маливай, челәк, ават йезилирида язғучи - шаирларниң тәвәллутлирини өткүзүш, ана тилида оқуш мәсилиси қарилип, җай - җайларда комиссийә тәшкил қилинип, тәрғибат ишлирини йүргүзди. Маарип саһәсини йүксәлдүрүшкә, балилиримизни билимлик оқутушқа өзлириниң бир кишилик һәссисини қошуш арқилиқ ахириқи йилларда мәктәпләрдә йеңи - йеңи уйғур синиплири ечилишқа башлиди.”

М. Һапизофниң ейтишичә, наһийилик мәдәнийәт мәркизиниң күч чиқириши билән буниңдин ташқири һебуллам қаһһароф намида өткүзүлгән шеирийәт кечилики, язғучи вә драматург әхмәтҗан һаширийниң 75 йиллиқиға беғишланған ават йезисида өткүзүлгән тәнтәнилик мурасим, мәдәнийәт, сәнәт саһәлиридә өткүзүлгән башқиму көплигән паалийәтләр мәдәнийәт мәркизиниң қанчилик дәриҗидә актип ишлигәнликини намайиш қилиду.

М. Һапизоф сөзини давам қилип, йәнә мундақ деди: “йиғинниң қандақ өткәнлики һәққидә пешқәдәм йеза егилики хадими, сабиқ қазақистан кеңишиниң әзаси болған иминҗан насироф, наһийилик мәдәнийәт мәркизини башқурған ғоҗәхмәт сәдвақасоф қатарлиқ кишиләр өзлириниң инкаслирини билдүрүп, һесаватни көпчилик бир еғиздин қанаәтлинәрлик дәп қобул қилди. Иккинчи мәсилә бойичә йеңи рәис болуп илгири наһийә һакиминиң орунбасари болуп ишлигән сулайман шәмшидин оғли мәхсутоф сайланди. Наһийә һакими бинәл исқақ уйғур хәлқигә нисбәтән наһайити яхши пикирлирини изһар қилди. яшлиримизни оқушқа дәвәт қилди. Иш орунлирида уйғур яшлирини йоқлуқини, һазирқи зиялийларниң орнини басидиған яшларниң кәмликини алаһидә тәкитләп, буниңдин кейин ишләш йоллирини көрсәтти, президентимизниң шуниңға қаттиқ көңүл бөлүватқанлиқини ейтип чүшәндүрди. Һәр һалда мәдәнийитимизгә, маарипимизға ғәмхорлуқ қилиш мәҗбурийитини өз үстигә алған мәдәнийәт мәркизиниң иши қанаәтлинәрлик дәп қобул қилинди.”

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт