Qirghizistan aliy kéngishige ikki Uyghur wekili eza boldi

Qirghizistan aliy kéngishige eza bolup saylan'ghan perhat rozi oghli iminof

28 - Öktebirde qirghizistan aliy kéngishining 6 - yighinigha eza bolup saylan'ghanlar özlirining birinchi mejliside qirghizistan jumhuriyitige sadiqliqida, memliketning asasiy qanunigha egishishte, öz wezipilirini xelq menpe'etide orunlashta, elning musteqilliqini we pütünlükini qoghdashta qesem berdi. Shularning arisida ikki Uyghur wekilimu boldi.

Igilishimizche, ötken ayda qirghizistan aliy kéngishige ötken saylamgha 14 partiye wekilliri qatnashqan bolup, pütkül memliket boyiche ikki milyon yette yüz mingdin oshuq saylighuchi tirkelgen idi. Qirghizistan merkiziy saylam komitétining melumatlirigha qarighanda, saylam netijiliri boyiche aldinqi orunni 26,88 pirsent bilen qirghizistan sotsiyal - démokratik partiyisi, andin kéyinki orunlarni “Ata - yurt réspublika”, “Qirghizistan”, “Onugu'u - progréss”, “Bir bol”, “Ata - makan” partiyiliri we bashqilar igiligen.

Radi'omiz ziyaritini qobul qilghan qirghizistan Uyghurlirining “Ittipaq” jem'iyitining re'isi artiq hajiyéf mezkur saylam heqqide toxtilip, mundaq dédi: “4 - Öktebir küni qirghizistan memlikitimizde chong siyasiy pa'aliyet ötti. Qirghizistan hökümitining yuqiriqi kéngishige ezalar saylandi. Uning ichide bizning Uyghur jama'itidin tört bala chiqti. Qirghizistan sotsiyal - démokratik partiyisidin bayaxunof nurmuhemmet, “Ata - makan” partiyisidin ismayilof seydexmet, “Ata - yurt” réspublikiliq partiyisidin perhat tuléndibayéf bilen perhat iminof chiqti. Mushu saylamda ikki bala ezaliq guwahnamisige ige boldi. Bu perhat iminof we perhat tuléndibayéf. Biz, qirghizistanda yashawatqan az sanliq millet, chong ümidler bilen mushu balilargha qaraymiz. Bu balilar yuqiriqi kéngeshke eza bolup qirghizistan'ghimu, Uyghur millitige, qirghizistan xelqige chong hesse qoshidu, dep ishinimiz. Biz, qirghizistan Uyghur jem'iyiti, bularni chaqirip, chong yolgha chiqqanliqigha özimizning raziliqini bildürüp, tebrikliduq.”

Qirghizistan aliy kéngishige eza bolup saylan'ghanlardin perhat rozi oghli tuléndibayéf 1960 - yili qirghizistanning hazirqi bishkek shehiride tughulghan bolup, memliketning emgek we ijtima'iy tereqqiyat ministirliqi yénidiki ijtima'iy tereqqiyat we tijaretchilik institutini tamamlighan we iqtisadchi mutexessislikige ige bolghan. Hazirqi waqitta u qirghizistan tashqi ishlar ministirliqi yénidiki diplomatiyilik akadémiyide xelq'ara munasiwetler kespi boyiche oqushni tamamlash aldida turmaqta. U shundaqla keng da'iridiki tijaretchilik pa'aliyiti bilenmu shughullinip kéliwatidu.

Emdi qirghizistan aliy kéngishining nöwettiki ezasi perhat iminof bolsa, 1975 - yili bishkek shehiride tughulup, wasitichilerning aliy mektipini, andin memuriyetlik bashqurush mutexessisliki boyiche chuy uniwérsitétini tamamlighan. U 2008 - we 2013 - yilliri bishkek sheherlik kéngishining ezasi, mezkur kéngeshning xirajet we maliye mesililiri boyiche komissiye re'isining orunbasari lawazimlirini atqurdi. Yuqirida ismi atalghan qirghizistan aliy kéngishining bu ezaliri qirghizistan Uyghur jama'etchiliki bilen zich alaqide ish élip barmaqchi.

Qirghizistan “Ittipaq géziti” bash muherririning orunbasari rehim hapizi saylamning démokratik asasta ötkenlikini alahide tekitlep, töwendiki sözlerni qildi: “Bu saylamlar démokratiyilelik rewishte ochuq ötti. Qirghizistan Uyghur wekilliridin tört kishi namzat bolup, shularning ichidin ikki kishi aliy kéngeshke ötüp, ezaliq guwahnamilirini aldi. Men oylaymenki, mushu yili qirghizistan Uyghurliri ichide bir tarixiy weqe boldi. Burun qirghizistan aliy kéngishige birdin eza bolghan idi. Hazir xelqimizning wekilliri bolup ikki eza aliy kéngeshke saylandi. Biz buningdin xushal we pexirlinimiz. Emdi mushu némini bildüridu, ispatlaydu désingiz, qirghizistandiki boluwatqan démokratiye. Mesilen, her bir adem eza bolimen dése, millitidin qet'iy nezer mana mushu yerde qirghizistanda heqiqeten démokratiyining alghan sürgenlikini bilimiz. Bizning Uyghur yigitlirimiz aliy kéngeshte qirghizistanning rawajlinishida chong pa'aliyetlerni yürgüzidu, dep oylaymiz. Buningdin kéyin biz yene ishinimizki, Uyghur ezalirimiz qirghizistanning hazirqi siyasiy, iqtisadiy we bashqimu jehetlerdiki tereqqiyatigha özlirining munasip hessilirini qoshidu, dep hésablaymiz.”