Qeyseridiki Uyghurlar sheher bashliqini ziyaret qilip yéngi teleplirini otturigha qoydi

Qeyseridiki sherqiy türkistan teshkilati bashqurush hey'iti we qeyseridiki Uyghur musapirlardin terkip tapqan bir guruppa Uyghur qeyseri sheher bashliqi bilen qojasinan rayonluq hökümetning bashliqini ishxanisida ziyaret qilip Uyghurlar namidin rehmet éytti.

Ötken yilining axirida türkiyege malayshiya we tayland arqiliq on minggha yéqin Uyghur kelgen idi. Bu Uyghurlarning köpi türkiyege kelgendin kéyin iqtisadiy jehettin éghir qéyinchiliqlargha duchar boldi. Bundaq bir weziyette türk xelqi, türk ammiwiy teshkilatliri, döletning her derijilik idare - jem'iyetliri, herqaysi sheherlik we rayonluq hökümetler, sherqiy türkistan ammiwiy teshkilatliri we iqtisadiy ehwali yaxshi kishiler bu Uyghurlargha yardem qolini uzatti. Bulardin biri Uyghurlar olturaqlashqan qeyseri sheherlik hökümet bilen qeyseri qojasinan rayonluq hökümet. Qeyseri sheherlik hökümet bilen qeyseri qojasinan rayonluq hökümet burundin tartip Uyghurlargha alahide köngül bölüp kelmekte idi.

27 - May küni qeyseride pa'aliyet élip bériwatqan sherqiy türkistan medeniyet we hemkarliq teshkilatining bashqurush hey'iti ezaliri, mehellining aqsaqalliri, tayland we malayshiya arqiliq türkiyege kelgen musapir Uyghurlarning wekilliridin terkip tapqan hey'et qeyseri sheherlik hökümetning bashliqi mustafa chelikni, arqidin qeyseri qojasinan rayonluq hökümetning bashliqi exmet qolaqbayraqtar ependilerni ishxanisida ziyaret qilip, Uyghur musapirlargha qilghan yardemliri üchün rehmet éytti we Uyghur musapirlar hazir duchar boluwatqan qéyinchiliqlar toghrisida melumat berdi. Tayland we malayshiya arqiliq türkiyege kelgen Uyghurlargha wakaliten bu uchrishishqa qatnashqan Uyghurlar sheher bashliqigha hazirghiche qilghan yardimige rehmet éyitqandin sirit, bezi teleplirini otturigha qoydi. Mesilen. Türk puqraliqigha qobul qilinish, öy sélish üchün zémin bérish dégen'ge oxshash. Axirida ikkila rehberge Uyghur hey'et özliri yaqqan tonur néni bilen samsa soghat qildi.